Ndiani anodikana kujijisa vana ngo pamusoro po zvovatano? Bhaibheri rinopa vabari mutoro uu, zve vazinji vakona vakavona kuti mazano anotevera anoshanda, okuti:

•  ● Mucadopseruka. Bhaibheri rinobhuya zvakajeka ngo pamusoro po zvovatano no zvomagariro o mundhu, zve Mwari wakabvunja jinja ro vaIziraeri kuti “vana” vanodikana kujijiswa shwiro iji. (Deuteronòmio 31:12; VaLevi 15:2, 16-19) Mungashandisa magama o kureremeja, acikaitisi kuti zvovatano kana mativi akafishika o muviri ave anopseruja.

•  ● Jijisanyi padoko-padoko. Kusiyapo kuita mabhuyo akareba, o mukuvo umwe, no mwana wenyu paanonga woda kuthukuja kana kuaruka, mubvunjenyi cimwe nga cimwe paanondokwanisa kuzwisisa shwiro iji.—1 VaKorinte 13:11.

•  ● Jijisanyi ndhungamiriro jo mufambiro. Zvikora zvingajijisa vana ngo pamusoro po zvovatano. Asi, Bhaibheri rinovangisa vabari kuti vajijise vana vavo haiwa kuvajijisa basi ngo pamusoro po zvokuita zvopabonde, asi vanodikana kujijiswavo ngo pamusoro po murangariro no mufambiro waushoni wo zvovatano.—Mazwi Akangwara 5:1-23.

•  ● Purukiranyi mwana wenyu. Mucakharamusa kana kukasika kuguma pa mbhejiso, kudari mwana wenyu akamubvunjisa ngo pamusoro po zvovatano. Kusiyapo izvo, munodikana ‘kukasika kupurukira, mononoka kuvereketa.’—Jakobo 1:19.

Kujivirira komungaita vana venyu kuti vacadojipwa

•  ● Psakanyi kuziva. Psakayi kuziva kuti vanojipa vana vanoshandisa mazano api.—Mazwi Akangwara 18:15; vonanyi cipauko  32 co bhuku Mibvunzo Inobvunza Vechiduku​—Mhinduro Dzinoshanda, Volume 1.

•  ● Sotesesanyi zviri kuitikira mwana wenyu. Mucatendera kuti mwana wenyu avonerehwe ngo mundhu womucikazivi mugariro jake, zve mucatendera kuti mwana wenyu ave ‘anoregehwa wakadaro.’—Mazwi Akangwara 29:15.

•  ● Jijisanyi mavonero akaezanana o kuzwira. Vana vanodikana kujija kuzwira vabari. (VaKorose 3:20) Asi, kudari mukajijisa mwana kuti mukuvo wese anodikana kuzwira mukuruwane ariwese, munomuita kuti aungwiswe maningi. Vabari vo ciKristu vangabvunja mwana wavo kudari: “Kudari mundhu akakubvunja kuti uite ciro cinozwi cakashata ndi Mwari, ucaita.”—Mabasa o Vapostori 5:29.

•  ● Jijiranyi no mwana mazano akareruka o kuzvijivirira. Beseranyi mwana wenyu kuti azive zvaangaita kudari ariwese akaeja kumuita ciro, imwimwi mucipo. Jijiranyi umwe mugariro unomupa cicunge co kunanga kuti: “Andizvidi zvondhozvo! Ndinokunangira!” zve atize ngo kukasika. Zvecivoneka kuti vana avanesi kukanganwa ciro, munodikana kuceuja mwana wenyu “mukuvo no mukuvo.”​—Deuteronòmio 6:7, Contemporary English Version.