Vocidoko—Munganasiririsa Kudini kuitira Kubhabhatijwa?
“Kuti ndiite kuda kwenyu; Mwari wangu, ndinoda kungwarira mupango wenyu.”—NDU. 40:9.
NDUMBO: 51, 58
1, 2. (a) Sanangurai kuti ngenyi rubhabhatijo i mudanyu unosisira maningi. (b) Mundhu acito abhabhatijwa anodikana kuva no gwinyiso renyi, zve ngenyi?
URI wocidoko ari kurangarira kubhabhatijwa here? Kana zvakadaro, uno cidakajiso cikuru cakakuvetera kumbejiyo. Asi, inga zvakanangwa pa musoro wakapera, rubhabhatijo i mudanyu unosisira maningi. Iwona unoimirira kujipira—kwako, uko kuri cigondiso cinosisira maningi co wakaita kuna Jehovha co kuti unozomushandira kwenda no kwenda ngo kudira kuda kwake pamberi po zvese mu upenyu hwako. Ngo iyo ndava, zvinovetehwa kuti ubhabhatijwe basi paunonga wakwanirisa kuti uite zvondhozvo, paunonga uno cido co kubhabhatijwa zve paunonga wecizwisisa kuti kuzvipira zvinoda kurevenyi.
2 Zvakadini kudari ukatama kuva no gwinyiso ro kuti wakanasirira kuti ubhabhatijwe kana kuti haiwa? Kana, zvakadini kudari iwewe uri kuda kubhabhatijwa asi vabari vako vari kuvona kuti unodikana kumbovetera, kangaije mbhera paunonga waano ruzivo ngo pamusoro po mararamiro o ciKristu? Zvicinenyi hazvo, ucadovora mwoyo. Kusiapo, shandisai mukana uwu kuti uenderere mberi mbhera ukwanise kubhabhatijwa pacito papera nguva yakareba maningi. No cinangwa ici mu murangariro, rangarirai kuti ungaitisa kudini kuti ugume pa (1) kuzvisisa zvaunotenda, (2) kusotesesa zviito zvako, zve (3) kuengejera kubongesera kwako Jehovha.
ZVAUNOTENDA
3, 4. Vocidoko vangajijenyi ngo muezaniso wa Timoti?
3 Rangarirai kuti ungadavirisa kudini mubvunjo iji: Ngenyi ndinodavira kuti Mwari ariyo? Icinyi cingandithembesa kuti Bhaibheri i Soko ra Mwari rakafemehwa? Ngenyi ndinovona kuti kurarama mukuzwirana no ndhungamiriro ja Mwari ngo pamusoro po mufambiro, ngo zviri nane kupinda kutora upenyu wo nyika? Mubvunjo iji ajizivi kuitwa kuti jikuviisire kukana-kana mu murangariro mwako. Kusiapo izvo, ijona jingakubesera kutevera mbhangiro yo mupostori Pauro, yo kuti: “Kuti muzivisise ngo kwapi kuda kwa Mwari, ngo capi cauxoni, cinodakaja no cakaperera.” (Rom. 12:2) Asi ngenyi maKristu o ku Roma aidikana kuzivisisa ciro caainga akatendera kare?
4 Vonai umwe muezaniso wo mu Bhaibheri. Timoti waiziva Matahwa zvakanaka. Iyena wakava anojijiswa “kubva udoko” hwake ndi mai na mbiya wake. Kunyazi zvakadaro, Pauro wakakhohomeja Timoti kuti: “Vangai pa bzese bzo wakajija no kudavira kuti bziri bzokadi.” (2 Tim. 3:14) Mukuwirirana no rimweni bhuku, gama ro kutanga rokuti “kudavira” rinoreva kuti “kukhohwa no kuva no gwinyiso ro kuti ciro cakati ngo cokwadi kamare.” Timoti wakatora cokwadi wociita cake. Iyena wakadavira haiwa ngo ndava ya mai kana kuti mbiya wake vakamubvunja kuti adavire, asi wakadavira ngo ndava yo kuti wakarangarijisisa pacake ngo pamusoro paco, perepo wokhohwa ndicona.—Verenganyi VaRoma 12:1, Shanduro yeNyika Itsva.
5, 6. Kudari zvecikwanisika, ngenyi zvakanaka kujija kushandisa ‘simba ro kurangarira’ kubvira mu udoko hwako kamare mu upenyu?
5 Hino iwewevo keni? Kangaije waano zivo yo Bhaibheri ko nguva yakareba. Kunyazi zvakadaro, ngenyi aupsaki kupopora ngo phedo mathangwe anokuita kuti ukhohwe kuti zvowakajijaya ngo zvokadi kamare? Izvi zvicazovangisa kukhohwa kwako zve zvicazokubesera kuti utame kukwevejehwa ngo vadoni, ngo zvinotokotesa nyika ino, pikija ngo mavonero ako kamare.
6 Zvecikwanisika kujija kushandisa ‘simba ro kurangarira’ kubvira mu udoko hwako kamare, zvicazokunasirira kuti upe mupinguro jakanasa kurangarihwa vadoni vako pavanoita mubvunjo jakadari inga iji: ‘Ngenyi uno gwinyiso ro kuti Mwari ariyo? Ngenyi Mwari wo rudo anoregerera kuti kuve no ushati? Ngenyi unothemba kuti Mwari kubvira kare no kare andoriyo?’ Kudari ukava wakanasirika, mubvunjo iji ajizorembesi gonda rako, asi jinoengejera cido co kuti uvangisire kuita jijo yo mundhu ega.
7-9. Sananguranyi kuti mutevejwana wokujija wokuti “Bhaibheri Rinombodzidzisei Chaizvo?” unowanika mu Interneti, ungakubesera kudini kuti uvange pa zvaunotenda.
7 Kuvangisira pa kujija ko mundhu ega zvicazokubesera kuva wakanasirira kudavira mubvunjo, auzovi wecikakana, zve unozovangisa kuthemba kwako. (Mait. 17:11) Tino mutengo wakati kuti wo mathurusi angakubesera kuita zvondhozvo. Vamweni vanovona zvecibesera kushandisa brushura rinoti: A Origem da Vida—Cinco Perguntas Que Merecem Resposta pomwe no bhuku rino musoro unoti Existe um Criador Que Se Importa com Você? Mukuengejera izvi, vocidoko vazinji, vari kuwana mudakaro no kubesereka ngo kushandisa divi ro mu internet rinoti “Bhaibheri Rinombodzidzisei Chaizvo?” Mutevejwana uwu wo ndhungamiriro kuitira kujija unowanika mu jw.org. Nghwinanyi ngo panoti: ZVINODZIDZISWA NEBHAIBHERI. Ndhungamiriro imwe nga imwe iri pa mutevejwana uwu yakanasirihwa kuitira kuvangisa kuthemba kwako ngo pamusoro po shwiro jo mu Bhaibheri.
8 I zvokadi kuti iwewe waakuziva zviri mu Bhaibheri, ngo kudaro, ungatokwanisa kudavira ngo kukasika mubvunjo jinowanika mu ndhungamiriro jo kujija. Asi mubvunjo ngo wokuti: Ngenyi unokhohwa kuti mupinguro jako ngo jokadi kamare? Ndhungamiriro jo kujija jinokupa mukana wo kurangarijisisa ngo pamusoro po vhesi jo mu Matahwa zve jinokupavo mukana wo kutara zvaunorangarira ngo pamusoro po vhesi jondhojo. Izvi zvingakubesera kunasirira masanangurire aungaita zvitendhwa zvako zvakacijikira mu Bhaibheri kuno vamweni. Divi ro mu Interneti ro kuti “Bhaibheri Rinombodzidzisei Chaizvo?” riri kubeseresa vocidoko vazinji kuti vavange pa zvavanotenda. Kudari uno mukana wo kushandisa divi iri, ngenyi aurishandisi pa urongwa hwako hwo jijo yo mundhu ega?
9 Ngo kuva wakavanga pa zvaunotenda, unokwanisa kuita mudanyu unosisira kuti ubhabhatijwe. Imwe hambzaji iri kuaruka yakananga kudari: “Ndicito ndatema civaringo co kuda kubhabhatijwa, ndakajija Bhaibheri ndovona kuti ici ngo ciara co kadi-kadi. Zve njiku ngo njiku, kukhohwa uku kuri kuramba kwecivanga.”
ZVIITO ZVAKO
10. Ngenyi zvinovetehwa kuti mundhu wakabhabhatijwa ave no zviito zvinozwirana no gonda rake?
10 Bhaibheri rinonanga kudari: “Rutendo: hukatama bziito, hwakafa kamare.” (Jak. 2:17) Kudari kukhohwa kwako kwakavanga kamare, zviito zvako zvinozokhombija zvega. Zviito zvo mushovonyi? Bhaibheri rinonanga ngo pamusoro po ‘mabasa akacena o mufambiro pomwe no mabasa o kuzvipira kuna Mwari.’—Verenganyi 2 Pedru 3:11, Shanduro yeNyika Itsva.
11. Sanangurai kuti magama okuti “mabasa akacena o mufambiro” anorevenyi.
11 Kuti ukhombije ‘mabasa akacena o mufambiro’ unodikana kuva wakacena pa mufambiro wako. Zviri kukufambira kudini pa divi iri? Inga muezaniso, rangarirai ngo pamusoro po mweji mutandhatu jakapera. Wakakhombijisa kudini kuti ‘simba rako ro kurangarira’ rakarovejwa kuitira kusiyanisa cakanaka no cakashata? (Heb. 5:14, Shanduro yeNyika Itsva) Uri kuceukija bvaza iri yese yowakakwanisa kucijikira pa muejo kana pa kuvangirijwa ngo vadoni here? Mufambiro wako paunonga uri ku cikora unonasa kukhombija kuti uno gonda here? Unobvikira gonda rako here, kana kuti unoeja kujibvenganisa no vajiji doni vo kucikora ngo kuthya kushohwa? (1 Ped. 4:3, 4) I zvokadi kuti akuna mundhu wakakwana. Pikija vaya vari kushandira Jehovha ko nguva yakareba, nguva jimweni vangatothyavo kuvonesa gonda ravo pambhene. Asi, mundhu wakazvipira kuna Jehovha anozojikuja ngo kubvikira zina ra Mwari, zve anozokhombija izvi ngo mufambiro wake.
12. Ngo api amweni “mabasa o kuzvipira kuna Mwari,” zve unodikana kumavona kudini?
12 Tingativo kudini ngo pamusoro po “mabasa o kuzvipira kuna Mwari”? Iwona anobatanija mabasa ako mu ungano, akadari inga kuva pa musongano zve kuita basa ro kucumaera. Anobatanijazve mabasa amweni okumujimu aunoita acikavoniwi ngo vamweni, akadari inga kuita mukumbiro zve no jijo yo mundhu ega. Mundhu wakapira upenyu hwake kuna Jehovha aazoiti mabasa aya mukuda kukwanirisa basi. Mukusiana, iyena anovonesa kuva no murangariro wakadari inga wa Mambo Davidi, uwo wakati: “Kuti ndiite kuda kwenyu; Mwari wangu, ndinoda kungwarira mupango wenyu mukati mu mwoyo wangu.”—Ndu. 40:8.
13, 14. I thurusi rapi ringakubesera kuva no “mabasa o kuzvipira kuna Mwari,” zve vocidoko vamweni vakabesereka kudini ngo thurusi rondhoro?
13 Kuitira ukwanise kuita izvi kuno divi rinowanika pa mapheji 308 zve 309 mu bhuku Mibvunzo Inobvunza Vechiduku—Mhinduro Dzinoshanda, Bhuku 2. Divi rondhoro rino ndau yo kuti utare mupinguro jako jo mubvunjo iji: “Mukumbiro jako jakajeka zvakadini, zve ijona jinokhombijisa kudini rudo hwako kuna Jehovha?” “Zvicinyi zvaunobatanija pa jijo yako yo mundhu ega?” “Unoenda koocumaera pikija vabari vako vacikaendi here?” Divi iri rino ndau yaungatarira zvauri kuda kuvangisira kuita kuti uitise nane mukumbiro jako, jijo yako pomwe no basa rako ro kucumaera.
14 Vocidoko vazinji, avo vari kurangarira kubhabhatijwa vari kubesereka maningi ngo kushandisa thurusi iri rinosisira maningi, rinowanikari mu bhuku Mibvunzo Inobvunza Vechiduku—Mhinduro Dzinoshanda, Bhuku 2, mapheji 308 zve 309. Imwe hambzaji yo cidoko, inodanijwa Tilda, yakati: “Ndakashandisa divi iro kuti nditarire zvandaidadamira. Ndakakwanirisa cimwe nga cimwe candaidadamira, zve nopapera gore rimwe ndainga ndanasiririka kuti ndibhabhatijwe. ” Imwe hama yo cidoko inodanijwa Patricki yakabeserekavo ngo njira yondhoyo. Iyona yakati: “Ndaizviziva zvandaidadamira, asi kuzvitarira, kwakandibesera kuti ndishande ngo simba kuitira kuti ndizvikwanirise.”
Unozoenderera mberi wecishandira Jehovha kunyazi vabari vako vacikazviiti here? (Vonanyi ndima 15)
15. Sanangurai kuti ngenyi kuzvipira kunodikana kuva cisungo co mundhu ega.
15 Umwe wo mubvunjo jinobaya mwoyo jinowanika pa thurusi rondhoro nga uwu: “Unozoshandira Jehovha pikija shamwari jako zve no vabari vako vakakurambisa kuita zvondhozvo here?” Ucadokanganwa kuti, inga muKristu wakazvipira no kubhabhatijwa, iwewe unozojiimirira wega pamberi pa Jehovha. Basa raunomuiitira arinenyi no vamweni—nee no vabari vako. Mabasa ako akacena o mufambiro pomwe no mabasa ako o kuzvipira ko umwari anovonisa kuti watora cokwadi kuita cako zve uri kuenderera mberi kuti ubhabhatijwe.
KUBONGESERA KWAKO
16, 17. (a) Icinyi cinodikana kukwevejera mundhu kuti ave muKuristu? (b) Mungabesereka kudini ngo muripo waezanisihwari?
16 Mwanarume umweni waiziva ushoni mutemo wakabvunjisa Jesu kudari: “Ngowapi mupango mukuru wo Mutemo?” Jesu wakamudavira kuti: “Unozodisa [Jehovha] Mwari wako, ngo mwoyo wako wese, ngo mwiha wako wese, ngo hwiru hwako hwese.” (Mt. 22:35-37) Ngo magama aya Jesu wakakhombija kuti cinodikana kukwevejera mundhu kuti aite mabasa o ciKristu zve abhabhatijwe i rudo hwake hwo mwoyo wese kuna Jehovha. Imwe yo njira jakanaka jingakubesera kuti ukurise rudo hwako kuna Jehovha ngo yo kurangarijisisa ngo pamusoro po cipo cikuru capekeja Jehovha—co muripo wo kujipira wa Mwana wake. (Verenganyi 2 VaKorinto 5:14, 15; 1 Johani 4:9, 19.) Kurangarira ngo pamusoro po muripo pomwe no zvaunoreva kwauri zvicazokukwevejera kuti uve anobongesera ngo ndava yawo.
17 Kubongesera kwako ngo pamusoro po muripo kungaezanisihwa kudari: Amborangarirai kuti umwe mundhu wakuponesa pawainga wecindondomera mu kumwa. Pasure po kuponeswa waizotomuka basi wotopinda kumuzi kocinja, perepo wotogara hako, wokanganwa zvakuitiraya mundu wiana here? I zvokadi kuti haiwa! Iwewe waizojizwa kuti uno zigava no mundhu wakakuponesaya. Zvokadi ngo zvo kuti naacainga mundhu wiana aucaizopona! Itusu tino zigava rakakura na Jehovha Mwari pomwe na Jesu. Noucainga muripo, umwe nga umwe wedu, ngo manangiro amweni, waizondondomera mu cishaishi no rufu. Asi, ngo ndava yo ciito ici co rudo, nyamasi tino vetero icikaezanisihwi yo kupona kucikaperi mu paradhiso pasi pano!
18, 19. (a) Ngenyi audikani kuthya kuva wa Jehovha? (b) Kushandira Jehovhakuri kudakajisa kudini upenyu hwako?
18 Unobonga here izvo Jehovha zvakakuitira? Kana zvakadaro, zvinofaneradi kuti upire upenyu hwako kuna Jehovha perapo wobhabhatijwa. Ceujai kuti, kuzvipira zvinobatanija kuita mbhiko inosisira kuna Jehovha yokuti unoda kuita kuda kwake mbhera narini, azvinenyi zvicinyi zvinozoitika. Unodikana kuthya kuita cisungo cakadaro here? Haiwa! Zivai kuti Jehovha anoda kuti zvikufambire ushoni, zve iyena “anopa mupocero vandhu vanomupsanga.” (Heb. 11:6) Kuzvipira kwako kuna Jehovha zve wobhabhatijwa azvirevi kuti upenyu hwako woda kushatisisa. Mukusiapo, kushandira Jehovha kunoita kuti upenyu hwako unakisise. Imwe hama yakababatijwa, ino makore 24 okubahwa yakananga kuti: “Kangaije ndaizova mundhu anozwisisa pandaizonga ndakura, asi kuita cisungo co kuzvipira kuna Jehovha cakandijivirira kuti nditame kupsaka zviro zvo nyika ino.”
19 Jehovha wakasiyana kamare na Sathana, uwo anoda kujidakajisa pacake basi. Sathana aapi mupfupo wokwenda no kwenda kuno vari ku divi rake. Zvokadi waizozvikwanisisa kudini? Iyena pacake aana masoko akanaka aangavetera, nee vetero haana. Angakupekejesa kudini ciro ciciripi cake? Sathana zvaangakupa basi i vetero iciko, yakaezana no yaari kuvetera iyena, iciko!—Ap. 20:10.
20. Wocidoko angaitenyi kuitira kuti aenderere mberi mbhera agume pa kuzvipira zve wo bhabhatijwa? (Vonanyi bhokiso rinoti “ Zvingakubesa kuti Ukure Mumujimu.”)
20 Zvakajeka kuti, kupira upenyu hwako kuna Jehovha iciro cakapinda kunaka. Wanasirira here kuti utore mudanyu uwu? Kana zvakadaro, ucadohwirira sure. Ngo divi rimweni, kudari uciri kuda nguva yo kumbonasirira, shandisa mazano ari pa musoro uno kuti urambe wecienderera mberi. Pauro wakatarira ku vaFiripi kuti: “Zvicinenyi hazvo, kugumira patakagumira tecienderera mberi, ngatirambe tecifamba zvakanaka ngo maitiro ondhoo.” (Fil. 3:16) Kudari ukateverera mbhangiro iyi, ngo kukasika unozova no cido co kupira upenyu hwako kuna Jehovha zve wobhabhatijwa.
