1-3. Zvicinyi zvicikazivi kuitwa ngo muphorofita wo ku Judha, zve ngowapi wakazova muviyo? (Vonanyi pikica yo kutanga.)

MAMBO JEROBHOAMU wo Iziraeri wakavakira dandiro kunamata ko manyepo mu dhorobha ro Bheteri. Jehovha wakatumira muphorofita kubva Judha kuti abvunje Jerobhoamu masoko o rutongeso. Muphorofita uu wakazwira Jehovha womubvunja masokoo ngo kujidodokesa. Mambo wakamunyangajwira, asi Jehovha wakamujivirira.—1 Majimambo 13:1-10.

² Jehovha wakapangira muphorofita kuti atame kuha kana kumwa ciricese mu Iziraeri no kuhwirira kanyi ngo gwanja rimweni. Paaihwirira, wakawanana no musharuka, wocengejwa ndiena, acinanga kuti waenga no masoko aibva kuna Jehovha. Musharuka uu wakamukoka kuti aende koha no kumwa kanyi kwake. Iyena wakatama kuzwira Jehovha woenda kanyi ko musharuka wiya. Jehovha aazivi kudakajihwa ndizvona. Naari mu gwanja ecihwirira ku muzi, mbhondoro yakamuruma yomuuraya.—1 Majimambo 13:11-24.

³ Atizvizivi kuti ngenyi muphorofita uu wakasunga kuzwira musharuka wiya kuciripi Jehovha. Asi tinoziva kuti aazivi kuramba ‘ecitendera zvaainga’ pa kufamba na Jehovha.  (Verengayi MIKEYA 6:8, Shanduro yeNyika Itsva.) Mu Bhaibheri, kufamba na Jehovha zvinobatanija kumugonda, kuthemba ndhungamiriro yake no kumuzwira. Mundhu anotendera zvaari anoziva kuti anodikana kuita mukumbiro nguva jese. Muphorofita wiya naakava anotendera zvaari, waizobvunjisa Jehovha kuti dangani wainga acinja ndhungamiriro jake. Nguva jimweni tinodikanavo kutema zvivaringo zvinonesa, zve zvingatama kutijekera kuti Jehovha anoda kuti tiitenyi. Kudari tiri vanotendera zvatiri, tinozokumbira Jehovha kuti atitungamirire kuti titame kuita zvakashatisisa.

4. Ticajijenyi pa musoro uno?

⁴ Pa musoro wakapera, takajija kuti kuva vanotendera zvatiri zvinorevenyi zve ngenyi zvinosisira kotiri nyamasi uno. Asi tingava kudini vanonasa kutendera zvatiri? Mugariro japi jingaita kuti tivoneke tinotendera zvatiri kana kuti haiwa? Ngativone mutatu jakona.—Mazwi Akangwara 11:2.

5, 6. Bharazirai wakatatijisa kudini kuti waitendera zvaari?

⁵ Madavirire atinoita panocinja mugariro wedu kana tikacinjwa basa ratakagajwa ngo panovoneka kuti tinotendera zvatiri kana kuti haiwa. Tinowana cijijo ngo muezaniso wa Bharazirai, shamwari yo pamwoyo ya Mambo Dhavhidhi. Paaenga no 80 o makore, Dhavhidhi wakamukoka kuti aende koraramira pa banje ra mambo. Pikija hwaenga rukujo hukuru, Bharazirai wakananga kuti zvaizova zvaushoni kuti apekeje basa iri ku mwanarume waizwi Shemihamu, kangaije wainga mwanake.—2 Samueli 19:32-38.

⁶ Ngenyi Bharazirai aazivi kutendera mukoka uu? Wairamba mabasa kana kubusa upenyu wakareruka? Andizvopi, wakaramba ngokuti waitendera zvaari. Waiziva kuti mugariro jake jainga jacinja zve waiziva zvaacaikwanisa. (Verenganyi VaGalàsia 6:4, 5.) Tinodikana kuva vanotendera zvatiri, inga ndi Bharazirai. Tinosotesesa pa kushandira Jehovha mbhera panoperera simba redu, kunja ko kusotesesa pa zvotinoda kana kujiezanisa no vamweni. Izvi zvinosisira maningi kupinda kugajwa basa raushoni kana kuva tinozivika maningi. (VaGalàsia 5:26) Tikatendera zvatiri, tinozoshanda pamwe no hama kuitira kukuja Jehovha no kubesera vamweni.—1 VaKorinto 10:31.

7, 8. Kutendera zvatiri kunotibesa kudini kuti titame kujithemba tega?

⁷ Zvinonesa maningi kuti tirambe ticitendera zvatiri patinopuwa mabasa akawanda kana tikagajwa inga muvonereri. Tingajija ngo muezaniso wa Neemia. Paakazwa kuti vandhu ku Jerusarema vaenga no zvineso zvizinji, wakadeketerera Jehovha kuti avabesere. (Neemia 1:4, 11) Jehovha wakadavira mukumbiro wa Neemia. Mambo Artaserse wakagaja Neemia inga govhernadhori. Pikija wainga mutongi zve mukhupuki, iyena aazivi kujithemba ega. Neemia waipsaka ndhungamiriro ya Jehovha no kuverenga Mutemo wake. (Neemia 8:1, 8, 9) Neemia waitonga vandhu vakawanda. Asi aacaishandisa utongi hwake kuti ajibesere ega kana kutaja vamweni ngo hasha.—Neemia 5:14-19.

 ⁸ Kudari tapuwa mabasa akawanda kana tacinjwa basa rotakagajwa, inga ndi Neemia, tiri vanoenderera mberi vecitendera zvavari. Atidikani kuthemba zvotinoziva basi kana zvotinokwanisa. Zvinoitika here mundhu wotanga kujithemba? Inga muezaniso, mukuru angatanga kubata shwiro jo ungano, acikatangi aita mukumbiro. Hama kana hambzaji ingatanga yatema civaringo perepo yokumbira Jehovha kuti akomborere civaringoco. Mundhu anotendera zvaari aajithembi ega, pikija paanoita ciro caaiita maningi kareko. Anoziva kuti zvaanokwanisa kuita azvizopindi zvinokwaniswa ndi Jehovha. (Verenganyi Mazwi Akangwara 3:5, 6.) Nyamasi uno, vandhu vazinji mu nyika vano umbau zve vanoeja kuva kumbeji ko vamweni. Asi vashandiri va Jehovha avaitivo kudaro. Atirangariri kuti kuva no mabasa akawanda zvinotiita vaushoni kupinda vamweni pa ungano kana pa mbhuri yedu. Kunja kwa izvo, tinoziva cigaro cedu mu nasiriro ya Mwari zve tinoshanda tese no hama no hambzaji jedu.—1 Timoti 3:15.

9, 10. Kutendera zvatiri kunotibesa kudini vamweni povanotishora zvicizivi kururama?

⁹ Ariwese paanotishora zvicina shwiro tinocamwa ndizvona. Izvo ngo zvakaitikira  Ana. Pikija mwamuna wake waimuda maningi, Ana aacaidakara. Penina, mbhwere yake yaimushora nguva jese. Ana waida kuva no vana asi aacaibara. Pozvaimuhwaja njiku imweni, Ana wakaenda koita mukumbiro ku tabherinakeri. Mupiri Mukuru Eri wakamuvona acicema womubvunja kuti wakadhakwa. Ana waizonyangajwa maningi ndizvona. Kaveta, wakamudavira ngo njira yo kureremeja. Tevere, Ana wakaita mukumbiro unotatija gonda no rudo hwake kuna Jehovha.—1 Samueli 1:5-7, 12-16; 2:1-10.

¹⁰ Kutendera zvatiri kunotibesera kuti ‘tinyise uxaixi ngo kuita bzauxoni.’ (VaRoma 12:21) Nyika ya Sathana yakazara ngo zviro zvakashata. Ngokudaro, atidikani kushamaisika kudari tikashaisha kutajwa. Pikija kuti zvinotinyangaja, asi tinodikana kuhwisana no mazwiro ao. (Nduyo 37:1) Zvinotihwaja maningi kudari tiri kunesana no hama no hambzaji jo mu ungano yedu. Kudari zvikaitika tinodikana kutevejera Jesu. Bhaibheri rinoti: “Pakutukwa, aacihwirijirepi ngo kutuka.” Kunja kwa izvi, “waijipira kwa wiya anotonga ngo urungami.” (1 Pedru 2:23) Jesu waijidodokesa zve waiziva kuti Jehovha anozopeja kutama kururama kuri kwese. (VaRoma 12:19) Tinodazve kuva vanozvidodokesa no kutama ‘kuhwirijira uxaixi ngo uxaixi.’—1 Pedru 3:8, 9.

11, 12. (a) Tingava kudini tinotendera zvatiri vamweni povanotisimba kana kutikuja? (b) Tingatatijisa kudini kuti tinotendera zvatiri ngo zvotinosimira no mufambiro wedu?

 ¹¹ Vamweni povanotisimba kana kutikuja, kutendere kwedu zvatiri kunonga kuri pa muejo. Esteri wakasimbwa maningi no kukujwa. Iyena waenga umwe wo vanakaji vaiseja mu Persia. Wakapeja gore rese acinasa kuenjwa kana kusenjwa no vasikane vamweni vaciphikizana kuti aemuhwe ndi mambo. Perepo mambo wakakheta Esteri kuti ave vahosi. Asi kungwarihwa kwese uku akuzivi kumucinja. Iyena wakaramba acitendera zvaari, kunaka mwoyo no kuva no nderemejo.—Ester 2:9, 12, 15, 17.

¹² Kudari tinotendera zvatiri, masimirire pomwe no mufambiro wedu zvinozokhombija kuti tinoreremeja vamweni. Kunja ko kujikuja kana kueja kuda kuvoniwa ngo, tinozovangisira kuva no mujimu “wokuthiva no kunyarara.” (Verenganyi 1 Pedru 3:3, 4; Jeremia 9:22, 23) Mavonere atinojiita pacedu, anozobuda pambhene ngo zvatinovereketa no kuita. Inga muezaniso, tingaeja kuita kuti vamweni vativone kuti tinosisira maningi ngo kuti tinoita basa rakati, tinoziva zvakati, kana tinoziva mundhu wakati. Kana tingaeja kuita kuti zvivoneke inga taita tega ciricese cinosisira, kuveni vamweni vaibeseravo. Asi rangariranyi ndi Jesu. Iyena aacaiita kuti avoneke kuti waingwara maningi. Kunja kwa izvi, kazinji Jesu wainokora zviri mu Soko ra Mwari. Aacaida kuti vandhu vamukuje. Nguva jese waida kuti rukujo huende kuna Jehovha.—Johani 8:28.

13, 14. Kutendera zvatiri kunotibesera kudini kuti titeme zvivaringo zvakanaka?

¹³ Tinodikana kutendera zvatiri potinotema zvivaringo kana vamweni povanotema zvivaringo zvinotipsasa. Pauro paaenga ku Sezareya, waida kuenda ku Jerusarema kuti apejise basa raakapuwa ndi Jehovha. Asi muphorofita Agabho wakamubvunja kuti waizosungwa kudari akaendeyo. Pauro waitozourawa kondhoyo. Hama jakadeketerera Pauro kuti atame kuendeyo. Asi iyena wakasunga kuenda Jerusarema. Wakaita kudaro ngokuti waijitemba maningi here? Haiwa, Pauro waitendera zvaari zve wainasa kuthemba Jehovha. Hamejo jaitenderavo zvajainga. Ngokudaro, jabesera civaringo ca Pauro, jomusiya epinda.—Maitiro o Vapostori 21:10-14.

¹⁴ Kutendera zvatiri kunozotibesera kuti titeme zvivaringo zvakanaka pikija atikwanisi kuziva kana mavonerera magariro anozoita zviro. Inga muezaniso, tingarangarira kungwina mu basa ro nguva yakazara. Asi ngozvapi zvicaitika kudari tikahwaja? Vabari vedu vakazohwaja keni voda besero? Ticazoitenyi tikazova vasharuka? Atikwanisi kudavira mubvunjo iji, pikija tikatoita mukumbiro no kurangarijisisa ngo pamusoro pajo. (Mucumaeri 8:16, 17) Asi kudari tikagonda Jehovha, tinozokwanisa kuziva no kutendera zvoticikakwanisi kuita. Tinozosotesesa zvazviri, kukumbira mazano, zve cinosisira maningi, kuita mukumbiro kuti Jehovha atitungamirire. Perepo tinodikana kuteveja ndhungamiriro yo mujimu wake. (Verenganyi Mucumaeri 11:4-6.) Jehovha anozokomborera zvivaringo zvedu,  kana anozotibesera kucinja zvatinoronga.—Mazwi Akangwarap 16:3, 9.

15. Kurangarijira ndi Jehovha kunotibesa kudini kuti tirambe ticijidodokesa?

¹⁵ Tingava kudini vanonasa kutendera zvatiri? Ticabhuya ngo njira murongomuna. Yokutanga, tinodikana kurangarijisisa ndi Jehovha, kuti iyena ndi Mwari wo mushoni. Patinozviezanisa na Jehovha, tinoziva kuti tiri vadoko maningi zve tino uzivi hushoma. (Isaia 8:13) Ramgariranyi kuti tinoshandira Mwari wo Masimba ese, kuciripi mundhu kana ngirozi. Kurangarijira izvi kunozotibesera kuti tijidodokese “pasi po nyara yakavanga ya Mwari.”—1 Pedru 5:6.

16. Kurangarijira rudo hwa Mwari kunotibesa kudini kuti titendere zvatiri?

¹⁶ Njira yocipiri yotingatendera ndiyona zvatiri ngo yokurangarija kuti Jehovha anotida maningi. Pauro wakaezanisa ungano no muviri wo mundhu. Jehovha wakaita mativi ese o muviri kuti ave anoshanda. (1 VaKorinto 12:22-24) Umwe na umwe wedu ano mutengo pamberi pa Jehovha. Iyena aatiezanisi no vamweni zve kudari tikaposa, iyena aaregeri kutida. Tinozwa kungwaririka ngo kuziva kuti Jehovha anotida.

17. Tinozobesereka kudini kudari tikasota zvakanaka zvinoitwa ngo vamweni?

¹⁷ Njira yocitatu, tingava vanotendera zvatiri ngo kusota zvakanaka zvinoitwa ngo vamweni, inga zvaanoita Jehovha. Kunja ko kueja kusotesesa no kubvunja vamweni zvavanodikana kuita, tinozova vanokumbiravo mazono no kutendera mavonero o vamweni. (Mazwi Akangwara 13:10) Tinodakara hama no hambzaji jedu pojinogajwa basa rinosisira. Zve tinomubonga maningi Jehovha ngo kutendera kwake kuti tese timushandire.—1 Pedru 5:9.

18. Kuroveja hana yedu kunozotibesa kudini kuti tive vanonasa kutendera zvatiri?

¹⁸ Njira yocirongomuna, tinozova vanotendera zvatiri potinoshandisa zviambi zvo Bhaibheri kuti tiroveje hana yedu. Zviambi izvi zvinotijijisa kuti Jehovha anozwa kudini zve anarangarira kudini. Potinojija kuvona zviro ngo mavonero a Jehovha, tinotema zvivaringo zvinomudakajisa. Potinojija, kuita mukumbiro no kushandisa zvotinojija, tinozova no hana yakanaka. (1 Timoti 1:5) Tinojija kudira vamweni pa kutanga. Potinoita zviro izvi, Jehovha anopikira kuti ‘anozopejisa kurovejwa kwedu’, kubatanija no kutibesera kuti tive vanonasa kutendera zvatiri. —1 Pedru 5:10, Shanduro yeNyika Itsva.

19. Zvicinyi zvinozotibesera kuti tirambe tecitendera zvatiri mbhera narini?

¹⁹ Mucaceuja muporofita wo Judha wotabhuyaya pa kutanga ko musoro uu? Iyena wakaruza upenyu hwake no ushamwari hwake na Jehovha ngokuti aazivi kuramba acitendera zvaari. Itusu tinokwanisa kuramba tecitendera zvatiri pikija zvicinesa kuzviita. Muezaniso jo vashandiri vazinji vakagondeka va Jehovha jinotatija kuti zvinoitika. Potinoshandira Jehovha mukuvo wakareba, tinodikanavo kumuthemba maningi. (Mazwi Akangwara  8:13) Azvinenyi kuti tiri pa mugariro jakadini, tinokwanisa kuramba ticifamba na Jehovha. Uhwu i rukujo hukuru hwotingava naho. Ngokudaro, ngatiite zvese zvotinokwanisa kuti tirambe tecitendera zvatiri no kufamba na Jehovha mbhera narini.