PA Genesi cipauko 22, Bhaibheri rinonanga kuti Mwari wakabvunja Abhirahama kuti aende ku ndau iri ndhambo no kanyi kwake kooita mupiro. Irona rinoti: “Abrahama wakatora huni jokupisa ndijona, wakajithwarisa Isaki, mwana wake. wotora muriro no banga mu nyara make, voenda vovaviri pamwepo.”—Genesi 22:6.

Bhaibheri arinangi kuti vandhu vaibwakijisa kudini muriro mu nguva jokare. Waro Abhirahama na Izaki vakabwakija muriro vouthwara murazvu wao here? Umwe anobhuya ngo zvo Bhaibheri wakananga kuti murazvu wo muriro “aucaizoguma ucibwaka pa hwendo hwakareba.” Kunja kwa izvi, kangaije Abhirahama no mwana wake vakatora zvese zvovaizoshandisa pa kubwakija muriro.

Asi vamweni vanonanga kuti azvicaireruka kutanga kubwakija muriro mu nguva jondhojo. Asi pozvaikwanisika, vandhu vaibwakija muriro ngo koothetha simbe pari kubwakaro muriro, kangaije pa muriro wo pacigarisano. Vajiji vazinji vanotenda kuti Abhirahama wakatora masimbe pacoto acito waita hwendo hwake. Anoita inga wakaadira mu mujiyo, kangaije mu cimbende cina cibato, zve woenda nao paakaita hwendo. (Isaia 30:14) Perepo waizoshandisa masimbe aya no zvimathyethye paaida kubwakija muriro.