Woweegen mut dai fruug eer kërl horge?
Woweegen mut dai fruug eer kërl horge?
“Dai her fon dai fruug is dai kërl.” (1 CORÍNTIOS 11:3)
1, 2. (a) Wat dai apostel Paulo sreewe hät oiwer dat wat Jehovaa in ordnung bröcht hät? (b) Wat fon frågen daue wij antwoore?
DAI apostel Paulo hät sägt: “Dai her fon jërer kërl Kristus is” un “dai her fom Kristus is God”. Dat is wat Jehovaa in ordnung bröcht hät. (1 Cor 11:3) In dat anerd lëren häwe wij saie dat tau Jësus har dat groote wërd un lait em sër fröölig em sij Her, Jehovaa God, horge. Un dat dai kërls wat Kristus någåe daue, em soo häwe as her. Jësus däir dai lüür behandle mit gaurigkët, lijb un däir sich bekümre mit dere andrer. Soo mut dai kërl dai lüür behandle ine gemaind un uk em sijn fruug.
2 Un dai fruuges? Wee is eer her? Dai apostel Paulo hät sreewe: “Dai her fon dai fruug is dai kërl.” Wat koine dai fruuges dårmit lëre? Wen dai kërl ni dai selwig gloobe hät as dai fruug, schal sai uk em soo as sij her horge? Dat dai fruug sij kërl soo as her horge schal, bedüürt dat sai mut ümer stil blijwe un ni säge kan wat sai denke däit? Wat mut dai fruug måke taum låwt ware?
“Ik måk ain taum em helpe”
3, 4. Woweegen is gaud taum dat forfrigt leewend dat jërer familg air her hät?
3 Jehovaa hät uutsöcht wee is dai her fon jërer familg. Nåheer as Jehovaa Adam måkt hät, hät hai sägt: “Is ni gaud dat dai kërl alaine blijwt. Ik måk ain taum em helpe, wat mit em t’hooppasse däit.” Nåheer as Jehovaa Eva måkt hät, Adam hät sich soo fröögt dat hai sägt hät: “Dës is knåke fon mijn knåken un flaisch fon mijn flaisch.” (Gên 2:18 bet 24) Adam un Eva küüne papa un mama sin fon lüür wat kain fëgels häwe däire. Sai küüne up ümer fröölig leewe in dai paradijs hijr up Ër.
4 Dat Adam un Eva God ni horgt häwe, sai häwe dat leewend åne fëgels in paradijs forspeelt. (Lees Romanos 5:12) Åwer tau God, dai kërl wäir nog dai fruug sij her. Wen dai kërl sijn familg genau lenke däit un wen dai fruug sij kërl horge däit, dat bringt seegens un dat forfrigt leewend wart fröölig. Sai daue sich befijne soo as Jësus sich befuune hät as hai sijn Her, Jehovaa, horgt hät. As Jësus im himel wäir, airer as hijr upe ër kåme is, hai däir sich ‘foir Jehovaa al tijd oiwer frööge’. (Pro 8:30) Weegen dai süün, krijge dai kërls ni een familge lenkt soo as dat schal sin un uk fruuges krijge ni eere kërls horgt soo as dat schal sin. Åwer, wen kërls un fruuges sich anstrenge daue dat best måke un horge dat wat God säge däit oiwer dai her fone familg, sogår nuu, daue sai ain gaur forfrigt leewend häwe.
5. Woweegen muite dai wat forfrigt sin, horge dat wat in Romanos 12:10 stäit?
5 Taum ain gaur forfrigt leewend häwe is sër nöörg dat kërl un fruug horge daue wat dai Bijbel sägt: “Mit lijb soo as bruirers un swesters, häwt groot beschöönen air mit dem andrer. Gåt nå foir taum air dem andrer ëre.” (Rom 12:10) Un nog, kërl un fruug muite sich anstrenge taum ‘gaud sin air mit dem andrer, härtslig beduurnis häwe un air dem andrer mit fraihët forgeewe’. (Efé 4:32)
Wen dai fruug un kërl ni dai selwig gloobe häwe
6, 7. Wat kan passijre wen dai fruug een kërl, wat ni dai selwig gloobe hät, horge däit?
6 Büst duu forfrigt mit aim wat ni dai selwig gloobe hät as duu? Feel måls, sin dai kërls wat ni dai selwig gloobe häwe as dai fruuges. Woo muite dai fruuges dai kërls behandle? Dai Bijbel däit antwoore: “Duu, fruug, must uuner dem kërl sijn ordnung sin, weegen wen hai ni God sij woord horgt, kan hai gewune ware åne wöör, doir dai fornünftigkët fon sijne fruug, doir tüüge sin dat hai eer gaur fornünftigkët saie hät t’hoop mit groot ëren.” (1 Ped 3:1 un 2)
7 Dai Bijbel däit säge dat dai fruug mut dai kërl horge wat ni dai selwig gloobe hät as sai. Wen dai fruug dai kërl gaud behandle däit, kan sin dat hai waite wil woweegen sai em gaud behandle däit, den, kan sin nimt hai an dai Bijbel lëre un air Tüüge fon Jehovaa wart.
8, 9. Wat kan dai fruug måke wen dai kërl ni dai Bijbel lëre wil, lijkerst wen sai sich anstrenge däit taum em mithelpe?
8 Wen dai kërl ni dai Bijbel lëre wil, lijkerst wen sijn fruug em helpe wil, dai Bijbel däit dai fruug taureere ümer gaur moor wijse, sogår wen dat slim is. In 1 Coríntios 13:4 stäit: “Dat lijb is geduldig.” Wäir gaud wen dai fruug wat Jësus någåe däit, eere kërl behanelt mit “al gewöönligkët un fråmhët, mit geduld,” un lijb in ales wijse. (Efé 4:2) Mit dai hülp fon God sijne kraft, dai hailig gaist, dai fruug kan gaure moors wijse lijkerst wen dat ni licht is.
9 Paulo hät sreewe: “Tau ales bün ik stark doir dem wat mij kraft giwt.” (Fil 4:13) God sij hailig gaist däit mithelpe dai wat forfrigt sin mit aim wat ni dai selwig gloobe hät, dat sai måke koine dat wat unmööglig is. Is slim ni tröögtåle wen dai wat mit dij forfrigt is, dij slecht behandle däit. Dai Bijbel hät sägt tau dai kristen: “Daut ni slechtigkët mit slechtigkët tröögtåle. . . . Weegen stäit sreewe: ‘Dat is mijn taum måken. Ik dau tröögtåle’, sägt Jehovaa.” (Rom 12:17 bet 19) Uk in 1 Tessalonicenses 5:15 stäit: “Passt juuch up dat kair ainsig slechtigkët mit slechtigkët tröögtåle däit, åwer daut juuch ümer anstrenge dat wat gaud is måke air tau der andrer un tau ale.” Dat wat wij ni alaine måkt krijge, krijge wij måkt mit Jehovaa sijn hailig gaist. Dårweegen is nöörg beere dat wij God sijn hailig gaist häwe taum oos helpe.
10. Wat hät Jësus måkt as dai andrer em slecht behanelt häwe?
10 Jësus hät weese wat wij måke schåle wen dai andrer oos wat säge daue wat oos ni gefale däit. In 1 Pedro 2:23 stäit: “Wen hai schimpt ware däir, däir hai ni tröögschimpe. Wen hai nood uuthule däir, däir hai ni tröögtåle, åwer hai däir sich upforlåte up dem wat mit gerechtigkët gerichte däit.” Wij muite Jësus nåmåke. Den dau ni tröögtåle dai daile wat dai andrer gëgen dij måke. Soo as ine Bijbel stäit: “Häwt groot beduurnis un gewöönligkët. Daut ni slechtigkët mit slechtigkët tröögtåle un daut ni schimpe dai wat dij schimpe däit.” (1 Ped 3:8 un 9)
Mut dai fruug ümer stil blijwe?
11. Womit daue wek fruuges Jehovaa mithelpe?
11 Dat dai fruug dai kërl soo as sij her horge schal, bedüürt dat sai ümer stil blijwe mut un ni säge kan wat sai denke däit? Në. Jehovaa däit fruuges un kërls suike taum em mithelpe. Dau man’s andenke woo feele wërd hät tau dai 144 duusend lüür, dat sai uuner der Kristus sijn macht in himel regijre daue, wen hai dai ër regijre däit. Fruuges hööre uk tau taum dës grup. (Gál 3:26 bet 29) Gans sicher dai fruuges häwe groote wërd taum Jehovaa sijn gemaind.
12, 13. Fortel oiwer wek fruuges wat foiruutsäge däire.
12 Früür däire wek fruuges wat foiruutsäge. In Joel 2:28 un 29 stäit: “Ik dau fon mijm hailig gaist oiwer al sort lüür schüre. Juuch jonges un määkes daue wat foiruutsäge. Sogår oiwer dai kërls un fruuges wat mijn eskravs sin, in dai dåg dau ik fon mijm hailig gaist schüre.”
13 Mank Jësus sijn 120 jüngers wat sich forsamelt hare in ain stuuw båwen up ain huus in Jerusalém, in Pingster fon 33 N.K.T wäire kërls un fruuges. God sijn hailig gaist is oiwer dës gans grup schürt woore. Den, Pedro küün fortele dat dat wat Joel foiruutsägt har, oiwer kërls un fruuges wäir. Hai hät sägt: “Dat is wat dai profët Joel sägt hät: ‘God sägt: “Ine lätste dåg, ik dau fon mijm hailig gaist oiwer al sort lüür schüre. Juuch jonges un määkes daue wat foiruutsäge. Sogår oiwer dai kërls un fruuges wat mijn eskravs sin, dau ik fon mijm hailig gaist in dai dåg schüre un sai daue wat foiruutsäge”’.” (Atos 2:16 bet 18)
14. Wat häwe dai fruuges in dat preegarbëd måkt in dai airst 100 jår nå Kristus sijn tijd?
14 In dai airste 100 jår nå Kristus sijn tijd, däire dai fruuges sër mithelpe in dat preegarbëd. Sai däire oiwer God sijn regirung preege un andrer daile måke taum in dat preegarbëd mithelpe. (Luc 8:1 bet 3) Soo as dai apostel Paulo sägt hät dat Febe, ain wäir ‘wat in Cencreia gemaind dijner däir.’ Un as hai grüüsse schikt hät taum dai wat mit em preegt häwe, hät Paulo fortelt oiwer feel reäl fruuges soo as ‘Trifena un Trifosa . . . wat sich anstrenge taum tau dai Her arbëre.’ Hai hät uk fortelt oiwer ‘oos lijb Pérside . . . wat sich anstrengt hät taum tau dai Her arbëre’. (Rom 16:1 un 12)
15. Wat fon daile mit groote wërd måke dai fruuges hüütsendågs?
15 Hüüt dai mëste lüür fon dai 7 miljone fon dai wat dai gaure nijges fon God sij regirung preege daue ine ganse wild, sin määkes, fruuges un uld fruuges. (Mat 24:14) Feel fon eer sin pionijrs, missionárias urer daue in Betel arbëre. Davi hät sunge: “Jehovaa giwt dai ordnung: Dai fruuges wat dai gaure nijges bekandmåke sin soo as ain groot grup soldåte.” (Sal 68:11) Dat is wår! Jehovaa giwt groot wërd taum dat wat dai fruuges in dat preegarbëd måke daue un taum dat wat sai måke, dat em sijne wile passijre däit. Dat God wil dat dai fruuges dai kërls horge daue, bedüürt ni dat sai ümer stil blijwe muite, ån säge wat sai maine daue.
Twai fruuges wat ni stil bleewe sin
16, 17. Wosoo dat wat Sara måkt hät, wijst dat dai fruuges ni ümer stil blijwe muite?
16 Wen Jehovaa dai fruuges soo feel daile måke löt, mut dai kërl sijn fruug fråge airer as ain uutsuiken mit groote wërd måke? Wäir gaud wen hai dat måke däir. Dai Bijbel sägt dat lijkerst wen dai kërl ni frågt hät wat sijn fruug maine däir, feel fruuges sin ni stil bleewe un häwe wat måkt. Wiman’s oiwer twai fon dës fruuges fortele.
17 Sara, Abraão sij fruug, däir feel måls em forlange dat hai dai anerd fruug un een sijn kind wegschike schul, weegen sai däire ni respekt wijse. “Wat sai oiwer Ismael sägt hät, hät Abraão ni anståe”, åwer God däir ni soo denke. Jehovaa hät tau Abraão sägt: “Dau dij ni kopbreeken måke mit dat wat Sara oiwer dai jong un oiwer dijn eskrav sägt hät. Horg wat sai sägt.” (Gên 21:8 bet 12) Abraão hät God horgt un hät soo måkt as Sara em forlangt hät.
18. Wat hät Abigail måkt?
18 Sai uk wat passijrt is mit Abigail, Nabal sij fruug. As Davi wegloope däir fon dai köönig Saul, is hai ain tijdlang dicht an Nabal sijn fai bleewe. Ståts wek daile fon dës rijk kërl steele, Davi un sijn soldåte häwe em sijn daile behüütet. Åwer Nabal “wäir grof un slecht” un hät Davi sijn soldåte uutschimpt. Hai wäir air unnüte un dum mësch. As Davi sijn soldåte mit respekt em eeten forlangt häwe, Nabal hät eer nischt geewt. Wat hät Abigail måkt as sai dat waiten kreege hät? Sai hät nischt taum Nabal sägt un “hät rasch 200 bröir nåme, 2 groot kan wijn, 5 afgeslacht schåpe, 5 körf dröög köörn, 100 rosine kuchen un 200 fijge kuchen wat fast drükt woore sin” un hät dat taum Davi un sijn soldåte geewt. Hät Abigail dat wat richtig is måkt? Dai Bijbel hät sägt: “Jehovaa hät måkt dat Nabal doodbleewe is”. Spåre, hät Davi sich mit Abigail frijgt. (1 Sam 25:3, 14 bet 19, 23 bet 25 un 38 bet 42)
Dai fruug wat låwt ware mut
19, 20. Wat mökt aine fruug wat wërd is låwt ware?
19 Dai Bijbel låwt dai fruug wat dai daile soo måke däit as Jehovaa wil. Provérbios bauk låwt “aine gaur fruug”, dår sägt: “Sai hät feel mëre wërd as corais. Sij kërl forlöt sich gans up eer, un em fëgelt nischt wat nöörg is. Sai däit em beloone mit gaurigkët, un ni mit slechtigkët, dai ganse dåg fon eer leewend.” Un uk, “sai mökt sij muul up mit klaukhët. Un dai lei fon dai gaurigkët is in eer tung. Sai lenkt dai arbëd in eer huus un dai brood fon fuulhët däit sai ni eete. Sijn kiner ståe up un daue eer låwe, un sij kërl stäit up un däit eer uk låwe”. (Pro 31:10 bet 12 un 26 bet 28)
20 Wat mökt aine fruug wat wërd is låwt ware? Provérbios 31:30 sägt: “Dai smük is amin falsch, un dai fainhët amin gäit forbij. Åwer dai fruug wat Jehovaa gefale wil, wart låwt.” Jehovaa gefale bedüürt dat dai fruug mit gaure wile eer kërl horge däit, soo as Jehovaa wil. “Dai her fon dai fruug is dai kërl”, soo as “dai her fon jërer kërl Kristus is” un “dai her fom Kristus is God”. (1 Cor 11:3)
Wijs dankbårkët up God sij geschenk
21, 22. (a) Woweegen koine dai wat forfrigt sin, dankbår sin up eer forfrigt leewend? (b) Woweegen muite wij respektijre dai wat Jehovaa uutsöcht hät taum oos lenke? (Sai dai tåfel ine sijr 17.)
21 Dai wat Jësus någåe un forfrigt sin, koine God danke dår up. Sai koine fröölig t’hoopleewe. Uphaupt sai koine God danke dat sai forfrigt sin weegen soo sai koine t’hoop mit Jehovaa gåe. (Rute 1:9 un Miq 6:8) Jehovaa, dai wat dai airst hochtijd måkt hät, wät gans genau wat nöörg is dat sai fröölig sin in eer forfrigt leewend. Måkt ümer dai daile soo as Jehovaa wil un ‘dai lustigkët wat fon Jehovaa kümt, wart juuch kraft sin’, lijkerst in dës slecht wild. (Nee 8:10)
22 Dai kërl wat Kristus någäit un sijn fruug lijbe däit soo as sich selwst, däit sijn familg uppasse un dai mit lijb lenke. Em sijn fruug, wat reäl an God is, is wërd wirklig låwt ware, weegen sai däit een kërl bijståe un em groot respekt wijse. Åwer wat mëre wërd hät is dat een forfrijgt leewend däit oos God Jehovaa ëre.
Kast dij denke?
• Wat hät Jehovaa måkt taum ale in ordnung bringe?
• Woweegen muite dai wat forfrigt sin air der anerd ëre?
• Wosoo mut dai fruug sij kërl behandle wat ni dai selwig gloobe hät as sai?
• Woweegen mut dai kërl sij fruug fråge airer as ain uutsuiken måke mit groote wërd?
[Frågen taum Lëren]
[Tåfel upm sijr 17]
Woweegen muite wij respektijre dai wat Jehovaa uutsöcht hät taum oos lenke?
Jehovaa hät uutsöcht wee oos lenke schal un wosoo dai dat måke koine. Dat helpt dai ängels un dai lüür, weegen dårmit sai koine God dijner mit fraiwile un em ëre for em in ainigkët dijner. (Sal 133:1)
Dai wat uutgesöcht woore sin taum im himel leewe, daue anneeme dat Jësus eer her is un dat hai eer lenke däit. (Efé 1:22 un 23) “Den dat aigen Kind däit sich selwst uuner Der stele, wat em al dai daile oiwergeewt hät, dat God ales wart tau ale” weegen Jësus nimt an dat Jehovaa dai Her is wat oos lenke däit. (1 Cor 15:27 un 28) Soo uk, dai wat Jehovaa sijne wile måke, muite respektijre dat wat Jehovaa måkt hät taum in jërer familg un gemaind dai ordnung hule. (1 Cor 11:3 un Heb 13:17) Wen wij dat måke, daue wij Jehovaa gefale un daue em sijn seegens krijge. (Isa 48:17)
[Bijld upm sijr 13]
Beere kan dai fruug helpe gaur moors wijse
[Bijld upe sijr 15]
Jehovaa giwt wërd taum dat wat dai fruuges in dat preegarbëd oiwer God sij Regirung måke daue