1. Vabari vo ciKristu vanopsaka kuva no gwinyiso renyi, mwana wavo acito abhabhatijwa?

“KO MWEJI jakawanda ndairamba ndecibvunja Papaa na Mamaa kuti ndaida kubhabhatijwa, zve ivona kazinji vaibhuya neni ngo ndava yondhoyo. Vaida kuva no gwinyiso ro kuti ndaizviziva kuti civaringo co kubhabhatijwa asipi co mushekenyera. Njiku 31 ya mweji wa Mbuji wo gore ro 1934, i njiku icikanganiki kwandiri ngo kuti zvakazoitika.” Izvi zvakasumuhwa ndi Blossom Brandt zve ngo zvakamuitikira paakatema civaringo co kubhabhatijwa. Nyamasi unovo, vabari vazinji vari kubesera vana vavo kuti vateme civaringo ici no ungwaru. Kudari mwana wakanonoka kubhabhatijwa pacina thangwe rakavanga, izvi zvaizokhuvaza ushamwari hwake na Jehovha. (Jakobo 4:17) Mwana wavo acito abhabhatijwa, vabari vano ungwaru, vanopsaka  kuva no gwinyiso ro kuti iyena wanasiririka kuti ave mujiji wa Kristu.

2. (a) Ngo capi cineso ciri kuvoniwa ngo vavonereri vazinji vo ndharaundha? (b) Pa musoro uno tinozobhuisana ngenyi?

² Vavonereri vamweni vo ndharaundha vari kuvona kuti majaha kana vasikane vazinji vari kugumira pa mupira wo 20 o makore, vacito vabhabhatijwa, pikija vakarehwa mu cokwadi. Kazinji, majaha kana vasikane vondhovo vanotoendavo ku musongano, koocumaera zve vanotojivona inga Zvapupu zva Jehovha. Asi ngo thangwe riri rese vanonga vacito vajipira kuna Jehovha no kubhabhatijwa. Nguva jimweni, izvi zvinoitika ngo kuti vabari vavo, vari kovona kuti vana ava avato vanasiririka kuti vabhabhatijwe. Pa musoro uno, tinozobhuisana ngo zviro zvirongomuna zvinoita kuti vabari vatame kuvangisa vana vavo kuti vabhabhatijwe.

3. Vabari va Blossom vaikaya-kaya ngenyi?

³ Vabari va Blossom, vanangwaya pa ndima yo kutanga, vaikaya-kaya ngo kuda kuziva kuti iyena wainga waano mupira wo kukwanisa kuziva kuti kubhabhatijwa i cinyi zve asipi ciro co mushekenyera. Waro, vabari vangazivisa kudini kuti mwana wavo wanasiririka kuti ajipire kuna Jehovha?

4. Kuitisa kudini mupango wa Jesu unowanika pana Mateu 28:19, 20, Shanduro yeNyika Itsva, unobesera vabari nyamasi uno?

⁴ Verenganyi Mateu 28:19, 20, Shanduro yeNyika Itsva. Bhaibheri arinangi mupira unodiwa kuti mundhu abhabhatijwe. Asi zvinosisira maningi kuti vabari vanase kurangarira ngo pamusoro po revo yo kuita vajiji. Mu ndumi yo ciGiriki, gama ro kuti kuita ‘vajiji’ rakashandisawari pana Mateu 28:19 rinoreva kujijisa mundhu no cido co kumubesera kuti ave mujiji. Mujiji ndi mundhu anojija zve anozwisisa kuti Jesu wakajijisa vaya vaida kumuzwira. Ngokudaro, vabari vanodikana kujijisa vana vavo pavanondobva kubahwa, no cido co kuvabesera kuti vazvipire pacavo kuna Jehovha no kuva vajiji va Kristu. Zvokadi kamare, zvivana azvikwanirisi kuti zvibhabhatijwe. Bhaibheri rinovonesa kuti vocidoko vangazwisisa zve vangada cokwadi co Bhaibheri.

5, 6. (a) Zvinosumura Bhaibheri ngo pamusoro pa Timoti, zvinotikhombijenyi ngo ndava yo rubhabhatijo hwake? (b) Ngoyapi njira yakanakisisa yo kuti vabari vano ungwaru vabesere vana vavo?

⁵ Timoti wainga mujiji wakatema civaringo cokushandira Jehovha paainga ari mujaha. Mupostori Pauro wakananga kuti Timoti wakatanga kujija cokwadi cinobva mu matahwa a Mwari kubvira pa “udoko” hwake. Baba va Timoti avacaishandira Jehovha, asi mai wake na mbiyake vakamubesa kuti ade Soko ra Mwari. Inga muviyo, wakava no gonda rakavanga. (2 Timoti 1:5; 3:14, 15) Zvingaita kuti wainga ari muaruki kana waano makore anokwana 20, paakakwanirisa kuti agajwe basa rinosisira mu ungano.—Maitiro o Vapostori 16:1-3.

⁶ Vana vese vakasiana. Asipi vese vanova no murangariro wakaibva pa mupira wondhowo. Vana vamweni vanozwisisa cokwadi, voita zvisungo zvo ungwaru, zve voda kubhabhatijwa pa mupira wondhowo. Asi vana vamweni kangaije avazivi kunasiririka kuti vabhabhatijwe. Vabari vano uzivi avavangiriji vana vavo kuti vabhabhatijwe. Kunja kwa izvo, ivona vanobesera umwe nga umwe kuti aenderere mberi ega. Vabari vanodakara  vana vavo pavanoshandisa Mazwi Akangwara 27:11. (Verenganyi.) Asi, vanodikana kuvaceukija kuti cido cavo ngo co kubesera vana vavo vagume pa kuva vajiji. Na izvi mu murangariro, vanodikana kuzvibvunjisa kudari: ‘Kureva kuti mwanangu ano zivo yakakwana kuti azvipiri pacake kuna Mwari zve agume pa kubhabhatijwa here?’

7. Kureva kuti mundhu anodikana kuziva jijiso jese kamare jinowanika mu Bhaibheri kuti abhabhatijwe here? Sananguranyi.

⁷ Vabari pavanojijisa vana vavo, ivona vanovabesera kuti vanase kuziva cokwadi. Uzivi wondhowo unozondundira vana kuti vazvipire pacavo kuna Mwari. Asi izvi, azvirevi kuti mwana anodikana kuziva zvese ngo pamusoro po jijiso jo muBhaibheri acito azvipira no kubhabhatijwa. Vajiji vese va Kristu vanodikana kuramba vacijija pikija pavanopera kubhabhatijwa. (Verenganyi VaKolosi 1:9, 10.) Waro mundhu anodikana kuva no zivo yakadini acito wabhabhatijwa?

8, 9. Zvicinyi zvakaitika no mungwariri ku Firipo zve tingajijenyi kubvira ku zvakaitikari?

⁸ Zvakaitika no mbhuri imweni kareko zvingabesera vabari nyamasi uno. (Maitiro o Vapostori 16:25-33) Mu gore ro 50, pa hwedo wake wo cipiri inga misionario, Pauro wakaenda ku dhorabha ro Firipo. Paainga ari kondhoyo iyena na Sira vakapumbhwa vacina ndava, vakasungwa vodihwa mu jere. Pakati po usiku, kwakaitika mudhuma ngo pasi wakavanga zvokuti musuvo jo jere jakafununguka jese. Mungwariri wairangarira kuti vasungwi vainga vatiza, wotoda kujiuraya. Asi, Pauro wakamurambisa. Perapo, Pauro na Sira vakajijisa mungwariri no mbhuri yake cokwadi ngo pamusoro pa Jesu. Ivona vakatenda zviro zvovakajija ngo pamusoro pa Jesu zve vakazwisisa kusisira ko kumuzwira. Ngo kukasika vakabhabhatijwa. Tinojijenyi kubvira ku zvakavaitikirari?

⁹ Zvingaita kuti mungwariri wia wainga akambova musoca wo ciRoma. Iyena aacaiziva Soko ra Mwari. Kuti ave muKristu, waidikana kujija zvokadi zvokutanga zvo mu Bhaibheri, kuzwisisa zvinoda Jehovha ku vashandiri vake no kuzwira jijiso ja Jesu. Zvaakajijari pa nguva shoma zvakamubesera kuti ade kubhabhatijwa. Zvokadi kamare, waidikana kwenderera mberi acijija pasure po kubhabhatijwa. Waro, kudari mwana wenyu wakamubvunja kuti anoda kubhabhatijwa ngokuti anoda Jehovha zve anoda kumuzwira, zvicinyi zvamaizoita? Musienyi kuti aende koobhuya no vakuru, ngokudaro vangavona dangani iyena anokwanirisa kuti abhabhatijwe. * (Vonanyi masoko o pasi.) Kudari inga maKristu ese akabhabhatijwa, iyena anozoramba acijija ngo pamusoro pa Jehovha paanonga ecirarama, pikija kwenda no kwenda.—VaRoma 11:33, 34.

10, 11. (a) Vabari vamweni vanorangarira kudini? (b) Zvicinyi zvinozobvikira vana venyu?

¹⁰ Vabari vamweni vanorangarira kuti zvaizova zviri nane kuti mwana wavo abhabhatijwe paanonga apeja kuva no jijo yo pamusoro no basa rakanaka. Vangarangarira havo kudaro, veciti vari kuda kubesera, asi vanodikana kujibvunjisa kudari: ‘Zvicinyi zvingabesera mwanangu kuti abudirire kamare? Zvinozwirana no zvatinojija mu Bhaibheri here? Jehovha anoda kuti tishandise kudini upenyu hwedu?’—Verenganyi Mucumaeri 12:1.

¹¹ Zvinosisira maningi kuceukija kuti nyika ino no zviro zvayo zvinohwisana no zvinorangarira Jehovha pomwe no kuda kwake. (Jakobo 4:7, 8; 1 Johani 2:15-17; 5:19) Ushamwari hwo phedo na Jehovha ngahunobvikira mwana pa kuhwisana na Sathana, nyika ino, no murangariro jakashata jo nyika. Kudari vabari vakadira pa kutanga jijo yo pamusoro mu upenyu, mwana wavo kangaije anozorangarira kuti zviro zvo nyika ino ngazvinosisira maningi kupinda ushamwari hwavo hwo phedo na Jehovha. Iyi inozova ngozi. Inga vabari vano rudo, muri kudadi kamare kuti nyika ino ijijise mwana wenyu kuziva zviro zvinozomuitisa kuti adakare here? Njira imwe basi kuitira kubudirira no kuwana mudakaro wokadi-kadi i kudira Jehovha pakutanga mu upenyu hwedu.—Verenganyi Nduyo 1:2, 3.

12. Ngenyi vabari vamweni vonovona kuti zviri nane vana vavo vambovetere vacito vabhabhatijwa?

¹² Mai vamweni vakasanangura kuti ngenyi avacaida kuti mwana wavo abhabhatijwe. Ivona vakati: “Ndina nyoa jo kunanga kuti zvaindiita kuti ndinange zvodhozvo kwainga kuthya kuti anozojingwa mu ungano.” Mukuezanavo no hambzaji ii, vabari vamweni vonovona kuti zviri nane vana vavo vambovetere vacito vabhabhatijwa mbhera vave no mupira unokwana unozovabesera kutama kuita zvakashata. (Genesi 8:21; Mazwi  Akangwara 22:15) Vabari vamweni kangaije vanorangarira kuti kudari vana vavo vakatama kubhabhatijwa, ivona avazojingwi. Asi murangariro uwu wakashatira papi?—Jakobo 1:22.

13. Kudari mundhu aazivi kubhabhatijwa, zvinoreva kuti zvaanoita azvipsasi Jehovha here? Sananguranyi.

¹³ I zvokadi kuti vabari avadi kuti mwana wavo abhabhatijwe acito anasiririka kuti apire upenyu hwake kuna Jehovha. Asi zvaizova zvakashata kurangarira kuti zvaanoita mwana wenyu azvizopsasi Jehovha ngo kuti aazivi kubhabhatijwa. Mwana akandoziva basi zvinonangwa ndi Mwari kuva zvakanaka no zvakashata, zviito zvake zvinopsasa Jehovha. (Verenganyi Jakobo 4:17.) Vabari vano ungwaru avarembesi mwana wavo kuti atame kubhabhatijwa. Pikija mwana ari mudoko kamare, ivona vanomujijisa kuda zvinodiwa ndi Jehovha no kunyenya zvinonyenywa Ndiyena, inga zvavanoita ivona. (Luka 6:40) Rudo wo mwana wenyu kuna Jehovha unozomujivirira kuti atame kuita zvishaishi zvikuru, ngokuti iyena anoda kuita zvinonangwaya ndi Jehovha kuva zvakanaka.—Isaia 35:8.

14. Vakuru vangabesera kudini kuvangisira kuri kuitwa ngo vabari?

¹⁴ Vakuru vangabesera vabari ngo kuva no mabhuyo anovaka ngo pamusoro po zvido zvo kushandira Jehovha. Hambzaji imweni yakaceukija kuti Hama Russell vakabhuya nayo poyainga no makore 6 o kubahwa. Hambzaji yakananga kudari: ‘Ivona vakapeja museswa 15 vecibhuya neni ngo pamusoro po zvido zvangu zvo kumujimu.’ Ngo wapi wakava muviyo wakona? Pa kufamba ko nguva, hambzaji iyi yakazova piyona zve yakashanda ko makore anodarika 70! Zvakajeka kuti magama anovaka zve anovangisa angapsasa upenyu hwese hwo mundhu. (Mazwi Akangwara 25:11) Vakuru vangakokavo vabari no vana vavo kuti vaende koobesera mabasa anoitwa pa Nyumba yo Umambo. Ivona vangakumbira vana vadoko vaite mabasa o mupira wavo.

15. Vamweni mu ungano vangabeseravo kudini vocidoko?

 ¹⁵ Vamweni mu ungano vangabeseravo kudini? Ngo kuvonesa kudakarira vocidoko. Inga muezaniso, mungasotesesa ciri cese cinovonesa kuti wocidoko ari kukhwedera phedo na Jehovha. Kunanga kuti ari kudavira ushoni pa musongano jo ungano here, kana kuti ari kuitavo mativi pa urongwa hwo musongano wo pakati po vhiki? Kunanga kuti wakambopa ucapupu kuno ari wese ku cikora here, kana kuti paakaejwa wakaita zviro zvakanaka? Kana zvakadaro, kasikanyi kumubvunja kuti waita ushoni kamare! Tingatema civaringo co kubhuya no vocidoko musongano jicito jaitwa kana japera. Patinodaro, vana vadoko vanojizwa kuti ivona i divi ro ‘ungano huru.’—Nduyo 35:18, Shanduro yeNyika Itsva.

16, 17. (a) Ngenyi zvinosisira kuti vana vabhabhatijwe? (b) Mudakaro wapi ungawaniwa ngo vabari vo ciKristu? (Vonanyi pikica yo kutanga.)

¹⁶ Cimwe co zvidakajiso zvikuru zvino vabari ngo co kujijisa vana vavo vade Jehovha. (Nduyo 127:3; VaEfeso 6:4) Mu jinja ro Iziraeri, vana vaijipira kuna Jehovha pavaindobva kubahwa. Asi, vana vedu avaithwi kudaro. Basi ngokuti vabari vanoda Jehovha no cokwadi, azvirevi kuti vana vavo vanozovavo vakadaro. Kubvira pa njiku inobahwa mwana wavo, vabari vanodikana kumubesera kuti agume pa kuva mujiji, kuitira kuti azvipire kuna Mwari zve abhabhatijwe. Ngenyi zvinosisira maningi? Kuzvipira ko mundhu ega, kubhabhatijwa zve kushandira Jehovha takagondeka zvinozotiita kuti tikwanise kuponeswa pa dambujiko guru.—Mateu 24:13.

¹⁷ Blossom Brandt paaida kubhabhatijwa, vabari vake vaida kuva no cokwadi co kuti iyena wainga wakanasiririka. Pavakava no cokwadi co kuti wakanasirika, ivona vakabesera cisungo cake. Blossom wakasanangura zvakaita babake usiku umwe icito yaguma njiku yo kubhabhatijwa, eciti: “Ivona wakatibvunja kuti tigwadame tese zve voita mukumbiro. Vakabvunja Jehovha kuti vainga vakadakara maningi ngo kuvona cimusikane cavo cicipira upenyu hwaco Kwaari.” No papera makore 60, Blossom wakati: “Ivanyi no cokwadi cokuti, pa makore ese aya, narini andizivi kumbokanganwa usiku wiya!” Vabari, mungavavo no mudakaro wondhowo zve mogajana pamunovona kuti mwana wenyu waguma pa kuzvipira no kubhabhatijwa inga mushandiri wa Jehovha.