1. Tingawanisa kudini ungwaru, zve hunozotibeseresa kudini?

UNGWARU unobva kuna Jehovha, zve ngo kukova kwese iyena anoupavo vamweni. Pana Jakobo 1:5 tinoverenga kudari: “Ndiani wenyu anotama uzivi, ngaakumbire Mwari, wiya anopa vese ngo kuzara.” Njira imwe yo kuwana ungwaru i kutendera kupangihwa ndi Mwari. Kuita kudaro, kunotibvikira kuti titame kuita zviro zvakashata zve tirambe tiri phedo na Jehovha. (Mazwi Akangwara  2:10-12) Zve tinozova no vetero inoshamaisa yo kupona kwenda no kwenda.—Juda 1:21.

2. Tingajijenyi ngo mapangirire o rudo a Mwari?

² Ngo ndava yo kutama kukwana kwedu zve no marerehwe edu, nguva jimweni zvingatinesera kutendera kupangihwa kana tingakonehwa kuvona kuti kwakanakira papi. Asi, patinovona muviyo jinovepo ngo kupangihwa ndi Mwari mu upenyu hwedu, tinozwisisa kuti Mwari anotida maningi. Mazwi Akangwara 3:11, 12 inotibvunja kudari: “Mwana wangu, ucaxora mapangiro a Tenji Mwari.” Yotizve: “Ngokuti Tenji Mwari anovereketera vaanoda.” Tingava no cokwadi co kuti Jehovha anoda zvakanaka kwatiri. (Verenganyi Vaheberi 12:5-11.)  Ngokuti Mwari anonasa kutiziva, nguva jese mapangiriro ake anofanera zve anotodikana kamare. Pa musoro uno, tinozobhuisana ngo njira murongomuna jo mapangirire: (1) kujiroveja, (2) kupangira kunodikana kuita vabari vana vavo, (3) kupangihwa kwatinoitwa mu ungano zve (4) ciro cinohwaja maningi kupinda kupangihwa.

3. Mwana angaenderera kudini mberi pa kujiroveja? Ipanyi muezaniso.

³ Kudari tikajiroveja, tinozojibata pa mufambiro wedu no kurangarira. Kujiroveja atizivi kubahwa nako, ngo kudaro tinodikana kukujijira. Inga muezaniso, mwana mudoko paanojijira kucovha bhasikoro, kazinji vabari vanobatirira bhasikoro riya kuti ritame kuwa. Asi, mu kufamba ko nguva, mwana wiya anojijira kucijikira ega pa bhasikoropo zvokuti vabari vake vangatomusia ega pa zvimuseswa zvinganani. Pavanova no cokwadi co kuti anokwanisa kucijikira pa bhasikoro, vangatomusia kamare. Mu njira yakafanana, vabari no kusengerera kwese, pavanoroveja vana vavo “mu ureri no mupango wa Tenji,” vanonga vacivabesera kuti vasakurire kujiroveja pamwepo no uzivi.—VaEfeso 6:4.

4, 5. (a) Ngenyi kujiroveja i divi rinosisira ro “undhu hupsa”? (b) Ngenyi atidikani kuremba pikija tikaposa?

⁴ Izvi zvakaezanavo no vandhu vaya vanoguma pa kuziva Jehovha pavanonga vakura. Pikija vangatokwanisa kujiroveja, ivona asipi maKristu akaibva. Asi, pavanotanga kusimira “undhu hupsa” no kueja kuva inga ndi Kristu, vanoguma pa kuibva kamare. (VaEfeso 4:23, 24) Kujiroveja kunotibesera kujijira “kuregera maitiro akaxata no bziemuriro bzo nyika yo pasi; kuti tirarame pasi pano ngo kujibata, urungami no unyaxa.”—Tito 2:12.

⁵ Asi, tese tinoshaisha. (Mucumaeri 7:20) Ngokudaro, kudari tikaposa, zvinoreva kuti atizivi kunasa kuzviroveja kana kuti atizombonasizve here? Haiwa. Pana Mazwi Akangwara 24:16 tinojija kudari: “Ngokuti vakarurama vanowa runomwe, vomuka.” Zvicinyi zvinozotibesera kuti ‘timuke’? Atizozvikwanisi tega, asi ngo mujimu wa Mwari. (Verenganyi VaFilipi 4:13.) Mucero wo mujimu uwu unobatanija kujibata, uko kwakaezana kamare no kujiroveja.

6. Tingagumisa kudini pa kuva vajiji vakanakisisa vo Soko ra Mwari? (Vonanyi pikica yo kutanga.)

⁶ Mukumbiro, kujija Bhaibheri no kurangairjisisa kunozotibesera kusakurira kujiroveja. Asi, kudari kujija Bhaibheri kunomunesera kana kuti amutokudakariri keni? Mucapera simba. Kudari mukatendera, Jehovha anozomubesera kuti ‘mudisise’ Soko rake. (1 Pedru 2:2) Kumbiranyi Jehovha kuti amubesere kujiroveja mwega, ngo kuwana nguva yo kujija Bhaibheri. Kangaije mungatotanga ngo kuita jijo yo nguva shoma. Padoko ngo padoko, zvinozoguma pa kureruka zve jijo yenyu yova inodakajisa. Munozodakarira nguva yamunozopeja mucirangarirjisisa ngo pamusoro po murangariro jinosisira ja Jehovha.—1 Timoti 4:15.

7. Kujiroveja kungatibesera kudini kuti tipsake zvido zvedu mu basa ra Jehovha?

⁷ Kujiroveja kunotibesera kupsaka zvido zvedu mu basa ra Jehovha. Inga muezaniso, baba vamweni vakajizwa kuti vari kuruza kuvangisira kwavo, ngokudaro vagaja cido co kuva piyona wo nguva jese. Kujiroveja kwakavabesera kudini? Vakaverenga musoro jo marevhista edu jinobhuya ngo pamusoro  po upiyona perapo voita mukumbiro. Kuita izvi, kwakaita kuti ushamwari hwavo na Jehovha uvange. Vaishandazve inga piyona wo besero, mugariro wavo powaitendera. Avazivi kusia kuti ciri cese civaphingaije, kusiapo kuramba vakabatikana pa cido cavo. Nopapera nguva yakati kuti, vakaguma pa kuva piyona wo nguva jese.

8-10. Zvicinyi zvingabesera vabari kuti varere vana vavo kuti vashandire Jehovha? Ipanyi muezaniso.

⁸ Jehovha anopa vabari mutoro wo kurera vana vavo “mu ureri no mupango wa Tenji.” (VaEfeso 6:4) Izvi zvinonesa maningi mu nyika ino. (2 Timoti 3:1-5) Vana pavanobahwa, ivona avazivi cakanaka no cakashata zve hana yavo aizivi kurovejwa. Ngokudaro vanoda kupangihwa kuti vairoveje. (VaRoma 2:14, 15) Umwe mujiji wo zvo Bhaibheri wakasanangura kuti gama ro Cigiriki rakasandujwa inga “kupangihwa” ringarevavo “makurire o mwana,” kana kurera mwana kuti akure no hwiru.

⁹ Vabari pavanopangira vana vavo ngo rudo, vana vanojizwa vakangwaririka. Ivona vanojija kuti rusujunuko uno paunogumira zve zvese zvavanoita mu upenyu  zvino muviyo. Ngokudaro, zvinosisira maningi ku vabari vo ciKristu kuti vathembe uzivi hwa Jehovha kuti uvabesere kurera vana vavo. Mazano ngo pamusoro po kurera vana anosiana ngo mutundhu, zve anondocinja-cinja. Asi, vabari vanopurukira Mwari avabviri kufembera zvavanodikana kuita kana kutothemba uzivi hwavo kana uzivi hwo vandhu.

¹⁰ Tingajija kubvira ku muezaniso wa Nowa. Jehovha paakamubvunja kuti avake arka, Nowa aacazviziva kuti waizoizviitisa kudini. Iyena waidikana kuthemba Jehovha, ngo iyo ndava tinoverenga kudari, “wakaita kudaro,” kana kuti wakaita zvese zvaakambvunjwa ndi Jehovha. (Genesi 6:22) Ngowapi wakava muviyo? Arka yakaponesa upenyu hwa Nowa no hwo mbhuri yake. Nowa wainga mubari anobudirira. Ngenyi? Ngokuti waithemba uzivi hwa Mwari. Nowa wakanasa kujijisa vana vake zve wainga muezaniso wakanaka kwavari, izvi azvicaireruka mu nguva iya yakashata Ndambi icito yaitika.—Genesi 6:5.

11. Ngenyi vabari vanodikana kushanda ngo simba kuti varoveje vana vavo?

¹¹ Kudari muri mubari, mungaitisavo kudini kudaro? Purukiranyi zvinonanga Jehovha. Tenderanyi kuti iyena amubesere kurera vana venyu. Shandisanyi mbhangiro jinobva mu Soko rake no mu sangano rake. Mu kufamba ko nguva, vana venyu vanozomubongesera ngo kuita izvo. Imwe hama yakatara kudari: “Ndinobonga maningi ngo njira yo vakandirera vabari vangu. Vakaita zvavaikwanisa kuti vabaye mwoyo wangu.” Iyona yakananga kuti zvakaitwa ngo vabari vayo zvakaibesera kuti ikhwedere phedo na Jehovha. Zvokadi kamare, pikija vabari vakaita zvese zvavanokwanisa kuti vajijise mwana wavo, iyena angasia Jehovha. Asi, mubari anoeja kuita zvaanokwanisa angava no hana yakacena zve angavetera kuti njiku imweni mwana wake anozohwirira kuna Jehovha.

12, 13. (a) Vabari vanotatijisa kudini kuti vanozwira Jehovha, mwana wavo paanojingwa? (b) Mbhuri imwe yakabesereka kudini ngo kuva inozwira Jehovha?

¹² Kujingwa ko mwana ndi umwe wo muejo jinoeja kuzwira ko vabari vamweni. Imwe hambzaji yainga no mwana wokaji wakajingwa wobuda pa muzi, yakananga kudari: ‘Ndakapsaka-psaka mu mabhuku edu masoko aizondipa mathangwe okuti ndienderere mberi ndecibungaijana no mwana wangu pomwepo no mwana wake wokaji.’ Asi mwamuna wayo ngo kunaka mwoyo wakaibesera kuvona kuti avacaingepizve muvonereri wo mwana wayo zve ivona vaidikana kuva vakagondeka kuna Jehovha.

¹³ No papera makore manganani, mwana wo hambzaji iyi wakahwirijwa. Iyona yakati: “Wari iyena anondidanija kana kutonditarira njiku jese. Zve iyena anotireremeja maningi ngokuti anoziva kuti takazwira Jehovha. Tino ushamwari unoshamaisa.” Kudari mwana wenyu wakajingwa, ‘munozogonda Tenji Mwari ngo mwoyo wenyu wese’ here? Munozomutatija kuti amuripi ‘kugonda uzivi hwenyu’ here? (Mazwi Akangwara  3:5, 6) Ceujanyi kuti, mapangirire a Jehovha anotatija kuti ano ungwaru zve anotida maningi. Mucakanganwa kuti wakapa Mwana wake ku vandhu vese zve izvi zvinobatanijavo mwana wenyu. Mwari anoda kuti vese vawane upenyu ucikaperi. (Verenganyi 2 Pedru 3:9.) Ngokudaro, vabari, rambanyi mucigonda kuti mapangirire  a Jehovha no ndhungamiro jake jakanaka, pikija kuzwira kukava kunohwaja. Izwanyi mapangirire a Mwari zve mucahwisana nako.

14. Tinobesereka kudini ngo ndhungamiro ja Jehovha jatinopuwa ngo ‘muvonereri wakagondeka’?

¹⁴ Jehovha wakagondesa kutingwarira, kutibvikira no kutijijisa mu ungano yo ciKristu. Iyena anozviita mu njira jakasiana. Inga muezaniso, wakagaja Mwana wake kuti angwarire ungano zve Jesu wakagaja ‘muvonereri wakagondeka’ kuti atipe zvokuha zvokumujimu zvinotibesera kuti tirambe takagondeka. (Luka 12:42, Shanduro yeNyika Itsva) ‘Muvonereri’ uwu anotipa ndhungamiro jinosisira maningi kana jijiso. Mungarangarira njiku yo makambozwa hurukuro kana makamboverenga musoro umwe wo marevhista edu akamubesera kucinja murangariro wenyu kana ciito. Dakaranyi henyu ngo kuita cinjo jondhojo, ngokuti muri kutendera kuti Jehovha amupangire.—Mazwi Akangwara 2:1-6.

15, 16. (a) Tingabesereka kudini ngo basa ro vakuru? (b) Zvicinyi zvamungaita kuti vakuru vadakajihwe ngo basa ravo?

¹⁵ Kristu wakatipazve vakuru kuti vatitaje no rudo hwese mu ungano. Bhaibheri rinodanija hama ijo inga ‘zvipo zviri vanarume.’(VaEfeso 4:8, 11-13, Shanduro yeNyika Itsva) Tingabesereka kudini ngo basa ro vakuru? Tingatevejera rutendo no muezaniso wavo wakanaka zve tingatevejera mbhangiro javanotipa jicibva mu Bhaibheri. (Verenganyi Vaheberi 13:7, 17.) Vakuru vanotida zve vanoda kuti tigume phedo na Mwari. Kudari vakavona kuti tiri kuruza musongano kana kuvangisira kwedu, ngo kukasika vanoeja kutibesera. Vanozotipurutana no kutipa vangiso yo rudo zve no mbhangiro jo ungwaru kubvira mu Bhaibheri. Munovona besero ravo inga citatijo co rudo hwa Jehovha here?

¹⁶ Ceujanyi kuti azvizivi kureruka kuti vakuru vatipe mbhangiro. Munorangarira kuti muporofita Natani wakazwa kudini paakaenda koobhuya na Mambo Dhavhidhi pasure po kueja kuviga cishaishi cake cikuru? (2 Samueli 12:1-14) Mupostori Pauro wakazwa kudini paakapangira Pedru, umwe wo 12 o vapostori, ngo kutaja maKristu o ciJudha mu njira yakanakisisa kupinda vaya vaciripi vaJudha? Zvaitoda cicunge kuti Pauro azviite. (VaGalàsia 2:11-14) Waro, mungaitenyi kuitira kuti zvive zvakareruka ku vakuru kupa mbhangiro? Ivanyi munozvidodokesa, mobongesera zve mova mundhu acikanesi kubhuya naye. Vonanyi besero ravo inga citatijo co rudo hwa Mwari. Imwimwi munozobesereka zve vakuru vanozodakara ngo basa ravo.

17. Vakuru vakabeseresa kudini hambzaji imweni?

¹⁷ Imwe hambzaji yakananga kuti zviro zvakaiitikira, zvakaita kuti inesehwe kuda Jehovha zve zvaiisuruvarisa. Iyona yakati: “Ndaizviziva kuti ndaidikana kubhuya no vakuru. Ivona avazivi kundivereketera nee kundikharamusa, asi vakandivangisa no kundipa simba. Musongano jese jikandopera, azvinenyi vainga vakabatikana zvakadini, umwe wavo waiviya kuzondicungamija. Ngo ndava yo zvakandiitikirari kare, ndaindojizwa inga kuti andifaneri kudiwa ndi Mwari. Nguva ngo nguva, Jehovha waindoshandisa ungano no vakuru kuti avonese rudo hwake kwandiri. Ndinoita mukumbiro wokuti narini andizomusii.”

18, 19. Cicinyi cinohwaja maningi kupinda kupangihwa? Ipanyi muezaniso.

¹⁸ Kupangihwa kungahwaja, asi muviyo wo kuramba kupangihwa ndi Mwari ungahwaja kupinda ciri cese haco. (Vaheberi 12:11) Tingajija ngo muezaniso wakashata wa Kaini no wa Mambo Zedhekia. Mwari paakavona kuti Kaini wainyenya hama yake no cido co kumuuraya, iyena wakamubvunja kudari: “Ngenyi wakanyangajihwa, no hope yako yakasunumara? Nowainasa, aucaidepi kumusa musoro? Kaveta kudari ucikanasi, uxaixi augari pa musuvo pako, inga nyama inonyangira no kukudongorira, here? Unokona kuunyisa?” (Genesi 4:6, 7) Kaini wakaramba kupangihwa ndi Jehovha, wouraya hama yake zve wotambujika ngo muviyo wakazovepo mu upenyu hwake hwese. (Genesi 4:11, 12) Kaini naakazwira Mwari, aacaizova no kuhwajihwa kwese uku.

¹⁹ Zedhekia wainga mambo wakarembejeka zve wakashata. Paaitonga, vandhu vo Jerusarema vainga pa mugariro wakashata. Mukuphinda no kuphinda, muporofita Jeremia wakamungwaja kuti acinje. Asi, mambo wakaramba kupangihwa ndi Jehovha zve wakava no muviyo unosuruvarisa. (Jeremia 52:8-11) Jehovha aadi kuti tihwajihwe zvicina shwiro.—Verenganyi Isaia 48:17, 18.

20. Zvicinyi zvinozoitika ku vaya vanotendera kupangihwa ndi Mwari no vaya vacikatenderi?

²⁰ Nyamasi uno, vazinji mu nyika vanoshora mapangirire a Mwari zve vanomarerusa. Asi sasambi, vese vaya vanoramba kupangihwa ndi Jehovha vanozozwa kuhwaja kwazvo. (Mazwi Akangwara  1:24-31) Ngokudaro, ‘ngatitendere kupangihwa tive takangwara.’ Inga zvinonanga Mazwi Akangwara 4:13, “Batisisai maitiro akanaka o wakajijiswa: ucamasia; umangwarire, ngokuti ndihwona uhomi hwako.”