Kuvhira pa udoko hwangu ndaidakarira maningi zviro zvakasikwa. Vabari vangu nguva jese vaidakarira maningi kopasiari mumakwasha no murambo jainga mu dhorobha rataigararo, Jyväskylä, ku Finrandiya Sentrari. Ndinodakarirazve maningi zvinyama. Pandainga mudoko, ndaida kukumbatira mbhaka no imbwa jandaivona! Pondainga ndecikura ndainyangajwa maningi pondaivona vandhu vecishaisha kutaja zvinyama. Pakufamba ko nguva, ndakazobatana no vanovonerera zvinyama, ndikona kondakazoziva vandhu vairangarira inga ndini.

Taaita maningi fafanya kuti tijivirire zvitendehwa zvo zvinyama. Taiita fafanya iyi ngo njira jakasiyana-siyana, taitofamba tecinanga masoko akashata ngo pamusoro po ma rojha aitengesa mabhaci o dovo no zvipitari zvaishandisa zvinyama kuti zvieje mutombo jakasiyana. Takaguma pakuumba cikwata caida kujivirira zvinyama. Taivangisira maningi pa basa iri, ngo iyo ndava taiguma pa kuva no ndava jakawanda no utongi. Ndakasungwa no kutongwa pa vhaza jakawanda maningi.

Kusiyapo basi kuneseka ngo zvinyama, ndainesekazve ngo pamusoro po zvineso zvakawanda zvainga mu nyika. Pa kufamba ko nguva ndakazonghwina mu zvikwata zvakawanda, kubatanijavo Anistia Internacional no Greenpeace. Kubesera mabasa aiithwa ngo zvikwata izvi, cainga ciro cinosisira maningi kwandiri. Ndaida kuita zvese zvandinokwanisa kuti ndibesere varombo, vari kutambujika no vese vaya vainga vacina besero.

Pa kufamba ko nguva ndakazozwisisa kuti andicaizokwanisa kupeja zvineso zvo nyika. Pikija kuti zvikwata zviyani zvaieja kupeja zvineso zvidokowane, asi zvineso zvikuru zvaingejeka basi. Zvaitovoneka kuti vandhu vazinji vaidakarira maningi kuita zvakashata kupinda kuita zvaushoni, i apana waitoneseka ndizvona. Ndaijizwa ndicikasisiri.

Inini ndakaguma pakunyangajwa maningi. Perapo ndakatanga kurangarira ngo pamusoro pa Mwari no Bhaibheri. Ndainga ndakambojija Bhaibheri no Zvapupu zva Jehovha. Pikija kuti pa mukuwo wiya ndaidakarira rudo no unyasha hwavo, asi andicaidepi kuita cinjo mu upenyu hwangu. Asi wari zviro zvainga zvosiyana.

Ndakatanga kuverenga Bhaibheri rangu. Izvi zvakandidakajisa maningi. Ndakaverenga mavhesi akawanda aibhuya ngo kutaja ushoni zvinyama. Inga muezaniso, Mazwi Akangwara 12:10 inoti “Mururami anotaja bzifuyo bzake.” Ndakazwisisazve kuti Mwari andiyepi anoitisa matambujiko. Kusiyapo zvondhozvo, zvineso zvedu zvinoengejeka ngokuti vandhu vazinji avazwiri mupango ja Mwari. Ndakashamaisika maningi pondakajija ngo rudo hwa Mwari no kusengerera kwake.—Nduyo 103:8-14.

Pa mukuwo wondhowo, ndakakumbira bhuku Bhaibheri Rinojijisenyi Kamare? Ngo kukasika, varovorani vamweni vainga zvapupu zva Jehovha, zvakandivhakacira kuti zvijije na inini Bhaibheri, inini ndakatendera. Perapo ndakatanga kwenda ku musongano ku Nyumba yo Umambo. Padoko ngo padoko, cokwadi cakatanga kukura mu mwoyo mangu.

Ngo besero ro Bhaibheri, ndakatanga kuita cinjo mu upenyu hwangu. Ndakaregera kumwisa doro no kubhema. Ndakacinja mavereketero angu no mavonekero angu. Ndakatangazve kureremeja maningi utongi. (Varoma 13:1) Ndakasiyazve mararamiro angu akashata.

Zvakandinesera maningi zvakava zvokuvha no mavonero aushoni ku zvikwata zvaivonerera zvitendehwa zvo vandhu no zvinyama. Cinjo iyi aizivi kuitika ngo kukasika. Pakutanga, inini ndakarangarira kuti ndaizocengeja zvikwata izvi kudari ndikaregera kubatana nazvo. Asi ndakazozwisisa kuti Umambo hwa Mwari ndiwona wega basi unozopeja matambujiko pasi pano. Ndakazotema civaringo co kudira Umambo hwa Mwari pa kutanga zve ndobesera vamweni kuti vajije ngo pamusoro pahwo.—Mateu 6:33.

Inga mujiviriri wo zvinyama inini ndaisana kuti vandhu ava i vakanaka kana vakashata. Ndaigara ndecihwisa vaya vandaivona inga vashati. Asi ngo besero ro Bhaibheri, wari andicanyenyizve vandhu. Ndinoeja kukhombijira rudo hwo Cikristu ku vandhu vese. (Mateu 5:44) Njira imwe yo kukhombijira rudo uwu ngo yo kuvhunja vamweni ngo pamusoro po masoko akanaka o Umambo hwa Mwari. Ndinodakara maningi ngo kuvona manera basa iri rinoviisa runyararo, mudakaro no kupekeja vandhu vetero yo kadi.

Inini ndakakwanisa kuva no runyararo hwokadi ngo kusiya kuthimwa-thimwa kwangu mu nyara ja Jehovha. Wari ndino cokwadi co kuti iyena, inga Musiki, aazotenderi kuti vandhu no zvinyama vaenderere mberi vecishaishwa kutajwa ne aazotenderi kuti nyika yedu yakasejari iparajwe. Ngokusiyana, iyena ngokukasika anozopeja ushati hwese, ecishandisa Umambo hwake. (Isaia 11:1-9) Ndiri kudakara maningi ngo kuziva cokwadi ici no kubeseravo vamweni kuti vave no gonda naco. Wari, andicarangaririzve kuti ndinodikana kupeja zvineso zvo nyika.