Feel lüür daue mëre snaps, bijr, wijn un aners wat drinke wen sai unruig, alaine sin urer nischt häwe taum måken. Däist duu nuu mër drinke as airste? Wen jå, wat kast duu måke taum dij hule krijge taum ni ümer mër drinke? Wiman’s wek gaur formånen saie wat dij helpe koine.

•  Wätst wat bedüürt ni taufeel drinke?

•  Wosoo kan ik waite of ik taufeel drinke dau?

•  5 daile wat dij helpe koine dij hule krijge un ni taufeel drinke

 Ine Bijbel stäit: “Hul dij ni mank dai wat feele wijn drinke.” (Provérbios 23:20)

 Denk hijr an: Ine Bijbel stäit ni in dat wij nischt drinke döre. (Eclesiastes 9:7) Åwer ine Bijbel stäit wënig drinke, feel drinke un sich dat anwene, is ni oiwerain. (Lucas 21:34, Efésios 5:18 un Tito 2:3) Lijkerst wen dai mësch sich dat ni anwent hät, taufeel drinke kan måke dat dai slecht uutsuiken mökt un kan sijn gesundhët un sijn gaure ümgang mit andrer wat schåre. (Provérbios 23:29 un 30)

 Feel uutgelërte lüür säge oiwer air bits drinke un taufeel drinke. Wosoo waite sai dat? Sai säge dat kümt up an wofeel as dai mësch upe dag drinkt un wofeel dåg as dai upe week wat drinkt. a Åwer jërer mësch is aners. Dårweegen kan beeter sin uutsuike nischt drinke. Dai OMS, grup wat dai gesundhët ine ganse wild uppasst sägt:

 “Sogår 1 urer 2 gläss kan taufeel sin - Soo as...

•   Wen’s duu mit maschijn arbëre däist urer fuirst.

•   Wen dai fruug air klair kind luurt urer wen dat kind borst suuge däit.

•   Wen’s duu wek sort melicin inneeme däist.

•   Wen’s duu wek krankhëte häst.

•   Wen’s duu dij ni hule krijgst wofeel as duu drinkst.”

 Ine Bijbel stäit: “Dat wij uunersuike wat wij måke daue.” (Lamentações 3:40, Bíblia na Linguagem de Hoje, up briånisch)

 Denk hijr an: Taufeel drinke kan dij wat schåre. Dat dat ni mit dij passijrt, is gaud angrüüwle wofeel as duu drinke däist un wëniger drinke wen dat nöörg is. Sai wek daile wat wijse koine dat’s duu dij ni hule krijge däist.

•   Must duu drinke taum dij gaud befijne? Wen’s duu ümer wat drinke must taum ruig blijwe, taum tijdfordrijwen, taum andrer daile måke urer dij drëgt krijge mit dijn problems, kan sin dat’s duu taufeel drinkst.

•   Däist duu nuu mër drinke as airste? Wen’s duu nuu öfter wat drinke must, wat stärke is un däist mër drinke taum dij soo befijne as duu wëniger drinke däirst, den jå.

•   Dat’s duu drinke däist, häst duu problems up dijm arbëd urer t’huus im huus? Kan sin dat’s duu mër gild gastijre däist as duu häst taum wat taum drinken kööpe.

•   Wen’s duu drunke häst, häst duu daile måkt wat’s duu ni dürst? Wen’s duu drinke däist dau ni sweme, fuire urer mit maschijn arbëre.

•   Daue andrer tau dij säge dat sai sich kopbreeken måke dat’s duu feel drinkst? Wen andrer dat säge un duu warst wüütend, sägst dat is ni wår, un wilst ni dat dai andrer schåle waite dat’s duu drinkst un wofeel, duu must wat måke.

•   Krijgst duu ni anhule an drinken? Wen’s duu al forsöcht häst wëniger drinke urer sogår anhule, åwer häst ni kreege, dau ni nålåte.

 1. Häw ine gedanke wat’s duu måke wilst.

 Ine Bijbel stäit: “Dem wirtschaftige mësch sij uutdenken däit wat gaures ruutergeewe.” (Provérbios 21:5)

 Forsuik soo måke: Dau uutsuike wat fon dåg ine week wilst duu drinke un wofeel. Dau dij anstrenge taum wënsig 2 dåg ine week nischt drinke.

 Ain grup fon Reino Unido wat dai lüür helpt taum sich ni anwene an drinken sägt: “Wek dåg nischt drinke is dai best årt taum sich ni dat drinken anwene.”

 2. Måk wat’s duu uutdacht häst.

 Ine Bijbel stäit: “Måkt trecht wat jij anfånge häwe.” (2 Coríntios 8:11)

 Forsuik soo måke: Dau waite woo stark as dat is wat’s duu drinkst taum ni taufeel drinke. Häw t’huus im huus wat taum drinken wat gesund is un wat ni besåpen löt.

 Dai grup fon Estados Unidos wat dai lüür mithelpt wat taufeel drinke sägt: “Klain daile aners måke in dijn leewend kan dij helpe dat’s duu dij dat drinken ni anwene däist.”

 3. Hul dij an dat wat’s duu uutsöcht häst.

 Ine Bijbel stäit: “Dat juuch ‘jå’, jå bedüürt, un juuch ‘në’, në.” (Tiago 5:12)

 Forsuik soo måke: Wen dij air nööge däit taum drinken mër as duu dij uutdacht hast urer in aim dag woo’s duu nischt drinke wilst, dau dat mit schik afsäge.

 Dai grup fon Estados Unidos wat dai lüür mithelpt wat taufeel drinke sägt uk: “Ji airer as duu soo wat afsägt krijgst, ji lichter wart tau dij sin ni in dës sleng rinerfale.”

 4. Dau saie dai gaure daile wat kümt fon dat wat’s duu uutsöcht häst.

 Ine Bijbel stäit: “Beeter is dat ën fon air dail as sij anfang.” (Eclesiastes 7:8)

 Forsuik soo måke: Dau upsrijwe woweegen as duu ni taufeel drinke wilst. Duu kast daile soo as dës upsrijwe: gild spåre, beeter slåpe, gesuuner ware un beeter ümgang mit dai andrer häwe. Wen’s duu mit andrer fortelst oiwer dat wat’s duu uutsöcht häst, fortel oiwer dai gaure daile wat dårfon kümt un ni woo slim as dat is.

 5. Dau God sijn hülp forlange.

 Ine Bijbel stäit: “Tau ales bün ik stark doir dem wat mij kraft giwt.” (Filipenses 4:13)

 Forsuik soo måke: Dau tau God beere wen’s duu mainst duu häst dij dat drinken anwent un forlang dat hai dij kraft giwt taum dij hulen krijge. b Neem dij tijd ruuter taum lëren fon dai gaur formånen wat ine Bijbel sin. Mit God sijn hülp, duu kast dij hule krijge un ni taufeel drinke.