Zvapupu zva Jehovha azvireremeji njiku yokubahwa ngo kuti tinoziva kuti kuireremeja akudakaji Mwari. Pikija hazvo mu Bhaibheri apana panonasa kujekesa kuti kureremeja njiku jo kubahwa kwakashata, cinotibesera kuziva kwakatangira zviitiko izvi zve no kuziva mavonero a Mwari ngo pamusoro pazvo. Vonanyi mativi marongomuna no zviambi zvo Bhaibheri zvinotikhohwesa kuti ticareremeja njiku iyi.

1. Kureremeja njiku yokubahwa kwakabva kumahedheni. Mukuzwirana no Funk & Wagnalls Standard Dictionary of Folklore, Mythology, and Legend, kureremeja uku kwakatanga ngo kutenda mukubahwa ko mundhu, “mujimu jakashata jinova no mukana wokuwira vari kureremejaro” perepo “shamwari jinonga jiripo pomwe no magama okutenda ngo mwoyo wese, zvinobesera pa kujivirira wiya ari kureremejaro.” Bhuku The Lore of Birthdays rinonanga kuti munguva yokare, kuceukija njiku yo kubahwa kwainga “kuno mutengo mukuru maningi kuitira kuti pajijwe magariro o nyika anonga aripo panguva inobahwaro mundhu” asi zvese zvakacijikira pa “siensia inotendera kuti kuno simba ricikavoneki ringakwanisa kupekeja zvitatijo mundhu.” Bhuku rinoengejerazve kuti “vandhu vanotenda kuti vhera [kana zvibani] zvinoshandiswa pa njiku inobahwa mundhu, zvinoshandiswa ngo njira yomasaramuso anoshamaisa kuitira kuti zvese zvinokumbihwa pondhopo zvitendehwe.”

   Asi Bhaibheri rinorambisa kushandisa masaramuso, vafemberi, kuita zvomujimu, kana ciri cese cakadari inga “ibzi.” (Deuteronòmio 18:14; VaGalàsia 5:​19-​21) Inga muezaniso, thangwe rakaita kuti Mwari apanice dhorobha ro Bhabhironiya rokare, rainga rokuti vaigaremo vainga vano mukhuva wo kunangira zvokumbeji, inova imweni njira yo kufembera. (Isaia 47:11-​15) Zvapupu zva Jehovha azvineseki maningi ngo kuda kuziva kwakatangira mukhuva uri wese unoizwa, asi cinoita ngo cokuti kudari Bhaibheri recitipa zvimwe zvitatijo zvinovonesa kuti atidikani kuteveja mukhuveyo, atitevejidi kamare.

2. MaKristu okutanga aazivi kureremeja njiku jokubahwa. The World Book Encyclopedia rinonanga kuti maKristu “aivona inga mukhuva wocihedheni kureremeja njiku yokubahwa yo mundhu ariwese.” Bhaibheri rinovonesa kuti vapostori no vamweni vakajijiswa kamare ndi Jesu vakasiya ndhungamiriro jinodikana kutevejwa ngo maKristu ese.​—2 VaTesalònika 3:6.

3. MaKristu anodikana kuramba ecibatikana basi ngo kucerekeja kufa kwa Jesu​—haiwa kubahwa kwake. (Luka 22:17-​20) Izvi azvidikani kutishamaisa ngo kuti Bhaibheri rinoti ‘njiku yo kufa iri nane kupinda njiku yo kubahwa.’ (Mucumaeri 7:1) Paakapeja upenyu hwake pasi pano, Jesu wakaita zina rakanaka ngo kuita kuti njiku yake yokufa ive inosisira maningi kupinda njiku yake yokubahwa.​—Vaheberi 1:4.

4. Mu Bhaibheri apana panombonangwa kuti mushandiri wa Mwari wakareremeja njiku yokubahwa. Zvokadi muBhaibheri amunadi kamare, asi munonangwa basi vandhu vaviri vainga vaciripi vashandiri va Mwari vakareremeja kubahwa kwavo. Cinozwisa urombo ngocokuti pakureremejwa ko njiku iji pakaizwa zvakashata.​—Genesi 40:20-​22; Marco 6:​21-​29.

Inga zvinoita vabari vese, vabari vari Zvapupu vanokhombijira rudo kuno vana vavo mukati mo gore rese. Vanoita izvi ngo kuvapa zvipo pomwe no mabungaijo anodakajisa. Ivona vanoeja kutevera muezaniso wa Mwari, uwo anopa zviro zvakanaka nguva jese kuno vana vake. (Mateu 7:​11) Zvakanangwa ngo vana vamweni pasi apa zvinovonesa kuti vana vo Zvapupu avazivi kusungika:

• “Zvinopinda kudakaja maningi kupuwa cipo ucikaciveteri.”​—Tammy, wo 12 o makore.

• “Pikija ndicikapuwi cipo pa njiku yondakabahwa, vabari vangu vanondipa zvipo pa nguva imweni. Zvinondidakaja maningi ngo kuti ndinocipuwa ndicikarangariri kuti ndaizocipuwa here.”​—Gregory, wo 11 ro makore.

• “Munorangarira kuti zvimadosi no muzika zvamunowanaro ko gumi ro museswa basi atori mabuso? Viyanyi kumuzi kwangu muvone kuti mabuso anoiziswa kudini!”​—Eric, wo makore 6.