Hina, ngokuti besero raushoni rinovha kuna “Mwari, anonyaraja vakasuruvara.”—2 Vakorinte 7:6.

•   Anopa simba. Mwari “anoembezera no kumuvangisa” kuciripi ngo kuvhisa zvineso zvenyu, asi ngo kudavira mukumbiro jenyu pamunoda simba ro kuhwisana no kusuruvara. (Vafiripi 4:13) Mungava no cokwadi co kuti iyena wakanasiririka kuti amuzwe, ngokuti Bhaibheri rinoti: “Tenji Mwari ari phedo no mwoyo yakakhuvazwa; anoponesa vese vakapera simba.” (Nduyo 34:19) Zvokadi kamare, Mwari anokwanisa kuzwa mukumbiro wenyu pikija mucikakwanisi kunanga zviri zvese.—Varoma 8:26, 27.

•   Anopa muezaniso jakanaka. Mutari umweni wo Bhaibheri wakakumbira kudari kuna Mwari: “Ndiri mu ujiki ndinokhuwira komuri, Tenji Mwari.” Ciro cakabesera mutari wo nduyo iyi kuti ahwisane no kusuruvara kwake, ikuceukija kuti Mwari anoda kuregerera zvishaishi zvedu. Iyena wakati: “Mukaverenga bzixaixi, Tenji Mwari, Tenji, ndiani angararama? Asi komuri huriyo rukunguriro kuti timureremeje.”—Nduyo 130:1, 3, 4, Biblia Mazwi A Mwari.

•   Anopa vetero. Kusiyapo kutiembezera wari uno, Mwari anogondesa kupeja zvineso zvese zvinotiita kuti tisuruvare. Paanozokwanirisa cigondiso ici, “bzo kare abzizocerecejwibze [kubatanijavo kusuruvara, nee] abzizodihwibze mu mwoyo.”—Isaia 65:17.

 Masoko okuengejera: Pikija Zvapupu zva Jehovha zvinoziva kuti Mwari anokwanisa kubesera, izvona zvinoendavo kushipitari kopsaka besero ro mamedhiko pavanova no ndhendha jakadari inga kusuruvara. (Marko 2:17) Asi atikwanisi kunanga kuti mutombo uwu unozwirana no ndhendheyo. Ngo kudaro, tinovona zviri nane mundhu umwe nga umwe ateme zvivaringo zvake ngo pamusoro po shwiro iyi.