‘Kubhuya ndumi’ jakasiyana, cainga ciro cinoshamaisa cainga no Makristu manganani o munguva jo vapostori. (Mabasa o Vapostori 10:46) Kukwanisa kwavo kubhuya ndumi jakasiyana, kwaivatendera kuti vakwanise kubhuya ndumi pikija avatozivi kuijijira kareko. Pavaibhuya ndumi iri yese, zvaiita kuti vandhu vaibhuyaro ndumiyo vazwisise ngo kukasika zvavaingaro vecibhuya. (Mabasa o Vapostori 2:4-8) Ngokudaro, kubhuya ndumi jakasiyana cainga cipo caivha ku mujimu mucena, cakapuwa Makristu manganani mu nguva yo vapostori, ndi Mwari.—Vahebheru 2:4, 1 Vakorinte 12:4, 30.

•  Kubhuya ndumi jakasiyana, kwakatanga rini? Kwakatangisa kudini?

•  Ngocapi cainga cinangwa co kubhuya ndumi jakasiyana?

•  Kureva kuti vandhu vaizoenderera mberi vecibhuya ndumi jakasiyana?

•  Kubhuya ndumi jakasiyana kwakapera rini?

•  Kunanga kuti nyamasi uno vandhu vanokwanisa kubhuya ndumi jakasiyana?

•  Tingazivisa kudini Makristu o cokwadi?

 Cishamaiso ici cakatanga kuitika mu Jerusarema co mangwanani pa mutambo wo Pentekoste mu gore ro 33 Kristu Aviya. Vajiji va Jesu vanokwana kuita 120 vainga vakaungana, apo “vakazara ngo mujimu mucena, votanga kuvereketa ndumi jakasiyana-siyana.” (Mabasa o Vapostori 1:15; 2:1-4) Mutengo wakawanda wo vandhu vaivha ku majinja akasiyana-siyana vakaungana “umwe na umwe waivazwa vecivereketa ndumi yake kamare.”—Mabasa o Vapostori 2:5, 6.

1.   Kwaivonesa kuti Makristu vainga vandhu vakasanwa ndi Mwari. Kare, Mwari wakamboita mushamaiso kuitira kuvonesa kuti wainga ecibesera vashandiri vake vakagondeka. Inga muezaniso, iyena wakaita zvondhozvo na Mosi. (Exodo 4:1-9, 29-31; Bziverengo 17:10) Mukufananavo, cinangwa co kuvereketa ndumi jakasiyana cainga co kuvonesa kuti Mwari wainga ecibesera ungano yo Cikristu yainga yapera kuumbwa. Mupostori Pauro wakatara kudari: “Ndumi asipi citatijo ku vandhu vanotenda, asi citatijo ku vandhu vacikatendi.”

2.   Kwaibesera Makristu kuti anase kucumaera. Vaya vakazwa vajiji va Jesu vecivereketa pa njiku yo Pentekoste, vakati: “Asi tiri kuvazwa vecibhuya ngo ndumi jedu ngo pamusoro po mabasa o simba a Mwari.” (Mabasa o Vapostori 2:11) Cinangwa cikuru co mushamaiso uwu, cainga co kubesera Makristu aya kuti aite “ucapupu hwakaperera” no ‘kujijisa vandhu vo majinja ese,’ inga zvakananga Jesu. (Mabasa o Vapostori 10:42; Mateu 28:19) Vandhu vanokwana kuita 3000 vakavona mushamaiso uwu no kuzwa zvainga zvecinangwa mu ndumi yavo, vakava vajiji pa njiku yondhoyo kamare.—Mabasa o Vapostori 2:41.

 Haiwa. Zvipo zvo mujimu mucena, kubatanijavo kubhuya ndumi jakasiyana, zvainga zvo nguva shomani. Bhaibheri rinoti: “Kudari kuno zvipo zvo kuporofeta, zvinozopera; kudari kuno zvipo zvo kuvereketa ngo ndumi jakasiyana-siyana, zvinozopera.”—1 Vakorinte 13:8.

 Kazinji, vamweni vaipuwa zvipo zvo mujimu mucena ngo vapostori kamare. Ivona vaicanjikira nyara kuno Makristu amweni perapo ivona vaiashiravo zvipo izvi. (Mabasa o Vapostori 8:18; 10:44-46) Zvinovoneka inga kuti vaya vaiashira zvipo izvi zvo mujimu mucena ngo vapostori, avacaikwanisa kuzvipekejavo vamweni. (Mabasa o Vapostori 8:5-7, 14-17) Tingazviezanisa kudari: Mundhu paanoashira karata yake yo kufambisa karu, azvirevi kuti iyena waakutokwanisavo kupekeja vamweni karata jo kufambisa ndijona karu. Ngo kudaro, cipo co kuvereketa ngo ndumi cakapera vapostori no vaya vakaashiraya cipo ici kuvha ku vapostori, povakapera kufa.

 Cipo ici cinoshamaisa co kubhuya ndumi jakasiya-siyana cakapera mu zana ro kutanga ro makore. Ngo kudaro, nyamasi uno apana angakwanisa kunanga kuti anokwanisa kubhuya ndumi jakasiyana ngo simba ra Mwari. a

 Jesu wakananga kuti ciro caizovonesa kuti ava ndi vajiji vake, irudo. (Johani 13:34, 35) Mupostori Pauro wakajijisavo kuti Makristu o cokwadi vaizozivika maningi ngo kukhombijirana rudo. (1 Vakorinte 13:1, 8) Pauro wakananga kuti mujimu wa Mwari waizobara mugariro jaushoni kuno Makristu. Mugariro jaizobahwaro jinodanijwa kuti “mucero yo mujimu.” Wokutanga wakona irudo.—Vagaratiya 5:22, 23.