1. Ngenyi Jehovha ndi Muumbi mukuru?

MU MWEJI wa Cikowe wo gore ro 2010, kwakapfupiwa mupfupo wo mutengo unokhedera kuita 70 o mamiriau wakapuwa ku rimwe vhazo ro dongo ku Ingratera. Zvinoshamaisa kuziva kuti muumbi angakwanisa kuumba ciro co baratu cakadari inga dongo wociita vhazo rakaseja zve rinodhura. Jehvoha, Muumbi wedu, wakasiyana kamare no vaumbi vo vandhu. Bhaibheri rinonanga kuti Jehovha wakasika mwanarume wakakwana “ngo dongo ro pasi.” (Genesi 2:7) Mwanarume wondhowo, Adhamu, wainga “mwana wa Mwari,” zve wakasikwa no mugariro wokukwanisa kutevejera mugariro ja Mwari.—Luka 3:38.

2, 3. Tingatevejeresa kudini mugariro wo vaIziraeri vainga vakakhauya?

² Adhamu paakapandukira Musiki wake, iyena aazivi kuzovazve mwana wa Mwari. Asi uzinji hwo mubarihwana wa Adhamu wakakheta Jehovha inga Mutongi wavo. (Vaheberi 12:1) Ngo kuzwira no kujidodokesa kwese kuno Musiki wavo, ivona vanokhombija kuti vanomuda inga Baba zve Muumbi wavo, haiwa Sathana. (Johani 8:44) Kugondeka kwavo kuna Mwari  kunoticeukija zvakananga vaIziraeri vokukhauya, avo vakati: “Imwimwi [Jehovha] muri baba wedu, itisu tiri dongo, ndimwi muumbi wedu: itisu tese tiri mabasa o nyara jenyu.”—Isaia 64:7.

³ Vanamati vo kadi va Jehovha nyamasi vari kuvangisiravo kuva vanojidodokesa no kuzwira. Ivona vanovona kuva rukujo kudanija Jehovha inga Baba, zve ivona vanoda kuti ave Muumbi wavo. Tiri kudisisa kuva inga dongo rakapfava ringaumbwa ndi Mwari kuti rive cimujiyo cinosisira here? Tinovona hama no hambzaji jedu inga jiciri kuenderera mberi mukuumbwa ndi Mwari? Kuti tive no mavonero akanaka, ticazobhuya ngo pamusoro pokuti Jehovha anokhetesa kudini vaanoda kuumba, ngenyi anovaumba zve anovaumbisa kudini.

4. Jehovha anokhetesa kudini vaya vaanoda kukwevejera kwaari? Ipanyi muezaniso.

⁴ Jehovha aasoti vandhu inga masotesere atinovaitari. Mukusiyana, iyena anopopora mwoyo wovona zvatiri kamare. (Verenganyi 1 Samueli 16:7b.) Jehovha wakakhombija izvi paakaumba ungano yo ciKristu. Iyena wakakwevejera kwaari no kuno Mwana wake vandhu vaivoniwa ngo vamweni kuva vacikafaneri. (Johani 6:44) Inga muezaniso, umwe wavo wainga muFarisi waizwi Sauro, “muxori . . . no mutevereri wakaxata.” (1 Timoti 1:13) Asi Jehovha wakapopora mwoyo wa Sauro, wovona kuti iyena aaicanga dongo ricikashandi. (Mazwi Akangwara 17:3, Shanduro yeNyika Itsva) Kusiyapo, Jehovha wakavona kuti Sauro waiumbika kuva ‘mujiyo wakasanwa’ waizocumaera kuno ‘majinja, no ku majimambo no ku vana vo Iziraeri.’ (Maitiro o Vapostori 9:15, Shanduro yeNyika Itsva) Jehovha wakakhetazve vamweni vaiumbika kuva mujiyo ‘jinoshandiswa ngo maitiro anoreremejeka,’ vamweni vakambova zvidhakwa, hure zve mbabva. (VaRoma 9:21, Shanduro yeNyika Itsva; 1 VaKorinto 6:9-11) Pavaijija Matahwa, ivona vakavangisa gonda ravo kuna Jehovha zve votendera kuti rivaumbe no kuvavangisa.

5, 6. Kuthemba kwedu Jehovha inga Muumbi kunodikana kupsasa kudini mavonero atinoita (a) vandhu vo ndima yedu? (b) hama no hambzaji jedu?

⁵ Itusu tinothemba kuti Jehovha anokwanisa kukheta no kukwevejera kwaari vandhu vakarungama. Ngo iyo ndava atidikani kutonga vandhu vo mu ndima yedu kana vo mu ungano yedu. Inga muezaniso, vonanyi zvakaita umwe mwanarume anodanijwa Mishaeri paakabvakacihwa ngo Zvapupu zva Jehovha. Iyena wakasumura kudari: “Ndakafuratira ndoita inga kuti andiripi kuvavona. Zvokadi andicaivareremeja! Papera nguva, pa imweni bvaza, ndakasongana no mbhuri yakandishamaisaya maningi ngo kuva no mufambiro wakanaka. Njiku imweni ndakaashira masoko akandikahamaja—o kuti mbhuri iyana yainga Zvapupu zva Jehovha! Mugariro wayo wakaita kuti ndipopore zvaindiitisa kuti ndinyenye Zvapupu.  Ngo kukasika ndakazwisisa kuti mavonero angu aacaijikira pa kutama kuziva zve pa zviro zvandaiita ngo kuzwa, haiwa pa zviro zvokadi.” Mishaeri wakapsaka kuziva zvizinji zve wakatendera kujija Bhaibheri. Pa kufamba ko nguva, iyena wakabhabhatijwa wotozova mushandiri wo mu nguva yakazara.

⁶ Tikatendera Jehovha inga Muumbi wedu, mavonero atinoita hama no hambzaji jedu anozocinjavo. Tinozovona imwe na imwe yajo inga dongo riciri kuumbwa. Ao ndiwona mavonero aanovaita Jehovha. Iyena anovavona zvovari kamare ngo mukati zve anoziva kuti kutama kwavo kukwana ngo ko nguva shomani. Anozivazve kuti umwe nga umwe wavo angava mundhu wo mushovonyi. (Nduyo 130:3) Tingatevejera Jehovha kudari tikavona hama jedu ngo maitiro akanaka. Tingatoshandavo pamwepo no Muumbi wedu kuti tibesere hama no hambzaji jedu kuenderera mberi. (1 VaTesalònika 5:14, 15) Vakuru pa ungano vanodikana kugaja muezaniso wakanaka pa kuita zvondhozvo.—VaEfeso 4:8, 11-13.

7. Ngenyi tinodikana kutendera kupangihwa ndi Jehovha?

⁷ Vamweni vanonanga kudari: ‘Andicaireremeja ushoni kupangihwa kondaiitwa ngo vabari vangu mbhera pandakazovavo no vana.’ Patinonga tecikura, tingatanga kureremeja kupangihwa ngo kuti tinokuvona inga cikhombijo co rudo. (Verenganyi Vaheberi 12:5, 6, 11.) Hina, Jehovha anotida inga vana vake, ngo iyo ndava anotipangira kana kutiumba ngo kusengerera kwese. Anoda kuti tive vano ungwaru, vakadakara zve vanomuda inga Baba. (Mazwi Akangwara 23:15) Iyena aadi kutivona tecitambujika zve kuti tife inga vashaishi vacikakhaui.—VaEfeso 2:2, 3.

8, 9. Jehovha ari kutijijisisa kudini nyamasi uno, zve jijiso yondhoyo inozoendereresa kudini mberi kumbejiyo?

⁸ Ticito taziva Jehovha, kangaije tainga no mugariro muzinji jakashata. Asi Jehovha anotiumba zve anotibesera kucinja, zve inga muviyo, wari taano mugariro jimweni jakanaka maningi. (Isaia 11:6-8; VaKolosi 3:9, 10) Tiri kurarama mu paradhiso yo kumujimu. Iyona i mugariro wakasiyana uri kuitwa ndi Jehovha kuti itibesere kutiumba. Mukati mwayo, tinojizwa takangwaririka pikija tiri mu nyika yakashata. Vaya vakakura vacikakhombijihwi rudo pa mbhuri pavo, asi wari vari kuzwa kudiwa kamare ngo hama no hambzaji javo mu paradhiso yo kumujimu. (Johani 13:35) Itusu takajija kukhombijira rudo kuno vamweni. Asi cinosisira maningi ngo cokuti takaziva Jehovha zve wari tozwa kudiwa ndiyena inga baba.—Jakobo 4:8.

⁹ Mu nyika imbza, tinozonasa kubesereka ngo paradhiso yo kumujimu. Tinozobusa upenyu mu paradhiso yo kunyama yecitongwa ngo Umambo hwa Mwari. Mu nguva yondhoyo, Jehovha anozoramba ecitiumba no kutijijisa ngo maitiro aticikakwanisi  kurangarira ushoni wari. (Isaia 11:9) Jehovha anozoita kuti murangariro no muviri jedu jive jakakwana. Zvondhozvo zvinozoita kuti tirerukihwe kuzwisisa no kuzwira ndhungamiriro jake. Ngo kudaro, ngatitendere kuti Jehovha atiumbe, zve ngatimukhombije kuti tiri kureremeja rudo hwake kwatiri.—Mazwi Akangwara 3:11, 12.

10. Jesu wakakhombijisa kudini kusengerera no uzivi hwo Muumbi Mukuru?

¹⁰ Kudari ngo muumbi ana uzivi anoziva mushovo wo dongo raari kuumba, Muumbi wedu, Jehovha, anonasa kutiziva ushoni. Iyena anoziva patakarembera, zvaticikakwanisi kuita, kuenderera mberi kwatakaita, zve anoumba umwe nga umwe wedu eciziva mugariro iji. (Verenganyi Nduyo 103:10-14.) Tingazivisa kudini kuti Jehovha anotivona ngo kusota zvakaita Jesu paakavona mugariro jo vajiji vake jaiviiswa ngo kutama kukwana. Nguva jimweni, vajiji vake vaivereketesana ngo pamusoro pokuti ndiyani wavo wainga mukuru. Kudari maengavo pondhopo, maizouvona kudini mugariro uwu wo vapostori? Kangaije maizorangarira kuti ivona avacainga dongo rinoumbika. Asi, Jesu waiziva kuti vaizoumbika kudari vaipurutana mbhangiro yaaivapekeja ngo kusengerera no kunaka mwoyo zve kudari vaizotevejera kujidodokesa kwake. (Marco 9:33-37; 10:37, 41-45; Luka 22:24-27) Pasure po kumuswa ka Jesu, vapostori vakaashira mujimu wa Mwari zve avazivizve kuramba vecisotesesa kuti ndiani wainga mukuru. Kusiapo izvo, ivona vakasotesesa pa basa ravakapuwa ndi Jesu.—Maitiro o Vapostori 5:42.

11. Dhavhidhi wakakhombijisa kudini kuva dongo rakapfava, zve tingamutevejeresa kudini?

¹¹ Nyamasi, Jehovha ari kushandisa Bhaibheri, mujimu mucena wake, no ungano kuitira kutiumba. Bhaibheri ringatiumbisa kudini? Tinodikana kuriverenga, kurangarijisisa zvatinoverengemo, zve tokumbira besero ra Jehovha kuti tikwanise kuzvishandisa. Mambo Dhavhidhi, wakatara kudari: “Ndecimucereceja pa kuvata, ndinoejehwa ndecimurangarira.” (Nduyo 63:6) Wakatarazve kudari: ‘Ndinozokuja Jehovha wakandipanga; eya, mwoyo wangu unondijijisa ngo nguva jo usiku.’ (Nduyo 16:7, Baiberi Mazwi Akacena aMwari) Hina, Dhavhidhi wairangarijisisa ngo pamusoro po mbhangiro ya Jehovha zve waiitendera kuti iumbe murangariro pomwe no mazwiro ake o mukati, pikija payainesa kuidavira. (2 Samueli 12:1-13) Iyena wakagaja muezaniso wakanaka kwatiri ngo pamusoro po kujidodokesa no kuzwira. Ngo iyo ndava munodikana kujibvunjisa kudari: ‘Pandinoverenga Bhaibheri, ndinorangarijisisa zve ndotendera kuti ribaye murangariro pomwe no mazwiro angu o mukati? Kudari ndiri kuzviita, kureva kuti ndingaengejera here?’—Nduyo 1:2, 3.

12, 13. Jehovha anotiumbisa kudini ecishandisa mujimu mucena wake no ungano yo ciKristu?

¹² Mujimu mucena ungatiumba ngo njira jakasiyana-siyana. Inga muezaniso, ungatijijisa kutevejera undhu hwa Jesu no kutatija mativi akasiyana-siyana o mucero wo mujimu. (VaGalàsia 5:22, 23) Divi rimwe ro mujimu uwu i rudo. Itusu tino rudo na Mwari zve tinoda kumuzwira no kuumbwa ndiyena ngo kuti tinoziva kuti mupango jake jinobeserazve itusu. Mukuengejera, mujimu  mucena ungativangisa kuti titame kuumbiwa ngo nyika ino yakashata. (VaEfeso 2:2) Mupostori Pauro paiinga aciri mujaha wakakwejehwa ngo vatungamiriri vokujikuja vo ciara co ciJudha. Asi mujimu mucena wakamubesera kucinja. Iyena wakazotara kudari: “Ndinokwanisa bzese ndiyena anondivangisa weya.” (VaFilipi 4:13) Itusuvo tinodikana kukumbira mujimu mucena, teciziva kuti Jehovha anodavira mukumbiro jatinoita ngo mwoyo wese.—Nduyo 10:17.

¹³ Jehovha anoshandisazve ungano no vakuru kuti aumbe umwe nga umwe wedu. Inga muezaniso, vakuru vakavona kurembejeka kuri kwese kwatinako vanoeja kutibesera. Asi, avatipi mbhangiro yakacijikira pa murangariro wavo kamare. (VaGalàsia 6:1) Kusiyapo, ivona no kujidodokesa kwese vanoita mukumbiro kuna Jehovha kuitira kuwana zwisiso no zivo. Perepo, vanopsakisira vecishandisa Bhaibheri no mabhuku o ciKristu kuitira kuwana masoko anozotibesera. Kudari vakuru vakamupa mbhangiro ngo kunaka mwoyo no rudo, ceujanyi kuti i cikhombijiro co rudo hwa Mwari kwamuri. Pamunoishandisa, munozova inga dongo rakapfava Jehovha raanokwanisa kuumba, zve munozobesereka.

14. Pikija Jehovha anokwanisa kuita zvaanoda no dongo, iyena anovonesa kudini kuti anoreremeja rusujunuko wedu hwo kujikhetera?

¹⁴ Kudari tikazwisisa maumbire aanotiita Jehovha, zvinozotibesera kuva no ushamwari hwakanaka no hama pomwe no hambzaji jedu. Zve, tinozova no mavonero akanaka ngo pamusoro po vandhu vari mu ndima yedu, kubatanija vajiji vedu vo Bhaibheri. Mu nguva jo Bhaibheri, muumbi wo dongo acito ariumba waidikana kutanga waricenesa no kuribvisa zvipuwe no zvitongorobwe zvimweni. Muumbi Mukuru, Jehovha, anobesera vandhu vanoda kuumbwa. Iyena aavavangiriji kucinja, asi, anovakhombija ndhungamiriro jake jakacena.  Perepo, ivona ngovanodikana kutema civaringo kuti vaite cinjo jinodiwaro.

15, 16. Vajiji vo Bhabheri vangavonesa kudini kuti vanoda kuti Jehovha avaumbe? Ipanyi muezaniso.

¹⁵ Rangariranyi zvakaitika no imwe hambzaji yo ku Austraria, inozwi Tessie. Iyena aazivi kunesehwa kujija zvinonanga Bhaibheri. Asi, aazivi kuenderera mbheri ngo kukasika nee aacaienda ku musongano. Hambzaji yaijija naye Bhaibheri yakaita mukumbiro kuna Jehovha zve yainga yakatema civaringo co kusiya kujija naye. Perepo kwakaitika ciro cinokahamaja. Pa jijo yavo, Tessie wakabvunja hambzaji yajijaya naye kuti ngenyi aacainderera mbheri. Wakananga kuti waijizwa kuva mucengeji ngo kuti waidisisa maningi kutamba cabutha. Asi wari watema civaringo co kusiya kutamba cabutha.

¹⁶ Ngo kukasika, Tessie wakatanga kwenda ku musongano no kuvonesa mugariro jo ciKristu pikija ecitosekwa ngo shamwari jake jo kare. Pa kufamba ko nguva, Tessie wakabhabhatijwa zve wakazova piyona wo nguva jese, pikija wainga no vana vadoko. Zvakajeka kuti vajiji wo Bhaibheri pavanotanga kuita cinjo kuti vadakajise Mwari, iyena anokhwedera phedo kwavari wovaumba vova mujiyo jinosisira.

17. (a) Munozwa kudini ngo kuva na Jehovha inga Muumbi wenyu? (b) Mativi api o kuumba atinozojija pa musoro unotevera?

¹⁷ Nyamasi uno, vaumbi vamweni vaciri kushandisa nyara pa kuumba dongo kuti vaite mujiyo jakaseja. Mukufananavo, Jehovha ngo kusengerera kwese, anotiumba ecishandisa mbhangiro yake, zve anotisotesesa kamare kuti avone madavirire edu. (Verenganyi Nduyo 32:8.) Muri kuvona kuti Jehovha ano haraka nemwi here? Muri kuvona kuti Jehovha ngo kungwarira kwese ari kumuumba here? Kana zvakadaro, i mugariro japi jingamubesera kuti murambe makadari inga dongo rakapfava ringaumbwa ndi Jehovha? Mugariro japi jamunodikana kutiza jingamuita kuti muve dongo rakavanga ricikaumbiki? Zve vabari vangashandisa kudini ngo simba kuti vaumbe vana vavo? Musoro unotevera unozodavira mubvunjo iji.