•  Kuvonesa mundhu inga unomuda zvinoda kurevenyi?

•  Ngenyi vamweni vanozviita?

•  Ingozi yapi ingavepo ngo kuzviita?

•  Zvinonanga vocikodo vamweni ngo pamusoro pazvo

 Kuvonesa mundhu inga unomuda zvinoreva kuita cimwe ciro cinovonesa kuti uri kuda umwe mundhu. Zvakashata here kuzviita? Nguva jimweni azvizivi kushata. Inga muezaniso, umweni musikane wakananga kudari: “Kudari wanasirira kuti unamorari, woenda koowana mufana wauri kuda, unodikana kuti uvonese kuti unomuda, kuitira kuziva kuti iyena anokudavo here kana kuti haiwa.”

 Asi, pamusoro uno tiri kuda kubhuya ngo manera akashata okuvonesa mundhu inga unomuda, tiri kureva paya mundhu paanonyepejera inga ari kuda umwe mundhu asi zvokadi kamare acikamudi.

 “Cimweni ngo cokuvonesa mundhu inga unomuda ngo kuti unonga wecitoda kunamorari naye kamare. Asi cimweni ngo cokuvonesa mundhu inga unomuda asi perapo kakumubatija buwe ngokuramba kuti auzivi kumbovonesa kuti unoda kunamorari naye.”​—Deanna.

 Vamweni vavozviita kuitira basi kuti vavoniwe. Musikane umweni anozwi Hailey anoti: “Musikane paanoziva kuti anokona kuita zviro zvingasiya mufana ecitambujika, iyena angatoda kuti azviitire vafana vazinji.

 Asi kujivonesa inga uri kuda umwe mundhu asi ucikamudi zvakaperera, unonga wecikhuvaza mazwiro o mundhu wiya. Kudari wecizviita wecizviziva, kuitira kujivonesa kuti aubviri, izvi zvinonga zvecivonesa kuti auto waibva. Bhaibheri rinoti: “Upenji hunodakajisa mundhu acina hwiru.”​—Mazwi Akangwara 15:21.

 Ngokudaro, Hailey wakati: “Zvingavoneka inga kuti kuvonesa mundhu inga unomuda azvina ndhango iri yese, asi kazinji zvinosiya mundhu akakhuvazika.”

•   Kuvonesa mundhu inga unomuda zvinokhuvaza mavonekero ako.

   “Mundhu anogara ecivonesa vandhu inga anovada aakoni kujibata. Kunja ko kutama kugondeka iyena anoda basi kukushandisa.”​—Jeremy.

   Bhaibheri rinoti: “Rudo . . . ahupsangi kuda kwahwo.”​—1 VaKorinte 13:​4, 5.

   Amborangarirai basi: Mugariro wapi kana magama zvaunodikana kusiya kuti ucazivikanwa ngo kuvonesa vandhu inga unovada?

•   Kuvonesa mundhu inga unomuda zvinokhuvaza umweni mundhu.

   “Ndinoda kuti ndigare ndhambo no vafana vanovonesa inga vanondida! Zvinovoneka inga kuti ivona vanobhuya basi neni ngo kuti ndiri musikane. vafana ava avaripi kuzviita ngo kuti vanondidadi kamare. Asi, zvovanoda basi kujidakajisa pacavo.”​—Jaqueline.

   Bhaibheri rinoti: “Mucadopsanga bzenyu basi. Rangariranyi bzo vamwenivo.”​—1 VaKorinte 10:24.

   Amborangarirai basi: Aripo wakambovonesa kuti waikuda, asi pakupejisira wozoenda koovona kuti aacaikuda ngo mwoyo wese here? Wakazwa kudini powakaziva izvi? Hino ungaitisa kudini kuti ucakhuvaza umweni mundhu inga manera owakaizwaro?

•   Kuvonesa mundhu inga unomuda kunoita kuti ucawana mundhu wokurovorana naye.

   “Azvicaizomboviyazve mumurangariro mangu kuda kunamorari no mundhu anogara acivonesa mundhu ari wese inga anomuda. Zvingaitisa kudini kuti ndide mundhu anonyepa kuti anondida? Azviiti kuthemba mundhu wakadaro?”​—Olivia.

   Mu Bhaibheri, Dhavhidhi mutari wo nduyo anoti: “Andifambi no vacengeji.”​—Nduyo 26:4.

   Amborangarirai basi: Kudari ukavonesa inga unoda umwe mundhu, mundhu ano mugariro jakadini angakuda? Hino ndiwona mushovo wo mundu waunoda kuvonesa inga unomuda here?