1, 2. Zvicinyi zvatingarangarira nguva jimweni, asi muezaniso japi jiri mu Bhaibheri jingaviya mu murangariro?

KANGAIJE mwakamborangarira kudari: ‘Ndinozoitavo nani kuhwaja kwanguku here?’ Kangaije makamborangarira kuti mudiwa wo pa mbhuri yenyu kana shamwari inodiwa iri kuhwaja inozoitavo nani kana kuti haiwa. Ngo zvocibarihwe kukaya-kaya, kudari ari wese ecihwaja. Mu nguva yo vaphorofeti Erija na Erisha, kwakava no majimambo maviri akanesekavo ngo pamusoro po uhomi. Mambo Akazia, mwana wa Akhabhi na Jezabheri, wakakhuvazwa maningi, ngo kudaro wakabvunjisa kudari: “Ndinozopona here ndhenda iyi?” Pa kufamba ko nguva, Mambo Bheni-hadhadhi wo ku Siria, wakahwaja maningi, zve wakapsaka kuziva kuti ‘dangani waizorapika’ ku ndhendha iyani here?—2 Maj. 1:2; 8:7, 8.

² Ngo kudaro, tinovetera kuti, panozova no muviyo wakanaka kwatiri no kuno vaya vatiri kuarika. Asi pikija zvakadaro, vazinji vanondorangarira kuti Mwari anozoitenyi kuti amubesere. Pairarama majimambo ondhowo, Mwari nguva jimweni waishandisa mushamaiso pa shwiro jakadari inga jo upenyu no uhomi hwo vandhu. Nguva jimweni waiita kutovamusa ku vakafa. (1 Maj. 17:17-24; 2 Maj. 4:17-20, 32-35) Pano thangwe ringatiita kuti tivetere kuti angaitavo zvakafanana mu nguva yedu ino here?

3-5. Ngo rapi simba rina Mwari na Jesu, zve izvi zvinoita kuti pave no mubvunjo japi?

 ³ Atikani-kani kuti Mwari ano simba ro kupsasa uhomi hwo mundhu ari wese. Bhaibheri rinozvitendera zvondhozvo. Mu nguva jimweni, iyena wakapanica vandhu ngo ndhendha jakadari inga jakaitikira Faro mu njiku ja Abhirahama zve ngo kufamba ko nguva yakazoitikira hambzaji ya Mosi, Miriemu. (Gn. 12:17; Bziv. 12:9, 10; 2 Sam. 24:15) Mwari wakangwaja vaIziraeri kuti kudari vakatatija kutama kutendeka, iyena waizovatambuja ngo “ndhenda no matambujiko ese.” (Dt. 28:58-61) Ngo manangiro amweni, Jehovha waizokwanisa kubvisa ndhendha kana kujivirira kuhwaja. (Ex. 23:25; Dt. 7:15) Zve waizokwanisavo kurapa vandhu. Jobe naahwaja kamare zvo kuguma pa kuda kufa, Mwari wakamurapa!—Job. 2:7; 3:11-13; 42:10, 16.

⁴ Hina, Mwari ano simba kamare ro kunghwinira no kurapa kuhwaja ko mundhu. Zvakafananavo no Mwana wake. Tinojija kuti ngo mushamaiso, Jesu wakarapa mapere, njwiti, mapofu kubatanija vaiwoma divi rimwe. (Verenganyi Mateu 4:23, 24; Jo. 9:1-7) Zvinovangisa maningi, kuziva kuti kurapa kwakaita Jesu, i cikhombijo co zviro zvizinji zvaacazoita mu nyika imbza. Perapo “apana na umwe wo vagari vo guta angazonanga kuti: ‘Ndiri kuhwaja.’”—Is. 33:24.

⁵ Tinodikana kusoterera kuna Mwari na Jesu kuti vatirape ngo mushamaiso nyamasi uno here? Mavonero api otingaita ndhendha huru no zvineso zvo muviri, zve tingaitenyi ngo pamusoro pazvo?

6. Ngo zvapi zvatinoziva ngo pamusoro po ‘zvipuo zvo  . . .  kurapa’ zvaiitwa ngo maKristu amweni o kutanga?

⁶ Tinozviziva kubvira mu Bhaibheri kuti mu zana ro kutanga ro makore, Mwari wakatendera kuti maKristu amweni akazojwa aite mushamaiso. (Mait. 3:2-7; 9:36-42) Pakati po “bzipuo bzokusiana-siana” zvo mujimu, painga pano ‘zvipuo zvo . . . kurapa.’ (1 Kor. 12:4-11) Asi zvipuo zvondhozvo, kubatanija no zvimweni, zvakadari inga kuvereketa ngo ndumi kana kuphorofita, zvaizova zvinokasika kupera. (1 Kor. 13:8) Azvicawaniki nyamasi uno. Ngo kudaro, atina thangwe riri rese ringatiita kuti tivetere Mwari kuti aite mushamaiso jo kutirapa kana kurapa vadiwa vedu.

7. Nduyo 41:4 inopekeja cigondiso capi cinovangisa?

⁷ Pikija zvakadaro, kudari tikahwaja, tingasoterera kuna Mwari kuitira kutondhojwa, ungwaru, no kubesehwa inga zvaiita vanamati vo cokwadi vo kare. Mambo Dhavhidhi wakatara kudari: ‘Anomucena wiya anobesa murombo; mu njiku yo khombo, [Jehovha] Mwari anomuponesa. [Jehovha] Mwari anomungwarira; anomupa uhomi no kudakara mu nyika, aamupi mu nyarajo vavengi vake!’ (Ndu. 41:2, 3) Tinozviziva kuti, mundhu ari wese wairarama ecikhombija kudakarira varombo mu njiku ya Dhavhidhi, aazivi kuramba ecirarama mbhera na rini. Ngo kudaro, Dhavhidhi aacairevera kuti mundhu waibatikanaro, waizoramba ecirarama ngo njira yo mushamaiso, asi wairevera kuti vanozowana upenyu ucikaperi. Tingatora masoko aya akafemehwa, inga kuti ari kurevera kuti Mwari waizobesera vanonasa kubatikana ngo vamweni. Kuitisa kudini? Dhavhidhi wakasanangura kudari: ‘[Jehovha] anomuvangisa pa bonde paanohwaja, anozomununura kuhwajihwa kwake.’ (Ndu. 41:4) Hina, mundhu ari wese waitaja varombo, waidikana kuziva kamare kuti Mwari aacaizokanganwa iyena no zviito zvake zvo kugondeka. Zvecivoneka kuti Mwari wakatipa muviri unokwanisa kumusijirikazve, mundhuwo waizokwanisa kuitazve nane pa ndhendha yake.

8. Mukuzwirana na Nduyo 41:4, Dhavhidhi wakapsakenyi kuna Jehovha?

⁸ Dhavhidhi wakavereketa kubva pano zvaaiziva eciti: “Ndainanga kuti: ‘[Jehovha] Mwari, ndiitirenyi unyaxa!’” (Ndu. 41:5) Kangaije Dhavhidhi wakatara ngo pamusoro po nguva iyo Abhusaromu waieja kupamba cigaro cake, paainga ecihwaja no kukonehwa kuhwisana no mugariro  wondhowo. Pikija no kuashira kuregerehwa kunobva kuna Mwari, Dhavhidhi aazivi kukanganwa cishaishi cake caakaita na Bhati-shebha zve muviyo Waco. (2 Sam. 12:7-14) Asi pikija zvakadaro, mambo wainga ecigonda kuti Mwari waizomukorondha paaihwaja. Asi zvinoreva kuti Dhavhidhi wakakumbira kuraphwa ngo mushamaiso kana kukumbira kuti upenyu hwake urebeswe here?

9. (a) Zvakaitikira Dhavhidhi zvakasiana kudini no zvakaitikira Mambo Ezekia? (b) Dhavhidhi wakaveterenyi kubva kuna Mwari?

⁹ Papera makore, Mwari wakakheta kurapa Mambo Ezekia, uwo “wakahwaja ndhenda yaida kumuuraya.” Pa shwiro iyi icikanasi kuzivikanwa, Mwari wakanghwinira. Ezekia wakaita nane zve wakararama makore 15. (2 Maj. 20:1-6) Asi, Dhavhidhi aazivi kuita mukumbiro kuna Mwari kuti amurape ngo mushamaiso. Asi kuzwirana no zvinonangwepo, Dhavhidhi waida kuti Mwari amuitire zvaakanangaya kuti anoitira vaya vanotaja vamweni. Izvi zvinobatanija kuva ecikorondhwa ‘pa bonde paaihwaja.’ Ngo kuti cishaishi ca Dhavhidhi cainga ceciregerehwa, iyena waidikana kukumbira Mwari, uwo waizomutondhoja no kumubesera zve kuitira kuti upfumi hwo kunyama wo muviri wake umuitise nane. (Ndu. 103:3) Itusu tingaitavo mu njira yakafanana.

10. Tingaguma pa mbhejiso yapi kubva pano zvakaitika kuna Torofimo na Epaforodhito?

¹⁰ Kudarivo inga ndi Dhavhidhi, uwo acizivi kuraphwa ngo mushamaiso zve kuengejehwa upenyu hwake, ndizvonavo zvakaitika na Torofimo, umwe wo vashandi doni vo mupostori Pauro. Tinozviziva kuti mu nguva jimweni Pauro waipuwa simba ro kurapa. (Verenganyi Maitiro o Vapostori 14:8-10.) Iyena wakaitira izvi “baba wake Públio [avo] vaivata pabonde, vaipisa muviri, no nyoka jokuenda.” Pauro ‘wakanamata [kana kuita mukumbiro], womucanjikira nyara, womurapa.’ (Mait. 28:8) Asi Pauro aazivi kuita zvimwezvo na Torofimo, uwo waaifamba naye mu hwendo hwo umisionario. (Mait. 20:3-5, 22; 21:29) Torofimu paakahwaja, aazivi kuramba ana Pauro, mupostori aazivi kumurapa, iyena wakamusia ku Mireto eciraphwa. (2 Tim. 4:20) Mukufanana, Epaforodhito paakatanga ‘kuhwaja, phedo no kufa’ painga pacina zvaikhombija kuti Pauro waizoshandisa simba ro zvishamaiso kuti arape shamwari yake yakanaka.—Fil. 2:25-27, 30.

11, 12. Ngenyi Ruka waikwanisa kuva mubeseri wokadi wa Pauro, zve tingati kudini ngo pamusoro po zvikwaniriso zvake?

¹¹ “Luka, murapi wakadikwa,” mutari wo bhuku ro Maitiro o Vapostori, wakafambavo na Pauro. (Kol. 4:14; Mait. 16:10-12; 20:5, 6) Zvakareruka kutenda kuti Ruka waipa Pauro mazano o kurapa, waimuitira mabasa o kurapa kubatanija no vamweni mu cikwata cake co mamisionario. Ngenyi Ruka waidikana kuita zvondhozvo? Ngo kuti pikija Pauro paainga ecifamba waihwajavo. (Gal. 4:13) Ruka waizodikana kupekeja besero ro kurapa rainga recizwirana no zvakananga Jesu kuti: ‘Asipi vakavanga vanoda murapi kaveta vanohwara.’—Luka 5:31.

¹² Bhaibheri arikhombiji kuti ndi rini zve ndi kwapi kwakaashira Ruka rovejo yo kurapa. Zvinotonangwa kuti Pauro wakabvunja maKristu o ku Korose basa ra Ruka, inga dhokodheya, ngo kuti ivona vaimuziva. Zvinodakajisa ngo zvo kuti, kondhoyo kwainga kuno cikora co zvo kurapa phedo no Raodhisea. Azvinenyi no kuti cokwadi cakona ngo capi, Ruka wainga aciripi umwe wo vacikazivi kurovejwa, aacaibvunja vandhu gogomejero yo uhomi yo kunyepa, iyena wainga ari murapi. Izvi zvinovoneka pa mativi maviri, kubvira pa magama aaishandisa o kurapa mu Vhangeri rake zve kubvira ku njira yaakakhombija ndiyona kurapa kwaiita Jesu vamweni, mu bhuku ro Maitiro o Vapostori.

13. Mavonero api akaezanana akafanera ngo pamusoro po ndhungamiriro jo uhomi?

¹³ Itusu atiripi kurarama mu nguva yokuti vadoni vedu vo ciKristu vangashandisa “cipuo  co kurapa” kuitira kutirapa. Asi hama jimweni no kuda kwese, jinopa ndhungamiriro jokurapa jicizivi kukumbihwa, pikija kutozviita ngo kuvangisira. Ngo zvokadi kuti, mundhu angapekeja ndhungamiriro jinotendehwa zve jinoshanda. Pauro wakaita kudaro Timoti paaihwisana no zvineso zvo kuhwaja mundani, kangaije ngo ndava yo kumwa yo mu ndharaudha yainga yakasvipa. * (Verenganyi ¹ Timoti 5:23.) Asi izvi, zvakasiyana kamare no kuvangirija capupu doni kuti cishandise ndhumbu, mutombo, kana mahire amweni okuti angakhuvaza kamare. Mu nguva jimweni, mazano anopekejwa ngo maitiro aya: ‘Hama yangu yainga no ndhendha yakaezana, zve wakashandisa wakati . . . Perepo iyena wakatamba.’ Azvinenyi kuti mazanowo ngo o mwoyo wese, tinodikana kuramba no murangariro wo kuti, nguva jimweni angaviisa muviyo jakashata.—Verenganyi Mazwi Akangwara 27:12.

14, 15. (a) Vandhu vamweni vanovona kuhwaja ko vamweni inga nguva yo kuitenyi? (b) Mazwi Akangwara 14:15 inobeseresa kudini pa ndhungamiriro jo uhomi?

¹⁴ Itusu maKristu tino cido catakabahwa naco, co kuva no uhomi, kuitira kuti tibuse upenyu zve tive no kubatikana kwakazara mu basa ra Mwari. Pikija hazvo takagara utaka hwo kutama kukwana, inga zvinovoneswa ngo kuva kwedu tecineseka ngo ndhendha. Patinohwaja, kangaije vanotikhwederera no kutirapa vazinji. Mundhu umwe nga umwe anodikana kukheta kuti ngo capi caangatenda kana kuramba. Zvinosuruvarisa ngo zvo kuti mu nyika ino yo makaro, kuno vaya vanovona kuhwaja ko vandhu inga mukana wo kuwana mare. Vanoita nyagoso yo “kurapa,” kazinji ngo kunanga zvokunyepa kana ngo kuita ufakazi unoita inga wokadi. Ku mundhu ari kuhwaja, uwo anonga acicina zano, ecipsaka kutondhojwa kana kupsaka njira kuti ararame nguva yakareba, ‘marapiro’ aya angamavona inga akanaka. Asi, atidikani kukanganwa kuti, Soko ra Mwari rinotingwaja kudari: “Benji rinotenda bzese bzo rinozwa, mungwari anovonesesa gwanja rake.”—Mazwi 14:15.

¹⁵ “Mungwari” anozongwarira, kudari ‘bzaanozwa’ kana mazano aanopuwa, anobva ku mundhu acikathembeki kuti anokwanisa kurapa. “Mungwari” angarangarira kudari: ‘Iyena wananga kuti vhitamina, ndhumbu, pomwe no mahire aya, angabesera mundhu, asi pano ufakazi unovonesa kuti ndizvonadi here?’ Vandhu vakasiana. Pano mathangwe akawanda anoita kuti ndithembe kuti izvi zvingandibesera here? Ndinodikana kuita zvizinji kuti ndipsakisire kana kubvunjisa vamweni vanozivikanwa ngo kuva veciroveja kana vakakwaniriswa mu basa iri here?

16. Mubvunjo japi jatingavona jingatibesera kuti tikhombije kuva no “murangariro jakanaka” ngo pamusoro po ndhungamiriro jo uhomi?

¹⁶ Soko ra Mwari rinotingwaja kuti ‘tirarame no murangariro wakanaka . . . pakati po mugariro uno wo zviro.’ (Tito 2:12, Shanduro yeNyika Itsva) Kuva no ‘murangariro wakanaka’ kana hwiru, zvinodikana kamare kudari marapihwe atiri kubvunjwa ari kuvoneka inga anobatanija mutango-mutango kana acikazivikanwi. Murapiwo kana mundhu ari kuzvinangaro, angakwanisa kusanangura zvakakwana ngo pamusoro po maitihwe azvo here? Marapihwe ondhowo anozwirana no zvinozivika ngo vazinji zve vaya vanokwanirisa vanozvithembavo here? (Mazwi 22:29) Kana kuti i marapihwe anodakajisa hao basi? Kangaije marapihwe ondhowo anonangwa kuti akafumbhuhwa kana anoshandiswa mu ndau jo mukati kamare, ecivoneka inga kuti aaziviki ngo vapsakisiri vo mu nguva ino. Kureva kuti zvinonangwaro zvinopa ucapupu wo kuva no ciri cese cakanaka here? Mucini jimweni jinoshandiswa kuitira kupopora kana kurapa, jinonangwa inga jinoshandisa ‘simba  ro muviri.’ Izvi zvinodikana maningi kubhasopa ngo kuti Mwari anotingwaja kuti atidikani ‘kushandisa simba ro masaramuso’ no ro mabeze.—Is. 1:13, Shanduro yeNyika Itsva; Dt. 18:10-12.

17. I cido capi cakaezanana catinodikana kuva naicona?

¹⁷ Mu zana ro kutanga ro makore mukhumbi unotonga wakatumira karata inosisira ku ungano. Pasure po kundandanisa zviro zvinodikana kuregehwa ngo maKristu, karata yondhoyo yaipejisira ngo kunanga kudari: “Mukateveja ibzi, munoita bzakanaka. Saranyi uxoni.” (Mait. 15:29) Masoko akashandiswa pakupejisira, awo ari magama o kuengejera pa kupejisira, anganangwavo kudari “vanganyi.” Zvokadi kamare tiri kuda kubudirira mu kugara “bzakanaka” kana kuva no uhomi hwakanaka.

18, 19. Cicinyi catiri kuvetera mu nyika imbza?

¹⁸ Zvecivoneka kuti mugariro uno wo zviro ucindoripo zve itusu atizivi kukwana, kuhwaja ticiri kundohwisana nako. Atingaveteri wari kuraphwa ngo maitiro o mushamaiso. Asi, Apokalipsi 22:1, 2 inonangira nguva yatinozoraphwa ngo maitiro akaperera. Mupostori Johani wakava no civoniso co “murambo wo kumwa yo uhomi [kana upenyu]” no “miti yo uhomi [kana upenyu]” ino masakani “anorapa vandhu.” Izvi azvicaida kurevera ndhumbu kamare yo mu nguva ino kana yo kumbeji. Kusiapo izvo, iyona inokhombija nasiriro ya Jehovha yo kupa upenyu hucikaperi kuno vanozwira ecishandisa Jesu Kristu—zvokadi ciro catingavetera kamare.—Is. 35:5, 6.

¹⁹ Patinonga tecivetera kumbeji kunoshamisa, tinoziva kuti Jehovha anodakarira umwe nga umwe wedu pacake, pikija patinonga tecihwaja. Inga ndi Dhavhidhi, tingathemba kuti Mwari wedu acatikorondha patinonga tecihwaja. Zve kudarivo inga ndi Dhavhidhi, itusu tingananga kuti: ‘Inini makandingwarira ngo ndava yo kugondeka kwangu; mucandidira pamberi penyu mbhera na narini.’—Ndu. 41:13, Shanduro yeNyika Itsva.