Ngenyi Amutenderi Kudihwa Ngazi?
Manyepo anonangwa ngo vandhu
Kunyepa: Zvapupu zva Jehovha azvishandisi mutombo zve vakahwaja avaendi kucipitari.
Cokwadi: Tikahwaja no voukama hwedu tinopsaka kurapwa kwakanakisisa. Tinopsaka majidhokodheya anokwanisa kurapa no kuceka peresau vacikashandisi ngazi. Tinodakara maningi ngo kuenderera kuri kuitwa ngo divi ro zvokurapa. Zvokadi kamare, kurapa pacikashandiswi ngazi akuripi basi kubesera Zvappupu, asi kuri kutobeseravo vamweni. Mu nyika zinji, mutenda ariwese anokwanisa kukheta kujivirira ngozi jo kudihwa ngazi, jakadari inga ndhendha jinowanika mu ngazi, kudihwa ngazi icikazwirani no muviri no zvimweni zvinopsapsaniswa ngo varapi.
Kunyepa: Zvapupu zva Jehovha zvinotenda kuti gonda rinorapa ndhendha jaanohwaja mundhu.
Cokwadi: Atishandisi mukhuva wokuti ukava no gonda unorapika.
Kunyepa: Marapihwo amweni acikashandiswi ngazi anodhura maningi.
Cokwadi: Marapihwe acikashandiswi ngazi ari baratu. *
Kunyepa: Zvapupu zvakawanda, kubatanija no vana, zviri kufa makore ese ngo ndava yo kuramba kudihwa ngazi.
Cokwadi: Masoko ao aana paakacijikira. Ngokuti vanoceka peresau kazinji vanoita zvinonesa, zvakadari inga kuoperari mwoyo, makarungihwa maphondo no kudira mativi amweni o muviri, vacikadiri ngazi. * Vabari, kubatanijavo no vana vanorapwa vacikadihwi ngazi, vanoita nane kana kutokasika kuvanga kupinda vanodihwaya ngazi. * Ngo maitiro ariyese, apana anokwanisa kunanga kuti mutenda anozofa ngokuti waramba kudihwa ngazi kana anozopona ngokuti waidihwa.
Ngenyi Zvapupu zva Jehovha azvidaviri kudihwa ngazi?
Iyi i shwiro yo zvokunamata kuciripi yo varapi. Testamento Imbza no yo Kare jinonasa kujekesa kuti tinodikanda kuregera ngazi. (Genesi 9:4; VaLevi 17:10; Deuteronòmio 12:23; Maitiro o Vapostori 15:28, 29) Cimwenizve ngo cokuti Mwari anovona ngazi inga inoimirira upenyu. (VaLevi 17:14) Ngokudaro, atiregeri ngazi basi ngokuti tiri kuzwira Mwari, asi ngo kumureremeja inga Mupi wo Upenyu.
Kucinja ko Mavonero
Kuceka peresau mativi anonesa kunobudirira ushoni pacikadihwi ngazi
Kare, vo zvokurapa vaivona kuti kurapa pacikashandiswi ngazi kwakashata maningi, kwakatoezana no kujiuraya, asi mu makore ano zvacinja. Inga muezaniso, mu gore ro 2004, musoro umwe wakabudiswa ngo jhoronari rinobhuya ngo zvouhomi wakananga kuti “marapihwo akabudiswa kuitira kubesera vatenda vari Zvapupu zva Jehovha ndiwona acashandiswa ngo vakawanda pa makore ari kuviyari.” * Umwe musoro uri mu jhoronari rinozwi Heart, Lung and Circulation mu gore ro 2010 wakananga kuti “‘kucekwa peresau pacikashandiswi ngazi’ akudikani kuitihwa Zvapupu zva Jehovha basi, asi kunodikana kuva divi ro kuceka peresau kunoitwa njiku ngo njiku.”
Zviuru zvo majidhokodheya pasi pese anoshandisa marapihwo acikarasi ngazi povanoceka peresau mativi anonesa, vacikazodirizve ngazi imweni. Manera ao o kurapa ari kutoshandiswavo no munyika jakapfuma zve anotokumbihwa ngo vatenda vakawanda vaciripi Zvapupu zva Jehovha.
^ Vonanyi bhuku rinozwi Transfusion and Apheresis Science, Volume 33, No. 3, pheji. 349.
^ Vonanyi The Journal of Thoracic and Cardiovascular Surgery, Volume 134, No. 2, mapheji. 287-288; Texas Heart Institute Journal, Volume 38, No. 5, pheji. 563; Basics of Blood Management, pheji. 2; no Continuing Education in Anaesthesia, Critical Care & Pain, Volume 4, No. 2, pheji. 39.
^ Vonanyi The Journal of Thoracic and Cardiovascular Surgery, Volume 89, No. 6, pheji. 918; no Heart, Lung and Circulation, Volume 19, pheji. 658.
^ Continuing Education in Anaesthesia, Critical Care & Pain, Volume 4, No. 2, pheji 39.
Zvimweni Zvamungadakarira nga Izvi:
MATANGIRO ATINGAITA MU BASA RO KUCUMAERA
Zvapupu zva Jehovha—Ndisu Ani?
Vandhu vazinji vano muvhunjo jakawanda ngo pa musoro po Zvapupu zva Jehovha. Fumbhuranyi cokwadi navo kamare.
NGO PAMUSORO PEDU
Kumbiranyi Kuvhakacihwa
Kuitira kukumbira kuvhakacihwa kuti mubhuisane ngo pamusoro po shwiro jo Bhaibheri kana kuda kuziva ngo pamusoro po urongwa hwedu hwo jijo yo Bhaibheri icikapagahwi, presherinyi forimurariyo iri mu saiti jw.org.