साँचो मित्रहरू भरोसायोग्य हुन्छन्‌। तिनीहरू साक्खै दाजुभाइले जस्तै एकअर्काको ख्याल राख्छन्‌ र दुःखमा पर्दा एकअर्कालाई साथ दिन्छन्‌।

 “साँचो मित्रले सधैँ माया गर्छ।” यहाँ “माया” भनेर अनुवाद गरिएको हिब्रू शब्दमा कुनै व्यक्‍तिप्रतिको भावना मात्र मुछिएको हुँदैन। बरु यो निःस्वार्थ प्रेम हो, जुन कामद्वारा देखाइन्छ। (१ कोरिन्थी १३:४-७) यस्तो निःस्वार्थ प्रेम देखाउने साथीहरूले आपसमा कुनै गलतफहमी हुँदा वा जीवनमा गाह्रो अवस्था आइपर्दा एकअर्काको साथ छोड्‌दैनन्‌। तिनीहरू एकअर्कालाई खुला मनले क्षमा पनि दिन्छन्‌। (हितोपदेश १०:१२) अनि आफ्नो मित्र सफल हुँदा डाह गर्दैनन्‌ बरु तिनीसँगै रमाउँछन्‌।—रोमी १२:१५.

 “साँचो मित्र . . . दुःखमा साथ दिन जन्मेको दाजुभाइजस्तै हुन्छ।” यस पदमा साक्खै दाजुभाइ दिदीबहिनी घनिष्ठ हुन्छन्‌ भन्‍ने कुरामा ध्यान खिचिएको छ। त्यसैले एकदमै गाह्रो अवस्थाको सामना गरिरहेका मित्रलाई सकेजति मदत गर्छौँ भने हामी तिनको लागि साक्खै दाजुभाइ दिदीबहिनीजस्तै भइरहेका हुन्छौँ। यस्ता मित्रहरूबीच हुने मायाको बन्धनलाई कुनै कुराले कमजोर बनाउन सक्दैन। बरु त्यो बन्धन झन्‌झन्‌ प्रगाढ हुँदै जान्छ किनकि गाह्रो अवस्थामा समेत तिनीहरू एकअर्कालाई प्रेम र आदर देखाइरहन्छन्‌।

 हितोपदेशको किताबमा बुद्धिले भरिएका सल्लाह-सुझाव पाइन्छ, जुन छोटोमीठो तरिकामा र पाठकहरूलाई सोच्न लगाउनेगरि लेखिएका छन्‌। यस किताबको प्रायजसो भाग राजा सुलेमानले लेखेका हुन्‌। तिनले यो किताब हिब्रू कविताको शैलीमा लेखेका छन्‌। हिब्रू कविता कुनै दुई कुराबीचको समानता औँल्याएर वा दुई भिन्‍नाभिन्‍नै कुरालाई दाँजेर लेखिन्थ्यो। हितोपदेश १७:१७ दुई कुराबीचको समानता औँल्याएर लेखिएको कविताको एउटा उदाहरण हो। उक्‍त पदको पहिलो भागमा लेखिएको कुरालाई जोड दिन दोस्रो भागमा त्यससँगै मिल्दोजुल्दो कुरा लेखिएको छ। हितोपदेश १८:२४ चाहिँ दुई भिन्‍नाभिन्‍नै कुरालाई दाँजेर लेखिएको कविताको एउटा उदाहरण हो। उक्‍त पदमा यस्तो लेखिएको छ: “कुनै-कुनै साथी अरूलाई बरबाद पार्न समेत पछि पर्दैन तर कुनै-कुनै साथी भने साक्खै दाजुभाइभन्दा पनि घनिष्ठ हुन्छ।”

 हितोपदेश १७:१७ लेख्दा सुलेमानले आफ्नो बुबा दाउद र राजा साउलका छोरा जोनाथनबीचको घनिष्ठ मित्रताबारे सम्झेका हुन सक्छन्‌। (१ समुएल १३:१६; १८:१; १९:१-३; २०:३०-३४, ४१, ४२; २३:१६-१८) दाउद र जोनाथन नातेदार थिएनन्‌ तर तिनीहरू साक्खै दाजुभाइभन्दा पनि घनिष्ठ थिए। जोनाथनले आफ्नो जवान साथीलाई बचाउन ज्यानकै जोखिम मोले। a

 “मित्र सब समय एक प्रेमी साथी हुन्छ, औ दाजुभाइचाहिं दु:खमा सहभागी हुनलाई जन्मेको हुन्छ।”—संशोधित संस्करण।

 “असल मित्रले सधैँ माया गरिरहेको हुन्छ। त्यसरी नै साँच्चो दाज्यू-भाइले पनि कष्टको समयमा सहायता पुऱ्‍याइरहेको हुन्छ।”—पढ्‌न सजिलो संस्करण।

 “साथीले सधैंभरि प्रेम गर्छ, अनि भाइचाहिँ विपत्तिको समयको लागि जन्मन्छ।”—ट्रिनिटेरियन बाइबल सोसाइटी।

 हितोपदेशको किताबको विषयवस्तुबारे बुझ्न यो छोटो भिडियो हेर्नुहोस्‌।