Jehovaas Tüügen hule sich an dat kristlig lëren wat Jësus inlërt hät un wat dai apostels någåe häwe. Dës artikel däit uphaupt daile wijse woo wij anglööwe.

1.   God. Wij daue der ainsig wår God anbeere, Jehovaa, dai Almächtig wat ales måkt hät. (Salmo 83:18; Apocalipse 4:11) Hai is Abraham, Moose un Jësus sij God. — Êxodo 3:6; 32:11; João 20:17.

2.   Bijbel. Tau oos, dai Bijbel is dai beschaid wat fon God kümt tau dai lüür. (João 17:17; 2 Timóteo 3:16) Woo wij anglööwe kümt fon dai 66 buiker fone Bijbel, dat is dat “Uld Testament” un dat “Nijg Testament”. Dai schaullërer Jason D. BeDuhn hät genau sägt oiwer Jehovaas Tüügen dat “eer gloobe un wat sai måke kümt fon God sij Woord dai Bijbel, ån wat hijnerlåte urer tausete”. a

    Wij daue an dai gans Bijbel glööwe. Åwer wen wij forsuike dai Bijbel forståe, wij waite dat wek stüke fone Bijbel daue dai daile wijse soo as dai wirklig passijrt sin urer wat nog passijre un wek andrer stüke säge air dail, åwer dai daue aners wat bedüüre. — Apocalipse 1:1.

3.   Jësus. Wij daue Jësus Kristus nåmåke un em sij inlëren någåe. Wij daue em anneeme soo as Dai wat oos rere däit un God sij Kind. (Mateus 20:28; Atos 5:31) Dårweegen, sin wij kristen. (Atos 11:26) Åwer wij häwe ine Bijbel lërt dat Kristus ni dai Almächtig God is, dat bedüürt dat dai Bijbel ni bijståe däit dat inlëren fon drai god in aine. — João 14:28.

4.   God sij Regirung. Is ni air dail in der kristen eer härts. Is air Regirung im himel. Dës Regirung däit al dai regirunge fone lüür ümstuusche un mökt God sijne wile tau dai Ër. (Daniel 2:44; Mateus 6:9, 10) Dit däit bald passijre, weegen soo as dai Bijbel sägt wij leewe in dai ‘letste dåg’. — 2 Timóteo 3:1-5; Mateus 24:3-14.

    Jësus is dai Köönig fon God sij Regirung. Hai hät anfunge an regijre im himel in 1914. — Apocalipse 11:15.

5.   Reren. Doir der prais wat Jësus betålt hät mit sijm dood ware wij frai fon der süün un dood. (Mateus 20:28; Atos 4:12) Dårtau mut dai mësch gloobe häwe an Jësus, un ümstelen måke in sij leewent un sich tauwe låte. (Mateus 28:19, 20; João 3:16; Atos 3:19, 20) Wat dai mökt däit wijse dat dai leewig gloobe hät. (Tiago 2:24, 26) Åwer dat reren kan ni köft ware — wij koine bloos rert ware doir dai ‘gaurigkët fon God wat wij ni wërd sin’. — Gálatas 2:16, 21.

6.   Himel. God Jehovaa, Jësus Kristus, un dai ängels leewe im himel soo as gaiste. b (Salmo 103:19-21; Atos 7:55) Taum mit Jësus t’hoop regijre in sij Regirung, ain klain grup lüür (144.000) ware upleewt taum im himel leewe. — Daniel 7:27; 2 Timóteo 2:12; Apocalipse 5:9, 10; 14:1, 3.

7.   Ër. God hät dai Ër måkt tau der lüür eer wånstel up ümer sin. (Salmo 104:5; 115:16; Eclesiastes 1:4) God däit dai lüür wat em horge seegne mit gans gesundhët un leewent up ümer in ain Paradijs upe Ër. — Salmo 37:11, 34.

8.   Slechtigkët un nood. Dai slechtigkët un nood hät anfunge upe Ër as ain fon God sijn ängel ni an Em sijne kant bleewe is. (João 8:44) Nåheer as dai dit måkt hät, dës ängel hät dai nåmen kreege “Satan” un “Düüwel”. Hai hät der airste kërl un dai airst fruug taureert taum an em sijne kant blijwe. Dat hät feel swårhëte bröcht tau al dai wat fon Adam un Eva heerkåme. (Gênesis 3:1-6; Romanos 5:12) Un taum wijse dat ni wår is wat Satan sägt hät, God erlaubt dai slechtigkët un nood. Åwer hai erlaubt dat ni up ümer.

9.   Dood. Dai wat doodblijwe sin ni mër. (Salmo 146:4; Eclesiastes 9:5, 10) Sai daue ni brene in aine füürhöl.

    God mökt dat biljone lüür werer leewe koine doir dat upleewen. (Atos 24:15) Nådem upleewen, dai wat ni anneeme God horge ware uutrot up ümer ån ain hofnung taum werer upleewt ware. — Apocalipse 20:14, 15.

10.   Famijlg. Wij daue någåe wat God inset hät im anfang tau dat frijgen, dat bedüürt dat frijgen mut sin mit aim kërl un ain fruug. Wij daue forståe wen dai kërl urer dai fruug sich aine andrer neeme däit, den dai wat kain schuuld hät kan uutsuike sich uutenanersrijwe låte. (Mateus 19:4-9) Wij sin oos sicher dat dai klaukhët wat wij fijne ine Bijbel daue dai famijlge helpe dat sai gaut leewe koine. — Efésios 5:22–6:1.

11.   Oos anbeeren. Wij daue ni anbeere dat krüüts uk ni irgends air anert gemåkt dail. (Deuteronômio 4:15-19; 1 João 5:21) Sai wek daile wat tauhööre tau oos anbeeren:

    •   Beere tau God. — Filipenses 4:6.

    •   Leese un dai Bijbel lëre. — Salmo 1:1-3.

    •   Angrüüwle an dat wat wij lëre fone Bijbel. — Salmo 77:12.

    •   Forsamle taum beeren, dai Bijbel lëre, singe, fortele oiwer oose gloobe un der bruirers un swesters un andrer koråsch geewe. — Colossenses 3:16; Hebreus 10:23-25.

    •   Preege dai ‘gaure nijges fon [God sij] Regirung’. — Mateus 24:14.

    •   Dai lüür helpe wat nood doirsete. — Tiago 2:14-17.

    •   Buuge un nåarbëre dai Köönigrëchsaals un andrer stele wat benutst ware taum bijblisch inlëren geewe ine ganse wild. — Salmo 127:1.

    •   Geewe hülp ine nood. — Atos 11:27-30.

12.   Oos gemaind ine ganse wild. Wij forsamle oos in feel gemainde, un jërer ain fon dai wart nåkeeke fon ain grup ülster. Dai krijge kain loon for dit un daue ni tauhööre tau ain grup religioonschefs wat sich mër reekne oiwer dai andrer. (Mateus 10:8; 23:8) Wij daue kair gehald forlange, wart uk kair gild upe forsamlunge samelt. (2 Coríntios 9:7) Al oos arbëd wart betålt doir gild wat geewt wart wat kair waite däit wee dat geewt hät.

     Dai Grup Kërls wat Jehovaa sijne arbëd lenkt, ain klain grup kristlig kërls wat klauk un stark im gloobe sin, daue belërunge schike fon oos Betel in Warwick, Nord-Amerika, tau al Jehovaas Tüügen ine ganse wild. — Mateus 24:45.

13.   Oos ainigkët. Jehovaas Tüügen ine ganse wild daue an dai neemlige daile glööwe. (1 Coríntios 1:10) Daue oos uk anstrenge taum dat mang oos kain sort uutenanerdailen is. Mang oos sin al sort lüür fon al rass, arm un rijk. (Atos 10:34, 35; Tiago 2:4) Wij häwe fraihët taum oos aigen uutsuiken måke doir oose forstand wat uiwt is nå dai Bijbel. — Romanos 14:1-4; Hebreus 5:14.

14.   Oos årt taum leewen. Wij sin ni soo as dai lüür ine wild wat der andrer nischt güne, åwer wij måke al daile mit lijb. (João 13:34, 35) Wij daue ni måke wat God ni gefale däit, dat blaud upt forkërd årt benutse , soo as dat blaud sich inloope låte. (Atos 15:28, 29; Gálatas 5:19-21) Wij leewe im freere un gåe ni ine krijg. (Mateus 5:9; Isaías 2:4) Wij daue dai regirunge sijn leis horge, åwer God sijn leis kåme ine airste stel tau oos. — Mateus 22:21; Atos 5:29.

15.   Oos t’hoophulen mit dai andrer. Jësus hät oos ordnung geewt: ‘Lijb dijne näigste soo as dij selwst’. Hai hät uk sägt dat dai kristen ‘ni tauhööre tau dai wild’. (Mateus 22:39; João 17:16) Soo, nog dat wij ni kain kant fone politik bijståe un daue oos ni t’hoophule mit andrer religioone, wij daue oos anstrenge taum måken wat ‘gaut is tau ale’. (Gálatas 6:10; 2 Coríntios 6:14) Åwer daue der andrer eer uutsuiken forståe wat sai måke oiwer dës daile. — Romanos 14:12.

 Wen’s duu ain fråg häst oiwer woo Jehovaas Tüügen anglööwe, kast leese oiwer oos in oos stel in internet, mit aim fortele in ain fon oos Betels, kåme up ain fon oose forsamlunge näig woo’s duu wåne däist urer forlele mit ain Tüüge fon Jehovaa in dijn gëgend.