Daue ale dai wat säge wat Jësus någåe wirklig dit måke?

WOFEEL kristen giwt dat upe ganse wild? Air bauk up englisch, wat Atlas do Cristianismo Global hit, sägt in 2010 ine ganse wild wäire mër as 2 biljone. Dit bauk däit uk säge dës lüür daue tauhööre tau mër as 41 duusend religione, jërer ainsig fon dës religion häwe ale sijn moor un soo as dai lüür inlërt ware, wart ales gans aners sin as dai andrer religione. Mit sofeele sort religione, feel lüür daue ni waite woo sai anglööwe muite. Feel daue ni anglööwe an dat wat dai kirche säge daue un låte dat im stig. Kan sin dat sai soo denke: ‘Feel säge sai daue Kristus någåe, åwer gåe sai em wirklig nå?’

Denk ais an wen air mësch na ande gëgend rëse däit. Wen hai dår henkåme däit den mut hai säge fon woo hai heer kåme is. Mit ain upwijsen hai mut wijse wee hai is. Neemlig soo, dai wat wirklig Jësus någåe däit mut mër måke as bloos säge hai hät gloobe an Jësus. Woo mut hai dat wijse?

Dai lüür häwe dat woord “kristen” anfånge benutse ain tijd nåheer dat jår 44 nå Kristus sijn tijd. Lucas, air fon dai wat dai Bijbel sreewe hät, hät soo sägt: “Antioquia is dai airst stel wääst woo dai hailig gaist dai lüür lenket hät taum der jüngers nene soo as kristen.” (Atos 11:26) Dai wat kristen nent wäire, wäire Kristus sijn jüngers urer dai wat leewe däire soo as Jësus inlërt hät. Woo kan air mësch Jësus sijn jünger ware? Dat bauk wat hit Dicionário Internacional de Teologia do Novo Testamento, wat dai wöör fon dai Nijg Testament urer dai Grega Sriwt uutdüüre däit, sägt soo: “Jësus någåe soo as em sijn jünger, däit bedüüre dat dai mësch mut sij gans leewend tau Jësus anbaire, doir sij gans leewend lang . . . ” Den dai wat wirklig kristen is, däit genau horge urer någåe ales wat Jësus inlërt hät, dai wat dai kristlig kirch inset hät.

Koine wij hüüt soo’n lüür fijne mang dai feele wat säge daue dat sai kristen sin? Wee wäire dai richtige wat Jësus någåe däire? Wiman’s saie wat dai Bijbel sägt oiwer dës frågen. Fon nuu an, wiman’s fijw daile saie wat Jësus sägt hät wat wijse däire wee em sijn jüngers wäire. Wiman’s saie dat, dår in Jësus sijn tijd, dai wat em sijn jüngers wäire däire ales någåe wat hai inlërt hät eer gans leewend lang. Den, daue wij saie wee hüüt bloos säge däit kristen is un wee wirklig någåe däit wat Jësus inlërt hät.