Laiw bruirers un swesters:

Wen wij God un dai lüür lijbe dat giwt oos lust taum ‘gåe un dai lüür fon al gëgende helpe Jësus någåe, un dai tauwe’. (Mat 28:19, 20 un Mar 12:28 bet 31) Dai andrer wirklig lijbe giwt wat gaures ruuter. Wen wij dit måke daue, koine wij dai helpe wat wirklig ‘dat leewend up ümer häwe wile’. (Atos 13:48)

Ain tijd trööguut, wij däire oos anstrenge taum buiker tau dai lüür låte un uutm kop waite wat wij tau eer säge wule. Nuu muite wij oos anstrenge taum beeter mit dai andrer fortelt krijge. Wij wile lijb up dai lüür wijse doir mit eer fortele oiwer dat wat sai laiwer wile. Dat bedüürt dat wij ni ümer dat neemlig tau ale säge. Bedüürt uk dat wij daue oos anstrenge taum andenken wat jërer ainsig kopbreeken giwt un woo jërer ainsig laiwer oiwer fortele wil. Wosoo wart oos dit dün bauk helpe dat måke?

Dit dün bauk hät 12 kapitels woo wij gaure moors fon lëre koine wat wij bruuke taum lijb wijse un taum dai lüür helpe Jësus någåe. Jërer kapitel fortelt oiwer ain geschicht fone Bijbel un wijst ain gaur moor wat Jësus urer air fon dai airste kristen weese häwe solang as sai preege däire. Najå, wij bruuke jërer ainsig fon dës gaure moors wijse in ales wat wij måke taum preegen. Åwer wij daue saie woo wek moors uphaupt nöörg sin wen wij airst mål mit aim fortele, wen wij werer tau aim preege daue un wen wij aim dai Bijbel inlëre. Wij wile wijse dat wij dai lüür lijbe un ni bloos dat uutm kop waite wat wij säge wile.

Wen’s duu jërer kapitel studijre däist, dau andenke wosoo kast duu dai moor wijse wen’s duu mit dai lüür fortelst dår woo’s duu wånst. Dau dij anstrenge taum Jehovaa un dai lüür düler lijbe. Duu kast sogår wek daile lëre taum mit dai lüür beeter fortelt krijge, åwer dat lijb is dat oiwerst wat’s duu wijse un häwe kast taum dai lüür helpe Jësus någåe.

Tau oos in ain groot fruir dat wij koine in ainigkët mit juuch t’hooparbëre. (Sof 3:9) Dat Jehovaa bijblijwe däit juuch seegne solang as jij juuch anstrenge taum bijblijwe dai lüür lijbe un eer helpe Jësus någåe!