1, 2. (a) Cicinyi ciri kudakajisa vandhu va Mwari nyamasi uno? (b) Vabari vo ciKristu pomwe no vakuru vangabesera kudini vacido kuti vazwisise kuti zvinoda kurevenyi kubhabhatijwa?

ECIBVUNJA umwe wocidoko wo 12 o makore o kubahwa, anodanijwa Kristofa, umwe mukuru wo ciKristu wakati: “Ndinokuziva kubvira po wakabahwa, zve ndadakara ngo kuziva kuti uri kuda kubhabhatijwa. Ndaida kukubvunjisa kudari: ‘Ngenyi uri kuda kuita mudanyu uwu?’” Mubvunjo wo mukuru waisisira maningi. Zvokadi, zvinotidakajisa kuziva kuti, kutenderera pasi pese, gore ngo gore, mazana o vocidoko ari kubhabhatijwa. (Muc. 12:1) Asi, vakuru no vabari vo ciKristu mu ungano, vanoda kuva no gwinyiso ro kuti vocidoko vanobhabhatijwari vari kutema civaringo condhoco  haiwa basi ngo kuda kwavo asi ngo kuti vano thangwe rakavanga ro kuzviita.

² Soko ra Mwari rinokhombija kuti mudanyu wo kujipira no wo kubhabhatijwa unotangisa upenyu hwo kuti mundhu anowana makomborero anobva kuna Jehovha, zve anoteverehwa ndi Sathana. (Mazwi 10:22; 1 Ped. 5:8) Ngo kudaro, vabari vo ciKristu vanotora nguva kuti vajijise vana vavo vazive kuti zvinobatanijenyi kuva mujiji wa Kristu. Kuno vocidoko vacina vabari vo ciKristu, vakuru mu ungano no rudo hwese vanovabesera kuti vazive zvinodikana kuitira kuva muKristu. (Verenganyi Luka 14:27-30, Shanduro yeNyika Itsva.) Mundhu acito atanga kuvaka anodikana kuronga, mukufananavo, kuti mundhu ashandire Jehovha wakagondeka “mbhera pakupejisira,” anodikana kunasirira. (Mt. 24:13) Waro, vocidoko vangaitenyi pacavo kuti vagume pa kutema civaringo co kushandira Jehovha mu upenyu hwavo hwese? Ngatende tivone.

3. (a) Magama a Jesu no a Pedhru ngo pamusoro po kusisira ko rubhabhatijo anoda kurevenyi? (Mt. 28:19, 20; 1 Ped. 3:21) (b) Mubvunjo japi jaticazopopora, zve ngenyi?

³ Uri wocidoko ari kurangarira kubhabhatijwa here? Kana zvakadaro, unofanera kusimbwa! I cidakajiso cikuru kubhabhatijwa inga umwe wo Zvapupu zva Jehovha. Kusiapo izvi, rubhabhatijo unodiwa kuitira kuva muKristu, zve i mudanyu unosisira maningi kuitira kuwana ruponeso. (Mt. 28:19, 20; 1 Ped. 3:21) Zvecivoneka kuti unoda kuzoramba uno cisungo ici cinoitwa ngo mwoyo wese, unodikana kunasirira kuti uite mudanyu uwu. Ngo kudaro zvaizova zvakanaka kurangarira ngo pamusoro po mubvunjo mutatu jingakubesera kuvona kuti wanasiririka here kana kuti haiwa. Mubvunjo jinotevera nga iji: (1) Ndiri mundhu waibva zvakakwana kuti nditeme civaringo ici here? (2) Ndiri kudadi kamare kubhabhatijwa here? (3) Ndinozwisisa kuti kuzvipira kunorevenyi here? Ngatende tipopore mubvunjo iji.

4, 5. (a) Ngenyi anodina kubhabhatijwa asipi mukuruwane basi? (b) Zvinoda kurevenyi ku mukristu kuva wakaibva?

⁴ Bhaibheri arinangi kuti rubhabhatijo i mudanyu unodikana kuitwa basi ngo vaya vakura kana kuti vaguma pa mupira wokuti vanotendehwa ngo mutemo. Pana Mazwi Akangwara  20:11, Baiberi Mazwi Akacena aMwari, panoti: ‘Mwana anozivikanwa ngo zviito zvake, kuti mushando wake wakacena, nokunaka.’ Mundhu ari wocidoko angakwanisa kuzwisisa kuti kuita zvakarungama no kuzvipira kuno Musiki zvinorevenyi. Ngo kudaro, kubhabhatijwa i mudanyu unosisira zve unofanera kuno wocidoko ari kuvonesa kuti waibva zve wajipira kuna Jehovha.​—Mazwi 20:7.

⁵ Zvinoda kurevenyi kuva wakaibva? Kuibva zvinopinda kukura ku nyama. Bhaibheri rinonanga kuti mundhu wakaibva ano simba rake ro kurangarira ‘rakarovejwa kuziva no kukheta bzauxoni nokuti bzakaxata.’ (Heb. 5:14) Ngo kudaro mundhu wakaibva anociziva ciro cakarungama pa meso pa Jehovha zve wakatema civaringo mu mwoyo mwake co kuzvibatisisa. Inga muviyo, aakasiki kukwevejehwa ngo zvakashata; nee aaiti ngo kubvunjwa nguva jese kuti aite zvakanaka. Zvokadi zvinovetehwa kuti wocidoko anobhabhatijwa ave anobatisisa mutemo ja Mwari pikija panonga pacina vabari vake kana vakuruwane vamweni.​—Ezanisiranyi no VaFilipi 2:12.

6, 7. (a) Sananguranyi zvineso zvakasongana na Danyeri paainga ari ku Bhabhironi. (b) Danyeri wakakhombijisa kudini kuva wakaibva?

⁶ Wocidoko angakwanisa kuvonesa kuibva kwakadaro here? Rangariranyi ngo pamusuro po muezaniso wa Dhanyeri unowanika mu Bhaibheri. Iyena kangaije wainga eciaruka paakatohwa pa vabari vake kwenda ku Bhaibhironi. Ngo cibvumbu Dhanyeri wainga ecirarama pakati po vandhu vainga no mavonero akasiyana kamare no ake ngo pamusoro po zvakanaka no zvakashata. Kusiapo izvi, waingazve pa mugariro umweni unonesa: Iyena waitajwa inga mundhu anosisira maningi mu Bhabhironi. Zvokadi, Dhanyeri wainga umwe wo majaha ainga akasanwa kuti ashande pamberi pa mambo! (Dan. 1:3-5, 13) Zvinovoneka inga ku Bhaibhironi Dhanyeri wainga no mukana jaacizivi kumbova najo ku Iziraeri.

⁷ Dhanyeri wakaitisa kudini pamberi po zvese izvi? Kureva kuti wakakwevejehwa ngo zvinodakajisa no zvinoemuja zvo ku Bhabhironi here? Iyena wakatendera kuti zvaimutendeneja zvicinje undhu hwake kana zvimubvisire gonda rake here? Nee padoko. Bhaibheri rinonanga kuti paiinga ari ku Bhabhironi, Dhanyeri “wakaimisa mu mwoyo wake kuti aazojingoresi” ngo ciri cese cainga cakabatana no manamatiro o kunyepa. (Dan. 1:8) Danyeri wakakhombija kuibva kucikakanganiki!

8. Ungajijenyi kubvira ku muezaniso wa Danyeri?

⁸ Ungajijenyi kubva ku muezaniso wa Dhanyeri? Cimwe caungajija nga ici, wocidoko wakaibva anobatisisa zvaanotenda. Iyena aaiti inga hwaivhivhi, uwo unocinja mukhaindi kuti uzwirane no paunonga uri. Iyena aiti inga shamwari ya Mwari naari pa Nyuma yo Umambo asi ari ku cikora wova shamwari yo nyika. Kusiapo kundundihwa ini na ini, iyena anoramba akacijikira pikija paanoejwa gonda rake.​—Verenganyi VaEfeso 4:14, 15.

9, 10. (a) Wocidoko angabesereka kudini ngo kueja kuceukija kuti wakaitisa kudini paakasongana no muejo pa bvaza japereri? (b) Kubhabhatijwa kunorevenyi?

⁹ I zvokadi kuti, akuna wakakwana; vocidoko pomwe no madhodha nguva no nguva vangaposa. (Muc. 7:20) Pikija zvakadaro, kudari uri kurangarira kubhabhatijwa zvaizova zvo ungwaru kujipopora kuti uvone makurire o cido cako cokuda kuzwira mutemo ja Jehovha. Ungajipimisa kudini uvone mavangire o cisungo cako? Jibvunjisei kudari: ‘Ndinozivika inga mundhu anozwira mutemo ja Mwari here?’ Eja kurangarira kuti wakaitisa kudini pawakasongana no muejo pa bvaza japareri. Wakakhombija kuti uno simba ro kurangarira rinodiwa kuitira kusiayanisa cakanaka no cakashata here? Tingati kudini kudari  ukavoniwa inga mundhu anosisira maningi ngo ari wese wo mu nyika ino ya Sathana, kuezana na Dhanyeri? Unokwanisa ‘kupsaka kuziva kuda ka [Jehovha]’ pikija kuda ka Mwari kukahwisana no zvawakapeamira kuita.​—Ef. 5:17.

¹⁰ Ngenyi tinoita mubvunjo iji jakajeka? Ijona jino cinangwa co kuda kukubesera kuvona rubhabhatijo ngo njira yakarungama. Inga zvanangwa pa kutanga, rubhabhatijo unovonesa kuti iwewe waita cigondiso kuna Jehovha kamare. Iwewe unonga wagondisa kuti unozomuda zve unozomushandira ngo mwoyo wese mbhera na rini. (Mc. 12:30) Wese anobhabhatijwa anodikana kutema civaringo co kurarama mukuzwirana no mbhiko yaakaita.​—Verenganyi Mucumaeri 5:3, 4.

11, 12. (a) Mundhu ari kurangarira kubhabhatijwa anodikana kuva no gwinyiso renyi? (b) Zvicinyi zvinozokubesera kuramba uno mavonero akarungama ngo pamusoro po nasiriro ya Jehovha yo rubhabhatijo?

¹¹ Bhaibheri rinonanga kuti vandhu va Jehovha, kubatanija vo cidoko, ‘vaizozvipira ngo mwoyo unoda’ mu basa ra Jehovha. (Ndu. 110:3, Shanduro yeNyika Itsva) Ngo kudaro mundhu anonga ecirangarira kubhabhatijwa anodikana kuva no gwinyiso ro kuti cisungo co kuda kubhabhatijwa ngo cake kamare. Izvi zvingakumbira kuti ujipopore pacako. Ngenyi? Ngo kuti mugariro wako inga wocidoko ungava wakasiyana no wo vamweni. Inga muezaniso zvingaita kuti iwewe wakarehwa pa mbhuri iri mu cokwadi.

¹² Kangaije waano makore no makore wecivona vandhu vazinji vecibhabhatijwa​—vamweni kangaije shamwari jako zve hama jako. Kudari ngo zviri kumuitikira, zvicinyi zvaunodikana kungwarira? Bhasopai kuti utame kuvona rubhabhatijo inga cirovejeso cinoitwa ngo vocidoko vese nguva yavo ikandoguma. Zvicinyi zvaunodikana kuita kuti urambe uno mavonero akarungama ngo pamusoro po nasiriro ya Jehovha yo rubhabhatijo? Ambopsakai nguva yo kumborangarira ngo pamusoro po kuti ngenyi rubhabhatijo unosisira maningi. Zvokadi, unozovona kuti kuno mathangwe mazinji akanaka pa musoro uno no unotevera.

13. Ungazvizivisa kudini kudari cisungo cako co kuda kubhabhatijwa ciri kubva mu mwoyo mwako kamare?

¹³ Kuno makwanja aungashandisa kuti uvone kuti cisungo cako co kuda kubhabhatijwa cinobva mu mwoyo kamare kana kuti haiwa. Inga muezaniso, kudari ngo mwoyo wese uri kuda kubhabhatijwa, izvi zvinozovoneka pa mukumbiro jako. Bvaza jaunoita mukumbiro zve kujeka kwajo kunganasa kukhombija kuti ushamwari hako na Jehovha ngo wo phedo kana kuti haiwa. (Ndu. 25:4) Imwe njira yaanoshandisa Jehovha kuitira kudavira mukumbiro jedu i Bhaibheri. Ngo kudaro, jibvunjisei kudari: ‘Mukumbiro jangu jakajeka zvakadini? Ndinoita jijo yo Bhaibheri yo mundhu ega nguva jese here?’ Kudari uri pa mbhuri yo ciKristu inoita Kunamata ko Mbhuri jibvunjisei kudari: ‘Ndinobesera no mwoyo wese nasiriro yo Kunamata ko Mbhuri here?’ Mupinguro jako ku mubvunjo iji jinozokubesera kuvona kudari cisungo cako co kuda kubhubhatijwa ciri kubva mu mwoyo kamare.

14. Sanangurai musiyano uripo pakujipira no rubhabhatijo.

¹⁴ Vamweni vanganesehwa ngo kuda kusiyanisa kuzvipira no rubhabhatijo. Inga muezaniso, vocidoko vamweni vanonanga kuti vapera kuzvipira asi avaripi kujizwa vakanasirika kuti vabhabhatijwe. Asi izvi zvino musoro here? Kuzvipira kuna Jehovha zvinoda kureva kuti unomushandira kwenda no kwenda. Pakubhabhatijwa mundhu anonga ecikhombija vamweni kuti wazvipira. Ngo kudaro, paunobhabhatijwa unonga wecikhombija pambhene kuti  iwewe wapera kuita pawega mukumbiro wokujipira kuna Jehovha. Ucito wabhabhabijwa, iwewe unodikana kuva no gwinyiso ro kuti unozwisisa kuti kujipira zvinoda kurevenyi.

15. Kuzvipira kunorevenyi?

¹⁵ Ngo magama mashoma, paunopira upenyu hwako kuna Jehovha, iwewe unonga wecijiramba pacako. Unonga wecigondisa kuna Jehovha kuti unozodira kuita kuda kwake pamberi po zvese mu upenyu hwako. (Verenganyi Mateu 16:24, Shanduro yeNyika Itsva.) Mbhiko iri yese inoitwa inodikana kureremejwa, waro zvakadini tikaiitira Jehovha? (Mt. 5:33) Ungakhombijisa kudini kuti zvokadi wajiramba pacako zve wari uri wa Jehovha?​—Rom. 14:8.

16, 17. (a) Ipai muezaniso wo kuti zvinoda kurevenyi kujiramba pacako. (b) Mundhu anojipira, zvokadi kamare anonga acirevenyi?

¹⁶ Inga muezaniso, rangarirai basi shamwari yako yakupa karu. Iyona yakuashija zvavhi perapo yo kubvunja kudari: “Karu iyi ngo yako.” Asi iyona yoengejera yeciti: “Anogara no zvavhi ndini. Anozoifambisa ndini, asipi iwewe.” Waizovona kudini ngo pamusoro po karu iyi? Waizozwa kudini ngo pamusoro po mundhu wakupaya?

¹⁷ Wari rangarirai ngo pamusoro po zvinovetera Jehovha, kuno mundhu wakazvipira kwaari, mundhu wakamubvunja kuti: “Ndiri kumupekeja upenyu hwangu. Ndiri wenyu.” Zvakadini kudari mundhuwo akatanga kutora upenyu huviri kangaije kunomorari ngo cifise-fise no mundhu acirikapi muKristu? Zvakadini kudari akatendera kunghwina basa ricikamutenderi kuita basa ro kucumaera kana kwenda kumusongano zvakakwana? Izvi azvicaizoezana no kupa mundhu karu asi woramba uno zvavhi here? Zvokadi, mundhu anozvipira kuna Jehovha anonga ecinanga kudari: “Upenyu hwangu ngo hwenyu Jehovha. Kudari kukava no kuhwisana pakati po zvomunoda no zvandakapeamira kuita, kuda kwenyu kunozowina​—nguva jese.” Izvi zvinozozwirana no murangariro wa Jesu, uwo wakananga kudari paainga ari pasi pano: “Ngokuti andizivi kuderuka kubva mugore koita kuda kwangu, kaveta kuda kwa wiya wakandituma.”​—Jo. 6:38.

18, 19. (a) Zvakananga Roze na Kristofa, zvinopa kudini muezaniso wo kuti kubhabhatijwa i cidakadijiso cinoviisa makomborero? (b) Unozwa kudini ngo pamusoro po cidakajiso co ku bhabhatijwa?

¹⁸ Zvakajeka kuti kubhabhatijwa i mudanyu unosisira maningi wokuti nee iwewe nee mundhu umweni aabviri kuurerusa. Asi, kuzvipira no kubhabhatijwa i cidakajiso cikuru. Vocidoko vanoda Jehovha zve vanozwisisa kuti kuzvipirira kunorevenyi avathyi kubhabhatijwa; avazvivazi kana kujidemba ngo kutema civaringo co kubhabhatijwa. Imwe hambzaji iri muaruki inodanijwa Roze yakananga kudari: “Ndino rudo na Jehovha, andicaizodakajihwazve ngo kuita zvimweni kuciripi kumushandira. Akuna cisungo cimweni condakaita mu upenyu hwangu cinopinda co kubhabhatijwa.”

¹⁹ Tingativo kudini ngo pamusoro pa Kristofa, wanangwa pa kutanga ko musoro uno? Kureva kuti civaringo cake co kubhabhatijwa no 12 o makore cainga no pacakacijikira here? Kristofa anodakajihwa maningi paanorangarira ngo pamusoro po kujipira kwake no kubhabhatijwa. Iyena wakatanga kushanda inga piyona wo nguva jese paainga no 17 o makore o kubahwa zve paakaita 18 wakagajwa mubatiri anoshandira. Nyamasi uno ari kushanda pa Bheteri. Iyena wakananga kudari: “Rubhabhatijo cakava cisungo cakanaka. Upenyu hwangu hwakazara ngo mudakaro ngo kushandira Jehovha no Sangano rake.” Kudari uri kurangarira kubhabhatijwa, unganasiririsa kudini? Musoro unotevera unozodavira mubvunjo uwu.