1, 2. Ngenyi Mwari wakaramba Sauri? (Vonanyi pikica yo kutanga.)

JEHOVHA paakasana Sauri kuti ave mambo, Sauri wainga mundhu anotendera zvaari. (1 Samueli 9:1, 2, 21; 10:20-24) Asi pakupera kugajwa umambo, wakatanga kuita zvaacaitendehwa. Bvaza imweni, mazana o vaFiristi akavia kohwa no vaIziraeri. Muporofita Samueri wainga akabvunja Sauri kuti waizoviya koitira mupiro Jehovha. Asi, Samueri acito aguma, vaIziraeri vakatanga kuthya zve uzinji hwavo vakatanga kupinda. Sauri wakava anotama kusengerera, zve kusiyapo kuvetera Samueri, iyena wakaita mupiro ambhwine. Sauri aacaitendehwa kuita izvi, zve Jehovha aazivi kudakara ndizvona.—1 Samueli 13:5-9.

² Samueri paakaviya, wakamuvereketera ngo kutama kwake kuzwira Jehovha. Asi Sauri aazivi kuvona kuti wainga aita zvakashata. Wakatoeja kujiinikira, wotopa ndava Samueri ngo kushaisha cake. (1 Samueli 13:10-14) Kubvira pondhopo kwenda mberi, Sauri wakaita zviro zvizinji zvimweni zvaikhombija kujikuja. Ngo kudaro Jehovha wakamuramba inga mambo. (1 Samueli 15:22, 23) Upenyu hwa Sauri hwakatanga ushoni  asi hwakazopejisira hwashata.—1 Samueli 31:1-6.

3. (a) Vandhu vazinji vanovona kudini ngo pamusoro po kutendera zvavari? (b) Mubvunjo japi jatinozodavira?

³ Vandhu vazinji nyamasi uno vanovona kuti zvinoitika kutama kutendera zvavari asi voramba vecibudirira mu upenyu kana pa basa ravo. Ivona vanojikuja ngo kurangarira kuti vakanaka maningi kupinda vamweni. Inga muezaniso, umwe muiti wo mutambo naari wo zvomatongehwe o nyika, wakananga kudari: ‘Magama o kuti kutendera zvauri aashandi kwandi, zve ndinovona kuti aazotoshandizve narini.’ Waro ngenyi, zvinosisira maningi kuti maKristu aatendere zvaari? Kutendera zvauri i cinyi, zve asipi cinyi? Pa musoro uno, tinozodavira mubvunjo iji. Zve pa unotevera, tinozovona kuti tingaitisa kudini kuti tirambe tiri vandhu vano mugariro wo kutendera zvatiri pikija pazvinonga zvecinesa kuita kudaro.

4. Zvinonangenyi kujikuja [kana kuita zvaticikatendehwi]?

⁴ Bhaibheri rinokhombija kuti kujikuja [kana kuita zvaucikatendehwi] kunohwisana no kutendera zvatiri. (Verenganyi Mazwi Akangwara 11:2.) Dhavhidhi wakadeketerera Jehovha kudari: “Thaviranyivo muranda wenyu kuti atame kujikuja.” (Nduyo 19:13) Kujikuja [kana kuita zvaucitendehwi] kunorevenyi? Zvinoda kureva kuita ciro caucina citendehwa kana mutemo wo kuciita, kangaije ngo kuti aticakwanisi kuvetera kana ngo kujitutumaja. Tese nguva jimweni tinozviita ngo ndava yo kutama kukwana. Asi tikasota zvakaitika na Mambo Sauri, tinovona kuti kudari tikava no cirovejeso co kuita zvaticikatendehwi, Jehovha aazodakajihwi ndisu. Nduyo 119:21, BMAA, inonanga kuti Jehovha ‘anozokamisa [kana kupangira] vanojikuja [kana kuita zvavacikatendhwi].’ Ngenyi anozozviita?

5. Ngenyi tikava vanoita zvavacikatendehwi, tinonga teciposa maningi?

⁵ Cokutanga, kudari tikaita ciri cese caticikatendehwi kuita, tinonga ticikareremeji Jehovha, Mwari zve Mutongi wedu. Cocipiri, tikaita ciro ticina mutemo wo kuciita, thuka tazotama kuzwirana no vamweni. (Mazwi Akangwara 13:10) Zve cocitatu, vamweni vakazvizwa kuti takaita zviro ticizivi kutendehwa, vanozotivona inga benji. (Luka 14:8, 9) Waro zvatijekera kuti ngenyi Jehovha anoda kuti tive vanotendera zvatiri.

6, 7. Kutendera zvouri kwakaezana kudini no kujidodokesa?

⁶ Kutendera zvouri kwakaezana no kujidodokesa. MuKristu anojidodokesa aazvitundhumaji asi anovona vamweni vakakhwirira kupinda iyena. (VaFilipi 2:3) Mundhu anojidodokesa kazinji anotendera zvaari. Anoziva kuti ana zvaacikakwanisi, zve anotendera zvaanoposa ngo kuzvidodokesa. Anoda kupurukira mazano o vamweni, wojija  ndiona. Mundhu anojidodokesa kudakajisa maningi Jehovha.

⁷ Bhaibheri rinotatija kuti mundhu anotendera zvaari anozviziva ega zve anoziva kuti kuna zviro zvimweni zvaacikakwanisi kuita kana aatendehwi kuzviita. Izvo zvinomubesera kuti areremeje vamweni no kuvataja ngo kunaka mwoyo.

8. Murangariro wapi wakashata wotinodikana kuramba kuti tirambe tecitendera zvotiri?

⁸ Asi, tingatanga kurangarira ngo njira yo kuzvikuja pikija ticikatozvizivi. Ngozvapi zvingazoitika? Tingazotanga kujizwa kuti tinosisira maningi kupinda vamweni ngokuti itusu kana wotinoziva anoita basa rakati mu ungano. (VaRoma 12:16) Kana tingatanga kujisotesesa maningi. (1 Timoti 2:9, 10) Tingatotanga kubvunja vamweni zvovanodikana kuita kana zvovacikadikani.—1 VaKorinto 4:6.

9. Ngenyi vamweni vakaguma pa kuita zvovacaitendehwa? Ipanyi muezaniso wo mu Bhaibheri.

⁹ Kudari atingwariri zvido zvedu, tingatanga kuva no mufambiro wo kuita zvoticikatendehwi. Vamweni vakatanga kuita zvovacikatendehwi ngokuti vaida kukujwa, vaenga no thima no vamweni kana avazivi kungwarira ushungu hwavo. Izvi ngo zvakaitika no vamweni vanonangwa mu Bhaibheri, vakadari inga ndi Abhusaromi, Uzia na Nabhukadhinezari. Jehovha wakavajekesera kuti vaidikana kujidodokesa.—2 Samueli 15:1-6; 18:9-17; 2 Kronike 26:16-21; Danieli 5:18-21.

10. Ngenyi atidikani kutonga vamweni kuti waitirenyi cakati? Ipanyi muezaniso wo mu Bhaibheri.

¹⁰ Kungava no mathangwe akawanda anoitisa kuti vandhu vatame kutendera zvovari. Rangariranyi ngo muezaniso wa Abhimereki na Pedhru. (Genesi 20:2-7; Mateu 26:31-35) Vandhu ava vaizvikuja here? Kana zvingaita kuti avacainasa kuziva zvovaiita kana vaizviita vacizivi kurangarira? Zvicivoneka kuti atikwanisi kuvona zviri mu mwoyo, atidikani kutonga vamweni kuti waitirenyi cakati.—Verenganyi Jakobo 4:12.

11. Ngozvapi zvotinodikana kuzwisisa?

¹¹ Mundhu anotendera zvaari anozwisisa mutoro wake mu nasiriro ja Mwari. Jehovha ndi Mwari wo urongeki. Wakapa umwe na umwe mutoro wake pa ungano. Tese tinodikana maningi. Jehovha wakapa umwe na umwe wedu zvipo, uzivi no kukwanisa zvakasiyana zve anotitendera kuti tikhete mashandisiro otingazviita. Kudari tinotendera zvotiri, tinozoshandisa zvipo zvedu ngo njira yaanoda. (VaRoma 12:4-8) Tinoziva kuti Jehovha anovetera kuti tizvishandise kuitira kumukuja no kubesera vamweni.—Verenganyi 1 Pedru 4:10.

12, 13. Ngozvapi zvotinodikana kuceuja potinowanana no cinjo mu kushandira kwedu Jehovha?

¹² Zvotinoita mu basa ra Jehovha zvingacinja pa kufamba ko nguva. Inga muezaniso, rangariranyi cinjo jakawanana na Jesu. Pa kutanga waenga na Baba wake basi. (Mazwi Akangwara 8:22) Perepo, wakabesera Jehovha pa kuita ngirozi, kudenga no pasi, no vandhu. (VaKolosi 1:16) Tevere, wakazotumwa kuviya pasi pano. Wakabahwa inga cimwana, wokura kuita dhodha. (VaFilipi 2:7) Pasure po kufa kwake, Jesu wakahwirira kumatenga, wova Mambo wo Umambo hwa Mwari mu gore ro 1914. (Vaheberi 2:9) Zve kumbejiyo, pasure po kutonga kwake inga Mambo ko ciuru co makore, Jesu anozohwirija Umambo kuna Jehovha kuitira  kuti “Mwari ave [zvese] ku vese.”—1 VaKorinto 15:28.

¹³ Itusu tingawananavo no cinjo jakawanda mu upenyu hwedu. Nguva jimweni mabasa otinoita angacinja ngo ndava yo zvivaringo zvedu. Inga muezaniso, kangaije taenga ticizivi kucadha zve takazosunga kucadha. Kangaije taana vana. Kangaije tingazodikana kuita cinjo kuitira kuti tikwanise kushandira Jehovha mu nguva yakazara. Pa mukuvo umweni, mabasa edu angacinja ngo ndava yo mugariro jedu. Tingakwanisa kuita zvizinji kana tingaita zvishoma. Asi pikija tiri vocidoko kana madhodha, tina uhomi hwaushoni kana haiwa, Jehovha anoziva kuti umwe na umwe wedu angamushandira kudini ngo simba rese. Iyena aativeteri kuti tiite zvoticikakwanisi. Zve anodakara mainingi ngo ciricese cotinomuitira.—Vaheberi 6:10.

14. Kutendera zvotiri kunotibesera kudini kuti tidakare ngo mugariro uriwese?

¹⁴ Jesu waidakara ngo basa ririrese raaigajwa ndi Jehovha, zve itusu tingadakaravo ngo zvotinogajwa kuita. (Mazwi Akangwara 8:30, 31) Mundhu anotendera zvaari anodakara ngo zvaanobvunjwa kuita no mabasa ake mu ungano. Aasotesesi zviri kuitwa ngo vamweni. Kunja kwa izvi, anojizwa kukwana ngo basa rake mu sangano ra Jehovha. Anorivona inga waripuwa ndi Jehovha. Zve mundhu anotendera zvaari anoreremeja vamweni zve anodakarira kuvabesera. Iyena anoziva kuti basa rovanaro waro vakaripuwavo ndi Jehovha.—VaRoma 12:10.

15. Tinojijenyi ngo muezaniso wa Gidhioni?

¹⁵ Gidhioni i muezaniso wakanaka wo kutendera zvotiri. Jehovha paakamugaja kuti aponese vaIziraeri mu nyara jo vaMidhiani,  Gidhioni wakananga kudari: “Mbhuri yangu iri murombo kupinda jese pa ukama hwa Manasa, ininivo ndiri mundhu wokupejisira pa muzi pangu.” (Vatongi 6:15) Asi Gidhioni wakagonda Jehovha wotendera basero. Gidhioni wakava no gwinyiso rokuti wakanasa kuzwisisa zvaida Jehovha kwaari zve wakaita mukumbiro kuti amutungamirire. (Vatongi 6:36-40) Gidhioni waenga mwanarume wakavanga no kucunga, asi waengazve wakangwara zve waiita zviro no ubhasopa. (Vatongi 6:11, 27) Perepo, vandhu povakada kuti aite mutongi, iyena wakaramba. Paakapeja kuita zvaakabvunjwa ndi Jehovha, wakahwirira kanyi kwake.—Vatongi 8:22, 23, 29.

16, 17. Mundhu anotendera zvaari anokurisa kudini kumujimu?

¹⁶ Kudari mundhu akatendera kugajwa basa ibza kana akada kuita mabasa amweni mu ungano, azvirevi kuti mundhuvo aatenderi zvaari. Bhaibheri rinonanga kuti azvizivi kushata kudari mushandiri wa Jehovha akada kushandira hama jake zvakakwana no kubudirira kana kukura kumujimu. (1 Timoti 4:13-15) Asi tinodikana kugajwa basa ibza kuti tikure kumujimu? Andizvopi. Tese tinodikana kuramba ticiitisa nane undhu hwedu hwo ciKristu no zvikwaniriso zvotakapuwa ndi Jehovha kuitira kuti tikwanise kunasa kumushandira no kubesera vamweni.

¹⁷ Acito watendera kugajwa basa, mundhu anotendera zvaari anopsaka kuziva zvaanodiwa kuti azoite. Iyena anoita mukumbiro, wozvizemena kuti anozokwanisa kuita basero kana haiwa. Acazova nayo nguva no simba kuti azoite zviro zvimweni zvinosisira here? Kudari aakwanisi, mabasa aari kuitaro waro angazoitwa ngo vamweni here? Pa kupera kurangarira izvi, mundhu anotendera zvaari angavona kuti aakwanisi kunasa kuita basa ibza iri. Kudari tinotendera zvotiri, tingananga kuti andirikwanisi.

18. (a) Mundhu anotendera zvaari anoitenyi kudari akagajwa basa ibza? (b) VaRoma 12:3 inotibesera kudini kuti titendere zvatiri?

¹⁸ Jehovha anoda kuti ‘titendere zvotiri pa kufamba’ naye. (MIKEYA 6:8, Shanduro yeNyika Itsva) Ngokudaro, potinogajwa basa imbza, tinopsaka ndhungamiriro jake zve tinomukumbira besero inga zvakaita Gidhioni. Tinodikana kurangarijisisa ngo pamusoro po zvaanotibvunja Jehovha acishandisa Bhaibheri no sangano rake. Ngaticeukije kuti basa rese ratinokwanisa kuita mu basa ra Jehovha tiri kurikwanisa ngo kuti Iyena anojidodokesa zve anojipira kuti atibesere. (Nduyo 18:36) Mundhu anotendera zvaari, aazorangariri ‘kupinda bzokudikana.’—Verenganyi VaRoma 12:3.

19. Ngenyi tinodikana kuva no mugariro wo kutendera zvatiri?

¹⁹ Mundhu anotendera zvaari anoziva kuti Jehovha basi, ngaanofanera goja rese, ngo kuti iyena ndi Musiki zve Mukuru-kuru Kamare mudenga no pasi. (Apokalipsi 4:11) Kudari tinotendera zvatiri, tinozodakara ngo zvatinokwanisa kuita mu basa ra Jehovha. Tinozoreremeja mazwiro no mazano o hama no hambzaji jedu, zve inga muviyo, tinozova takabatana. Mundhu anotendera zvaari, anotanga anasa kurangarira acito aita ciri cese, kuti atame kuwira mukuposa kukuru. Jehovha anodakajihwa maningi ngo vaya vanotendera zvovari. Ngo iyo ndava, mugariro wo kutendera zvauri unosisira maningi kuno vandhu va Mwari. Pa musoro unotevera, tinozovona kuti tingaitisa kudini kuti tirambe no mugariro uwu pikija pazvinonga zvecinesa kuukhombija.