Hina ringabesera. Mwari anoneseka apo mushandiri wake panohwaja. Bhaibheri rinogondisa kuti: “Tenji Mwari anomuvangisa pa bonde paanohwaja.” (Nduyo 41:3) Kudari murikupona no ndhendha icikaperi, zviro zvinotevera zvingamubesera:

1.   Itanyi mukumbiro mecikumbira simba kuti mucungirire. Imwimwi mungawana “rugarisiko hwa Mwari hunopinda uzivi hwese” uwona ungaita kuti mutame kuthimwa-thimwa maningi no kumubesera kuti mucungirire.—VaFiripi 4:6, 7.

2.   Ivanyi no mavonero aushoni. Bhaibheri rinoti: “Mwoyo wakadakara unodakajisa muviri; mwiha wakacamwa unoomesa maphondo.” (Mazwi Akangwara 17:22) Jijiranyi kuva makadakara, kuciripi kudakara basi mu njiku jomakanyangwa, ngokuti kugara makadakara kunomuita ushoni uhomi wenyu.

3.   Vangisanyi rutendo hwenyu wo kumbeji. Kuva no soterero kana vetero yakavanaga zvingamubesera kuti muve no mudakaro pikija muno ndhendha icikaperi (VaRoma 12:12) Bhaibheri rinonanga kuti unozoguma mukuvo wo kuti akuna mundhu anozonanga kuti: “Ndiri kuhwaja” (Isaia 33:24) Mwari acazorapa ndhendha jicikaperi, zviro zvicikakwanisiki kuizwa ngo siensia yo wari. Inga muezaniso, Bhaibheri rinonanga ngo pamuso po mukuvo wo kuzogarazve majaha: “Muviri wake unozovangiswabze inga kare, wozohwirira ku mukuvo wo ujaha hwake.”— Jobe 33:25.

 Vonanyi: Pikija tinoziva kuti Mwari anobesera, Zvapupu zva Jehovha zvinopsakavo marapihwe o ndhendha jicikaperi. (Marko 2:17) Asi atikheteri marapihwe aanodikana kuiitwa mundhu, ngokuti mundhu umwe na umwe anodikana kusana ega marapihwe aanoda kuitwa ngo pamusoro po shwiro iyi.