1. Jehovha wakatisika no mugariro japi jakasiyana no jo zvisikwa zvimweni?

PAAKATISIKA, Jehovha wakatipa mugariro jakasiyana no jo zvisikwa zvimweni. Wakatipa kurangarira, uko kunotibesera kutonga ndhango jedu no kuronga zvo kumbeji. (Mazwi Akangwara 2:11) Wakatipa simba kuti tikwanise kuita zvatinoronga no zvatinodadamira. (VaFilipi 2:13) Wakatipavo hana, inotibesera kuzwisisa kuti ici cakanaka kana kuti cakashata. Hana yedu inotibesera kutiza kushaisha no kujirungamisa patinoposa.—VaRoma 2:15, Shanduro yeNyika Itsva.

2. Jehovha anovetera kuti tishandisise kudini mugariro jaakatisika najo?

² Jehovha anovetera kuti tishandise mugariro jaakatisikaya najo ngo maitiro akanaka. Ngenyi? Ngo kuti ano rudo nesu zve anoziva kuti tinozova no mudakaro kudari tikashandisa zvipo zvaakatipa. Inga muezaniso, mu Matahwa o ciHebheru, tinoverenga kudari: “Murangariro yo mundhu ano hwiru, inozisa  upfumi” zve “Bzese bzo unokwanisa kuita ngo nyara jako, bziitei; ngokuti mu iba, mo unoenda, amuna basa, murangariro, nokuti kuziva no ungwaru.” (Mazwi Akangwara 21:5; Mucumaeri 9:10) Mu Matahwa o ciGiriki tinoverenga kudari: “Ngokudaro, tino nguva, ngatiitire uxoni vandhu vese,” zve “umwe nga umwe, ngo bzipuo bazaakaaxira, ngaabatire vamweni.” (VaGalàsia 6:10; 1 Pedru 4:10) Zvakajeka kuti Jehovha anoda kuti tiite zvatinokwanisa kuti tijibesere pomwe no kubesera vamweni.

3. Ngo zvapi zvaticikakwanisi kuita?

³ Jehovha anoda kuti tishandise mugariro jaakatipa, asi anozivavo kuti kuno zvaticikakwanisi kuita. Inga muezaniso, atikwanisi kubvisa kutama kukwana, cishaishi zve rufu. (1 Majimambo 8:46) Zve atingakwanisi kuvonerera vamweni, ngo kuti mundhu umwe nga umwe wakasujunuka kukheta zvaanoda. Zve azvinenyi dangani zivo yakadini yatinayo, atizogumi pakuva no zivo ina Jehovha.—Isaia 55:9.

4. Pa musoro uno tinozojijenyi?

⁴ Nguva jese tinodikana kutendera kuti Jehovha atitungamirire, tecithemba kuti anozotibesera no kutiitira zvaticikakwanisi kuita tega. Asi Jehovha, anodavo kuti tirangarire zvatingaita kuti titonge zvineso zvedu no kubesera vamweni. (Verenganyi Nduyo 37:3.) Tinodikana kuita zvese izvi: ‘Kugonda Jehovha toita zvakanaka.’ Tinodikana ‘kuita zviro takagondeka.’ Tingazviitisa kudini? Ngativone muezaniso wa Nowa, Dhavhidhi, pomwe no vashandiri vamweni va Mwari vakagondeka no  kuthemba Jehovha. Tinozovona kuti kwainga no zvovacaikwanisa kuita asi vakaramba vakasotesesa pa zvavaikwanisa kuita.

5. Sananguranyi magariro ainga na Nowa.

⁵ Nowa wakararama mu nyika yainga ‘yakazara ngo hondo [kana ugevenga]’ no uhure. (Genesi 6:4, 9-13) Pikija Nowa waiziva kuti Jehovha waizogumisira ngo kuparaja nyika iyo yakashata, iyena waisuruvara ngo zvaiita vandhu. Pa mugariro wakadaro, Nowa wakaziva zvaacaikwanisa kuita, asi wakazivavo kuti kwainga no zvaaikwanisa kuita.

6, 7. (a) Ngozvapi zvaacaikwanisa kuita Nowa? (b) Kuitisa kudini tiri pa mugariro wakadari inga wa Nowa?

⁶ Zvaacaikwanisa kuita Nowa: Pikija Nowa, ngo kugondeka kwese wakacumaera masoko a Jehovha okungwaja, iyena aacaizokwanisa kuvangirija vandhu kuti vamatendere. Zve aacaikwanisa kukurumija kuviya ko Ndambi. Iyena waidikana kuthemba kuti Jehovha waizokwanirisa cigondiso Cake co kupeja ushati, ecithemba kuti Mwari waizozviita pa nguva kwayo kamare.—Genesi 6:17.

⁷ Itusuvo tiri kurarama mu nyika yakazara ngo ushati, yatinoziva kuti Jehovha wakagondesa kuiparaja. (1 Johani 2:17) Asi nguva iyi icito yaguma, itusu atingakwanisi kuita kuti vandhu vatendere ‘Vangeri iri ro Umambo.’ Zve atingakwanisi kuita ciri cese kuti ‘dambujiko guru’ ritange ngo kukasika. (Mateu 24:14, 21) Inga ndi Nowa, tinodikana kuva no gonda rakakwana, tecithemba  kuti Mwari ari kuda kupeja ushati hwese sambiri pano. (Nduyo 37:10, 11) Tinokhohwa kuti Jehovha aazotenderi kuti ushati hurambe huripo, zve anozohupeja pa njiku yaakatema kuzviita kamare.—Habakuki 2:3.

8. Nowa wakasotesesenyi? (Vonanyi pikica yo kutanga.)

⁸ Zvaaikwanisa kuita Nowa: Kusiyapo kuramwa ngo ndava yo kukonehwa zvimweni, Nowa wakaramba akasotesesa zvaaikwanisa kuita. Nowa, ngo kugondeka kwese wakacumaera masoko o kungwaja a Jehovha. (2 Pedru 2:5) Basa iri rakamubesera kuramba ano rutendo hwakavanga. Kusiyapo basi kucumaera, iyena wakateverera ndhungamiriro ja Jehovha pa kuvaka arka.—Verenganyi Vaheberi 11:7.

9. Tingatevejeresa kudini muezaniso wa Nowa?

⁹ Inga ndi Nowa, tiri kuramba takabatikana ‘mu basa ra Tenji.’ (1 VaKorinto 15:58, Shanduro yeNyika Itsva) Inga muezaniso, tingava takabatikana mu basa ro kuvaka no kunasirira Nyumba jo Umambo no jo Magungano, kujipira pa kubesera pa magungano o mutundhu no o ndharaunda, kana kushandira pa hofise yo cine kana cine ro kusanduja riri ndhambo no hofise yo cine. Zvinosisira maningi ngo zvo kuti tiri kuramba takabatikana mu basa ro kucumaera, rinovangisa vetero yedu yo kumbeji. Hambzaji imweni yakagondeka yakananga kuti painobhuya no vamweni ngo pamusoro po makomborero o Umambo hwa Mwari, inozwisisa kuti vandhu avana no vetero iri yese hayo zve vari kuvona kuti zvineso zvavo azvizomboperizve. Mukufanana no hambzaji yondhoyo, itusu tino vetero, zve inovanga maningi patinoibvunja vamweni. Vetero iyi inotibesera kuramba tiri mu gwanja ro ku upenyu!—1 VaKorinto 9:24.

10. Sananguranyi zvakaitika na Dhavhidhi.

¹⁰ Mambo Dhavhidhi wainga mundhu wakagondeka, zve Jehovha waimuda maningi. (Maitiro o Vapostori 13:22) Pikija zvakadaro, Dhavhidhi wakahura na Bhate-Shebha. Ici cainga cishaishi cikuru. Zvakazonyanya kushata paakaeja kufisa cishaishi ici woronga mazano o kuuraisa Uria, mwamuna wa Bhate-Shebha ku hondo. Dhavhidhi wakatumira karata yainga no ndhungamiriro jo kumuuraya na iyenazve Uria. (2 Samueli 11:1-21) Zvishaishi zva Dhavhidhi, zvakatozozika. (Marco 4:22) Pazvakaitika, Dhavhidhi wakaitenyi?

11, 12. (a) Pasure po kushaisha, Dhavhidhi aacaizokwanisa kuitenyi? (b) Jehovha anozoitenyi kudari tikakhauya?

¹¹ Zvaacaikwanisa kuita Dhavhidhi: Dhavhidhi aacaizokwanisa kuhwirija sure zvaainga aita. Zvokadi, iyena waizotambujika ngo muviyo jo cishaishi cake mu upenyu hwake hwese. (2 Samueli 12:10-12, 14) Ngo iyo ndava waidikana kuva no rutendo. Waidikana kuthemba kuti, kuva kwake anokhauya kamare, Jehovha waizomuregerera womubesera kucungirira muviyo jo zviito zvake.

 ¹² Zvecivoneka kuti atizivi kukwana, tese tinoshaisha. Asi zvishaishi zvimweni zvakashatisisa kupinda zvimweni, zve mu nguva jimweni atikwanisi kuzvipeja. Nguva jimweni tingatotambujika ngo muviyo jo zviito zvedu. (VaGalàsia 6:7) Asi tinothemba cigondiso ca Mwari co kuti kudari tikakhauya, iyena anozotibesera patinonga tecihwisana no zvineso, pikija zvineso zvondhozvo zviri kuviiswa ngo kuposa kotakaita.—Verenganyi Isaia 1:18, 19; Maitiro o Vapostori 3:19.

13. Dhavhidhi wakamusijirazve kudini ushamwari hwake na Jehovha?

¹³ Zvaaikwanisa kuita Dhavhidhi: Dhavhidhi waida kumusijirazve ushamwari hwake na Jehovha. Wakazviitisa kudini? Iyena wakatendera kuti Jehovha amubesere. Inga muezaniso, iyena wakadavira kupangihwa kwaakaitwa ndi Natani muporofita wa Jehovha. (2 Samueli 12:13) Dhavhidhi wakaitazve mukumbiro kuna Jehovha zve wodekeca zvishaishi zvake, ecikhombija kuti iyena waidadi kamare kuwana unyasha hwa Jehovha. (Nduyo 51:1-17) Kusiyapo kuva no mazwiro o kunyiswa ngo kujipa ndava, Dhavhidhi wakajijira ngo zvishaishi zvake. Iyena aazivi kuzoitazve zvishaishi zvikuru zvondhozvo. Papera makore, iyena wakafa ari mundhu wakagondeka, zve Jehovha aciri kumuceukija.—Vaheberi 11:32-34.

14. Tingajijenyi ngo muezaniso wa Dhavhidhi?

¹⁴ Tingajijenyi ngo muezaniso wa Dhavhidhi? Tikawira mu cishaishi cikuru, tinodikana kukhauya ngo mwoyo kamare, todekeca cishaishi cedu kuna Jehovha zve tokumbira kuregerehwa. (1 Johani 1:9) Zve tinodikana kubvunja vakuru, ngo kuti ivona vangatibesera kuwanazve ushamwari hwedu na Jehovha. (Verenganyi Jakobo 5:14-16.) Patinotendera besero ra Jehovha, tinovonesa kuti tinothemba cigondiso cake co kutiregerera. Kusiyapo izvo, tinodikana kujija ngo zvishaishi zvedu zve toramba tecishandira Jehovha ngo kuthemba kwese.—Vaheberi 12:12, 13.

15. Tingajijenyi ngo muezaniso wa Ana?

¹⁵ Kangaije makamborangariravo ngo pamusoro po vashandiri vamweni vaigondeka vakatahwa mu Bhaibheri, vakagonda Jehovha voita zvovaikwanisa pavainga mu mugariro jinonesa. Inga muezaniso, kwakava no nguva yo kuti Ana aacaikwanisa kuva no mwana. Apana caaizoita kuti acinje mugariro uwu. Asi wakathemba kuti Jehovha waizomutondhoja. Ngo kudaro Ana wakaramba ecienda konamata ku tabhernake no kuita mukumbiro kuna Jehovha, ecimubvunja mazwiro ake. (1 Samueli 1:9-11) Muezaniso wakanaka zvakadini kwatiri! Patinonga tecineseka mu muviri kana zvineso zvimweni zvaticikwanisi kucinja, tinokhandira kuthimwa-timwa kwedu kuna Jehovha perepo tothemba kuti iyena anozotikorondha. (1 Pedru 5:6, 7) Zve tinoita zvatinokwinisa kuti tibesereke  ngo musongano jo ciKristu no urongwa humweni hunoizwa ngo sangano ra Jehovha.—Vaheberi 10:24, 25.

16. Vabari vangajijenyi ngo muezaniso wa Samueri?

¹⁶ Tingativo kudini ngo vabari vakagondeka vano vana vasiya kushandira Jehovha? Muporofita Samueri aacaikwanisa kuvangirija vana vake kuti varambe vakagondeka kuna Jehovha. (1 Samueli 8:1-3) Iyena wakasiya shwiro iyi mu nyara ja Jehovha. Asi, Samueri wakaita zvaiikwanisa kuti arambe akagondeka kuna Mwari no kudakajisa Baba wake vo mugore. (Mazwi Akangwara 27:11) Nyamasi uno, vabari vazinji vo ciKristu vari pa mugariro wakafanana. Ivona vanothemba kuti kudari inga baba vakanangwa pa mufananijo wa Jesu wainga no mwana wakapanduka, Jehovha nguva jese wakanasirira kuitira kuashira vashaishi vanokhauya. (Luka 15:20) Wari uno, vabari vangaramba vakagondeka kuna Jehovha, no vetero yo kuti muezaniso wavo unozokwevejera vana vavo kuti vahwirire kwaari.

17. Ngenyi muezaniso wo noni unotivangisa?

¹⁷ Muezaniso umweni ngo wo noni yainga murombo, yo mu njiku ja Jesu. (Verenganyi Luka 21:1-4.) Iyona aicaizokwanisa kuita ciri cese kuti icinje ushati waitwa mu temberi, zve aicaikwanisa kucinja mugariro wayo wo kuva murombo. (Mateu 21:12, 13) Asi kugonda kwayo Jehovha kwakaikwevejera kuti ibesere kunamata kokadi-kadi. Iyona yaikova zve yakapira “mukuruzado muviri,” pikija aicaingazve no mare imweni. Mwanakaji uwu wakagondeka, wakakhombija kuti waigonda Jehovha zvakakwana. Waiziva kuti kudari akadira pakutanga basa ra Jehovha, iyena waizomupekeja zvinodiwa. Ngo maitiro akafanana, tinothemba kuti kudari tikadira Umambo hwa Mwari pa kutanga, Jehovha anozotipa zvinodiwa zvedu.—Mateu 6:33.

18. Ipanyi muezaniso wo imwe hama yainga no mavonero anovangisa.

¹⁸ Nyamasi uno, uzinji wo hama no hambzaji jedu jiri kukhombija ngo maitiro akafanana kuti jinogonda Jehovha ngo kusotesesa pa zvajinokwanisa kuita, haiwa zvojicikakwanisi kuita. Rangariranyi ngo pamusoro po hama imweni inodanijwa Malcolm, yakaramba yakagondeka mbhera kufa kwayo mu gore ro 2015. Iyona no mukaji wayo, vakava no mukuvo jinodakajisa no jinonesa pavainga vecishandira Jehovha ko makore akawanda. Hama iyi yakananga kudari: ‘Nguva jimweni upenyu ahuthembesi, hunocinja-cinja, hunotonesa kamare kuhwisana nahwo. Asi Jehovha anokomborera vanomugonda.’ Ngo rapi zano rakapa hama Malcolm? Ivona vakati: ‘Itanyi mukumbiro kuti murambe meciita zviri zvese zvamunokwanisa mu basa ra Jehovha mbhera panopera simba renyu. Sotesesanyi pa zvamunokwanisa kuita, haiwa pa zvamucikwanisi kuita.’ *—Vonanyi masoko o pasi.

19. (a) Nyenyi vhesi yo gore ro 2017 yakafanera kamare? (b) Imwimwi munozoshandisa kudini vhesi yo gore ro 2017 mu upenyu hweyu?

¹⁹ Nyika ino iri ‘kuenderera mberi no uxaixi,’ ngo kudaro tingavetera kuva no zvineso zvakawanda. (2 Timoti 3:1, 13) Ngo iyo ndava, wari asipi nguva yo kutendera kuti zvineso zvedu zvitinyise. Kusiyapo izvo, tinodikana kugonda kamare Jehovha, tosotesesa pa zvatinokwanisa kuita. Ngo zvinoitisa kuti vhesi yedu yo gore ive yakafaneya kamare, iyona inoti: ‘Gondai [Jehovha], itai zvakanaka’!—Nduyo 37:3.