“Ach Duu wat dai gebeeds hööre däist, an dij kåme al sort lüür.” (Salmo 65:2)

Wek lüür maine wen sai beere kair däit eer hööre, åwer lijkerst soo sai daue beere. Sai denke wen sai säge in aim gebeed wat sai forneeme, dat däit eer helpe sich beeter befijne. Åwer wij beere ni bloos dat wij oos beeter befijne urer dat wij oos drëgt krijge mit dai problems. Ine Bijbel stäit dat “Jehovaa a is näig bij al dai wat em anraupe, bij al dai wat em im wårhët anraupe . . . [Hai] däit hööre ale dai wat hülp bire.” (Salmo 145:18 un 19)

Den, wij koine oos sicher sin dat God höört dai gebeeds fon dai wat em horge. Mit lijb, hai sägt tau oos: “Jij daue mij anraupe, kåme na mij un beere, un ik dau juuch hööre.” (Jeremias 29:12)

“Daut foirwärtsgåe im beeren.” (Romanos 12:12)

Ine Bijbel stäit wij schåle “bijblijwe bijm beeren” un dat wij dat ümer måke schule. Dit däit wijse dat God wil dat dai lüür tau em beere daue. (Mateus 26:41 un Efésios 6:18)

Woweegen wil God dat wij tau em beere daue? Denk hijr an: Air papa wart fröölig wen em sij kind sijn hülp forlange däit, is ni wår? Mëstümer dai papa däit al waite wat dat kind bruuke däit. Åwer wen dai papa höört dat sij kind sijn hülp forlange däit, dai papa süüt dat dat kind sich up em forlåte däit un bruukt sijn hülp. Neemlig soo, wen wij tau Jehovaa God beere, wij wijse dat wij oos up em forlåte daue un wile aine gaure ümgang mit em häwe. (Provérbios 15:8 un Tiago 4:8)

“Dat jij oiwer em al juuch kopbreeken smijte, weegen hai passt juuch up.” (1 Pedro 5:7)

God wil wij schåle tau em beere weegen hai däit oos lijbe un bekümert sich mit jërer ainsig fon oos. Hai bekümert sich mit dai problems wat wij häwe un wen wij unruig sin. Hai wil oos helpe.

Dai köönig Davi in sijn gans leewend lang hät tau Jehovaa God beert un sijn hülp forlangt. Hai hät uk tau God sägt wat hai denke un forneeme däir. (Salmo 23:1 bet 6) Wat fornaim God oiwer Davi? Hai däir em lijbe un däir em sijn gebeeds hööre. (Atos 13:22) Neemlig soo, God däit oos gebeeds hööre weegen hai däit sich bekümre mit jërer ainsig fon oos.

Wee hät dit sägt? Air mësch wat ain fon dai salmos ine Bijbel sreewe hät. Dit däit wijse dat hai sich sicher wäir dat God sijn gebeeds hööre däir un dat däir em sër feel helpe. Hai däir forneeme dat God näig bij em wäir un dat gaiw em dai kraft wat hai bruuke däir taum sich drëgt krijge mit dai problems un traurigkët im leewend. (Salmo 116:1 bet 9)

Wen wij oos sicher sin dat God oos gebeeds hööre däit, wij daue bijblijwe bijm beeren. Sai wat passijrt is mit Pedro wat in Espanha wånt. Em sij jong wat 19 jår uld wäir is doodkåme. Pedro is sër traurig woore. Hai hät oft tau God beert, hät sägt wat hai forneeme däir un hät God sijn hülp forlangt. Pedro sägt wat passijrt is: “Jehovaa hät mijn gebeeds doir dai bruirers un swesters antwoort. Sai häwe mij un mijn fruug trööst un hulpe.”

Pedro sij jong is ni upleewt woore weegen dai gebeeds, åwer gans sicher beere hät Pedro un sijn familg sër mithulpe. Em sijn fruug, Maria Carmen, däit säge: “Dai gebeeds häwe mij hulpe dai waidåg uuthule. Ik däir waite dat Jehovaa God mij forståe däir, weegen wen ik beere däir tau em, ik wäir ruig un fornaim freere.”

Dai Bijbel un geschichte soo as dës wijse dat God wirklig oos gebeeds hööre däit. Åwer gewiss, God däit ni al sort gebeeds antwoore. Woweegen däit God wek gebeeds antwoore un andrer ni?