1. Kazinji Bhaibheri rinosanangurisa kudini kupangihwa?

ZVICINYI zvamunorangarira pamunozwa gama ro kuti “kupangihwa”? Vandhu vazinji vanorangarira kuti i kupanicwa, asi kupangihwa kunopinda zvondhozvo. Bhaibheri rinonanga kuti kupangihwa kwakanaka kwatiri zve nguva jimweni kunonangwa pondhopo no zivo, ungwaru, rudo no upenyu. (Mazwi Akangwara  1:2-7; 4:11-13) Ndizvona, ngokuti kupangihwa ndi Mwari, i citatijo co rudo hwaanahwo nesu zve anoda kuti tirarame kwenda no kwenda. (Vaheberi 12:6) Pikija nguva jimweni kupangira kwa Jehovha kunobatanija kupanica, narini akuzivi kumboshata kana kutokhuvaza. Zvokadi kamare, revo huru yo “kupangihwa” inobatanija kujijisa, inga kujijisa kunoita vabari vana vavo vanodiwa.

2, 3. Kupangihwa kwakabatana papi no kujijiswa zve kupanicwa? (Vonanyi pikica yo kutanga.)

² Rangariranyi ngo muezaniso uu. Umwe mujaha anodanwa Johani waitamba bhora mumba. Mai wake vakamubvunja kudari: “Johani, unozviziva kuti bhora aritambiwi mumba  nee? Unophwanya zviro muno.” Asi iyena wakavarerusa woramba ecitamba no bhora. Bhora riya rakaenda kofura vhazo yophwanyika! Make vakaitenyi kuti vamupangire? Vakamujijisa ngo kumusanangurira kuti ngenyi zvaaingaya aita zvainga zvakashata. Vaida kuti iyena azive kuti zvakanaka kuzwira vabari zve azivezve kuti mupango javo jinodikana zve jakaezanana. Kuitira kubesera Johani ave no cijijo ici, make vakavona kuti zvaizova zvakanaka kumupanica ngo kutora bhora riya kakuriviga ko nguva yakati kuti. Izvi azvizivi kumudakajisa, asi zvakamubesera  kuceukija kuti kudari akatama kuzwira vabari vake, anova no muviyo jakashata.

³ Inga maKristu, tiri vo pa muzi pa Mwari. (1 Timoti 3:15) Baba wedu, Jehovha, vanotendehwa kutibvunja zvakanaka no zvakashata zve vanotipangira patinotama kuvazwira. Cimwenizve, kudari zviito zvedu zvikava no muviyo ucikadakajisi, kutipangira ko rudo kunoita Jehovha kungatibesera kuceukija kuti kumuzwira kwedu kunosisira maningi. (VaGalàsia 6:7) Mwari anotida maningi zve aadi kuti titambujike.—1 Pedru 5:6, 7.

4. (a) Jehovha anoda kuti tibeserese kudini vamweni? (b) Zvicinyi zvatinoda kubhuisana pa musoro uno?

⁴ Patinopangira takacijikira mu Bhaibheri tingabesera mwana kana mujiji wo Bhaibheri kuti ave muteveri wa Kristu. Itusu tinoshandisa Bhaibheri kuti tijijise vajiji vedu zviro zvakanaka no kuvabesera kuzwisisa no ‘kuteveja bzese bzo takatumwa ndi Jesu.’ (Mateu 28:19, 20; 2 Timoti 3:16) Iyi ndiyona njira yaanoda Jehovha kuti varovejwe, ngokudaro vanokwanisavo kubesera vamweni kuti vave vateveri vaKristu. (Verenganyi Tito 2:11-14.) Waro, ngatibhuisane ngo mubvunjo mutatu jinosisira: (1) Kutipangira kwaanotiita Jehovha kunotatijisa kudini kuti anotida? (2) Zvicinyi zvatinojija ngo muezaniso jo vandhu vakapangihwa ndi Mwari? (3) Tingatevejeresa kudini mapangiriro anoita Jehovha no Mwana wake?

5. Kutipangira kunoita Jehovha kunovonesa kudini kuti anotida?

⁵ Jehovha anotirungamisa, kutipangira, no kutijijisa ngokuti anotida. Iyena anoda kuti tikhwedere phedo naye zve topona kwenda no kwenda. (1 Johani 4:16) Iyena aazotitukizve nee aaiti kuti tijizwe inga ticikasisiri. (Mazwi Akangwara 12:18) Kusiyapo izvo, Jehovha anosotesesa mugariro jedu jakanaka zve anotitendera kuti tive no rusujunuko hwo kujikhetera. Amuvonivo kuti kupangihwa kwatinoashira kubvira mu Bhaibheri, mabhuku edu, vabari vedu, kana vakuru kunovonesa kuti Jehovha anotida here? Zvokadi kamare, vakuru pavanoeja kutirungamisa ngo maitiro akapfava zve ngo kunaka mwoyo, pikija ticito taziva kuti taita ciri cese cakashata,  ivona vanonga vecitevejera rudo hwa Jehovha na itusu.—VaGalàsia 6:1.

6. Kupangihwa kunotatijisa kudini rudo hwa Mwari, pikija mundhu paanoruza mutoro mu ungano?

⁶ Nguva jimweni kupangihwa kungabatanija zvinopinda kupuwa mbhangiro. Kudari ari wese akaita cishaishi cikuru, aacakwanirisi pa mabasa amweni o mu ungano. Pikija zvakadaro, mapangiriro aya anokhombija rudo hwa Mwari naiyena. Inga muezaniso, mapangirire aya, angamubesera kuti avone kusisira ko kupeja nguva yakawanda ecijija Bhaibheri, kurangarijisisa, no kuita mukumbiro. Izvi i zviro zvingamubesera kuti ushamwari hwake na Jehovha uvange maningi. (Nduyo 19:7) Pakufamba ko nguva, mundhu uwu, angapuwazve mutoro jake jaakaruzaya. Pikija kujingwa ko ari wese, kunovonesa rudo hwa Jehovha ngokuti kunobvikira ungano kuti itame kupsaswa ngo mufambiro wakashata. (1 VaKorinto 5:6, 7, 11) Zve zvecivoneka kuti nguva jese kupangira ka Mwari kwakarungama, ikona kunobesera mundhu wakajingwa kuti azwisise makurire o cishaishi cake. Izvi zvingamuita kuti akhauye.—Maitiro o Vapostori 3:19.

7. Ndiani wainga Shebhina, zve ngowapi mugariro wakashata waakakhwijirija?

⁷ Kuti tizwisise kusisira ko kupangihwa, wari tinoda kubhuya ngo pamusoro po vandhu vavire vakapangihwa ndi Jehovha. Umwe wavo ndi Shebhina, umwe muIziraeri wakapona mu nguva ya Mambo Ezekia, umweni ndi Graham, hama yo mu nguva jedu. Shebhina wainga “nduna yo nyumba,” kangaije ya Mambo Ezekia, zve wainga no mutoro mukuru. (Isaia 22:15) Asi Shebhina wakazozvikuja zve waida kuita kuti vandhu varangarire kuti iyena anosisira maningi. Wakaitisa guva ro kudhura zve wopakira ‘ngoro jake jakaseja.’—Isaia 22:16-18.

8. Jehovha wakapangirisa kudini Shebhina, zve ngowapi wakava muviyo?

⁸ Ngokuti Shebhina wakaeja kuwana goja pacake, Mwari wakapa mutoro wake  mwanarume umweni waidanwa Eriakimu. (Isaia 22:19-21) Izvi zvakaitika apo Sinekeribhe Mambo wo Asiria paaida kuenda koohwisa Jerusarema. Pakufamba ko nguva, Sinekeribhe wakatumira cikwata co vatungamiriri no cikwata co masoca akawanda, kuitira koothyisijira vaJudha zve kooita kuti Mambo Ezekia ajiethe. (2 Majimambo 18:17-25) Ezekia wakatuma Eriakimu no vanarume vamweni vaviri kuti vaende kosongana no vatungamiriri vakabvaya ku Asiria. Umwe wo vanarume avo wainga Shebhina, uwo wainga waamutari. Kubvira apa, tingakwanisa kuvona kuti Shebhina kangaije wainga wajijira kujidodokesa zve wainga acizivizve kucamwa kana kujiitira pena. Wainga watendera kuva no cigaro cicikamuitisi kuti avoniwe inga anosisira maningi. Apa tinojija zviro zvitatu pa zvakaitikari kuna Shebhina.

9-11. (a) Ngocapi cijijo catingajija kuna Shebhina? (b) Munojiswa kudini ngo matajiro aaita Jehovha kuna Shebhina?

⁹ Co kutanga, kuruza cigaro ka Shebhina kunoticeukija kuti kujikuja kunoendesa ku kuparajwa. (Mazwi Akangwara  16:18) Tingava hedu no mutoro unosisira mu ungano, zve vamweni vangarangarira kuti tinosisira maningi. Kana zvakadaro, tinozoramba tecijidodokesa here? Tinozoceukija kuti zvikwaniriso zvese zvatinazvo kana ciri cese catinokwanisa kuita ushoni i ndava yo kuti Jehovha anotibesa here? (1 VaKorinto 4:7) Mupostori Pauro wakangwaja kudari: “Kuti acajivona kupinda bzokudikana, kaveta ajivone ngo kururama no uzivi, mundhu no mundhu.”—VaRoma 12:3.

¹⁰ Cocipiri, mbhangiro yakavanga yakapa Jehovha kuna Shebhina ingakhombija kuti iyena waiziva kuti Shebhina waizokwanisa kucinja. (Mazwi Akangwara  3:11, 12) Ici i cijijo kuno vaya vakaruza mutoro unosisira. Kusiyapo kunyangajihwa no kukhugunyika, ivona vangadikana kuramba vecishandira Jehovha mbhera panoperera simba ravo. Ivona vangavona kupangihwa inga citatijo co rudo hwa Jehovha. Ceukijanyi kuti Baba wedu vo mugore vanozopfupa vaya vanoramba vecijidodokesa. (Verenganyi 1 Pedru 5:6, 7.) Kupangira ka Jehovha ko rudo kungatiumba kudari tikajidodokesa zve toita inga dongo rakapfava.

¹¹ Cocitatu, tinowana cijijo cinosisira maningi ngo matajiro akaita Jehovha kuna Shebhina. Pikija mapangirire a Jehovha anotatija kuti anonyenya cishaishi, anotatijavo kuti anoda mundhu washaisheya. Jehovha anosota zvakanaka ku vandhu. Kudari muri mubari kana mukuru, munotevejera mapangirire anoita Jehovha here?—Juda 1: 22, 23.

12-14. (a) Vamweni vanozwa kudini pavanopangihwa ndi Jehovha? (b) Soko ra Mwari rakabesera kudini hama imweni kuti icinje murangariro wayo zve ngo wapi wakava muviyo?

¹² Zvinosuruvarisa ngo zvo kuti, vandhu vamweni vanohwajihwa maningi pavanopangihwa, ngo ndava yazvo, vanosiya Mwari no ungano. (Vaheberi 3:12, 13) Izvi zvinoda kureva kuti akuna anokwanisa kuvabesera here? Haiwa. Vonanyi muezaniso wa Graham, uwo wainga wakajingwa zve wozohwirijwa. Pasure pazvo, wakaima kucumaera no kuenda ku musongano. Umwe mukuru wakavangisira kuti ave shamwari yake zve Graham wakakumbira mukuru wiya kuti ajije naye Bhaibheri.

¹³ Mukuru wiya wakaceukija kudari: “Graham wakava no cineso ngo kuzvikuja. Iyena  waishora vakuru vakatongaya shwiro yo kujingwa kwake. Asi pa jijo yakazotevera takabhuisana ngo pamusoro po kuzvikuja no muviyo wao. Kubvira pondhopo Graham, wakatanga kusotesesa upenyu hwake ecishandisa Soko ra Mwari, zve aazive kuzvidakarira zvaakavona! Muviyo wakava unoshamaisa! Pakupera kuzwisisa kuti iyena wainga wakapofamajwa ngo “cinpada” co kuzvikuja zve murangariro wake ndiona wainga cineso cake, ngo kukasika wakatanga kucinja. Wakatanga kuenda ku musongano jese jo ciKristu, wojija Soko ra Mwari ngo kuvangisira kwese zve wova no cirovejeso co kuita mukumbiro njiku jese. Wakazodavirazve muthwaro wake wo kumujimu inga musoro wo mbhuri, izvo zvakadakajisa maningi mukaji wake pomwe no vana vake.”—Luka 6:41, 42; Jakobo 1:23-25.

¹⁴ Mukuru wiya wakaengejera eciti: “Njiku imweni, Graham wakandibvunja ciro cakabaya maningi mwoyo wangu. Iyena wakati: ‘Ndakaziva cokwadi kare zve ndakamboshanda inga piyona. Asi, ndi wari basi pandingananga ngo mwoyo wese kuti ndinoda Jehovha.’” Nopapera mukuvo mushoma, Graham wakagajwa kuitira kubesera no mikrofoni pa musongano zve ari kudakara maningi ngo kuita basero. Mukuru uwu wakati: “Muezaniso wake wandijijisa kuti kudari mundhu wakazvidodokesa pamberi pa Mwari wotendera kupangihwa, makomborero anoita ngo kudururika kwaari!”

15. Zvicinyi zvatinodikana kuita kuti kupangira kwatinoita vamweni, kushande?

¹⁵ Kudari tinoda kuva mujijjisi waushoni tinodikana kutanga tava mujiji waushoni. (1 Timoti 4:15, 16) Mukuezana, kudari muri kushandiswa ndi Jehovha kuti mupangire vamweni, munodikana kuramba mucijidodokesa zve tenderanyi kuti Jehovha amutungamirire mu upenyu hwenyu. Vamweni pavanovona kuti munojidodokesa, vanozomureremeja zve zvinozovarerukira kuashira mbhangiro yamunovapa. Tingajija ngo muezaniso wa Jesu.

16. Zvicinyi zvatingajija ndi Jesu ngo pamusoro po mapangiriro no majijisiro anobudirira?

¹⁶ Nguva jese Jesu waizwira Baba wake, pikija pazvainesa. (Mateu 26:39) Iyena wakaceukija vapurutani vake kuti jijiso jake no uzivi hwaainga nahwo zvaibva ka Baba wake. (Johani 5:19, 30) Jesu waizvidodokesa zve waizwira, izvi zvakamubesera kuti ave mujijisi ano usizi. Vandhu vese vakanaka mwoyo vaidakajihwa ngo kuva phedo naye. (Verenganyi Luka 4:22.) Magama akapfava a Jesu akavangisa vaya vainga vakasuruvara zve vakarebejeka. (Mateu 12:20) Iyena wakapangira vapostori vake ngo kusengerera zve ngo njira yo rudo pikija pamukuvo umweni waizonyangajwa navo ngo ndava yokuti vaivereketesana ngo pamusoro po kuti ndiani wainga mukuru pakati pavo.—Marco 9:33-37; Luka 22:24-27.

17. Mugariro japi jinozobesera vakuru kuti vakorondhe ushoni ungano?

 ¹⁷ Nguva jese vakuru pavanopangira vakacijikira mu zviambi zvo Bhaibheri, ivona vanodikana kutevejera Kristu. Mu njira iyi, vanozotatija kuti vanoda kutungamirihwa ndi Mwari no Mwana wake. Mupostori Pauro wakatara kudari: “Itanyi vahavisi vo muxambi wo makapuwa ndi Mwari, muciufambisa ngo mwoyo wese, mucingavangirijwi, ngo kuteveja kuda ka Mwari, mucikapsangi upfumi, kaveta ngo rupfaro hwese; Mucaita veno vavo vo makapuwa ndi Mwari, kaveta itanyi kuti muxambi umuejaeje.” (1 Pedru 5:2-4) Vakuru vanojidira pasi pa Mwari na Kristu, no mudakaro wese, vanozobesereka ivona pamwepo no vanokhorondhwa ndivona.—Isaia 32:1, 2, 17, 18.

18. (a) Jehovha anovetera kuti vabari vaitenyi? (b) Mwari anobesera kudini vabari?

¹⁸ Tingati kudini ngo pamusoro po mapangirire no jijiso inoitwa pa mbhuri? Jehovha anoti ku musoro jo mbhuri: “Mucadopa vana venyu ndava yo kumukira, kaveta, varerenyi mu ureri no Mupango wa Tenji.” (VaEfeso 6:4) Kujijiswa no kupangihwa kunodikanadi kamare here? Mazwi Akangwara 19:18, Shanduro yeNyika Itsva inoti: ‘Pangirai mwana wako pacino vetero, zve mwiha wako ucadova no cido co kumuuraya.’ Jehovha anopa vabari mutoro wokujijisa vana vavo. Kudari vakatama kuvajijisa, vanozodavira pamberi pake! (1 Samueli 3:12-14) Asi, Jehovha anopa vabari zivo no simba ro vanoda pavanomukumbira besero ngo mukumbiro no kuthemba Soko rake pamwepo no mujimu mucena kuti uvatungamirire.—Verenganyi Jakobo 1:5.

19, 20. (a) Ngoapi makomborero atinowana patinotendera kupangihwa ndi Mwari? (b) Tinozobhuyenyi pa musoro unotevera?

¹⁹ Kudari tikatendera kupangihwa ndi Mwari zve totevejera manera anopangira Jehovha na Jesu, tinozova no makomborero akawanda maningi. Mbhuri yedu no ungano inozova no runyararo zve vese vanozojizwa kuti vanodiwa, vanosisira zve vakangwaririka. Izvi ndi zvishoma kudari tikaezanisa no runyararo zve mudakaro watinozova nao kumbejiyo. (Nduyo 72:7) Mapangirire anoita Jehovha ari kutinasirira kuti tizopone pamwepo kwenda no kwenda no runyararo, takabatana inga mbhuri, tino Jehovha inga Baba wedu. (Verenganyi Isaia 11:9.) Kudari tikaceukija izvi, zvokadi kamare tinozovona kuti kupangihwa ndi: njira yakanakisisa inoshandiswa ndi Mwari kuitira kutitatija kuti anotida.

²⁰ Pa musoro unotevera, tinozojija zvizinji ngo pamusoro po kupangira mukati mo mbhuri zve mu ungano. Tinozovona kuti tingajipangirisa kudini pacedu. Zve tinozojija kuti tingatizisa kudini ciro cinohwaja maningi kupinda kupangihwa.