“मानिसहरूले जानून्‌ कि तपाईँ, जसको नाम यहोवा हो, सारा पृथ्वीमा तपाईँ मात्र सर्वोच्च हुनुहुन्छ।”—भजन ८३:१८.

यहोवा मात्र साँचो ईश्‍वर हुनुहुन्छ भनेर बाइबल सिकाउँछ। सृष्टिकर्ताले नै ब्रह्‍माण्ड र यसमा भएका सबै जीवित थोक बनाउनुभएको हो। उहाँ मात्र हाम्रो उपासनाको हकदार हुनुहुन्छ।—प्रकाश ४:११.

“परमेश्‍वर प्रेम हुनुहुन्छ।”—१ युहन्‍ना ४:८.

यहोवाले बाइबल र प्रकृतिमार्फत आफ्ना थुप्रै गुण प्रकट गर्नुभएको छ। उहाँको प्रमुख गुण प्रेम हो। उहाँ सबै कुरा प्रेमले उत्प्रेरित भई गर्नुहुन्छ। हामी उहाँबारे जति धेरै सिक्छौँ, उहाँप्रतिको प्रेम त्यति नै बढ्‌नेछ।

“तपाईँ क्षमा दिन सधैँ तयार हुनुहुन्छ।”—नहेम्याह ९:१७.

हामी त्रुटिपूर्ण छौँ भनेर यहोवालाई थाह छ। त्यसैले उहाँ हामीलाई “क्षमा दिन सधैँ तयार हुनुहुन्छ।” हामीले आफ्नो गल्तीको लागि क्षमा माग्दा र खराब काम त्याग्न मनैदेखि प्रयास गर्दा उहाँले हामीलाई क्षमा दिनुहुनेछ र विगतमा गरेका गल्तीहरूका लागि सजाय दिनुहुनेछैन।—भजन १०३:१२, १३.

“यहोवा तिनीहरू सबैको नजिक हुनुहुन्छ, जसले उहाँलाई पुकार्छन्‌। . . . उहाँ तिनीहरूको गुहार सुन्‍नुहुन्छ।”—भजन १४५:१८, १९.

यहोवाको उपासना गर्न हामीले कुनै खास रीतिथिति अपनाएको अथवा कुनै धार्मिक प्रतिमा वा तस्बिर चलाएको उहाँ चाहनुहुन्‍न। मायालु आमाबुबाले आफ्ना छोराछोरीको कुरा सुनेजस्तै उहाँले पनि हाम्रा प्रार्थनाहरू सुन्‍नुहुन्छ।