मेहनती मानिस काम गर्न आलेटाले गर्दैन। अरूको नजरमा सानोतिनो जस्तो देखिने काम पनि रमाई-रमाई गर्छ। आफ्नो व्यक्‍तिगत आवश्‍यकता पूरा गर्न अनि अरूलाई मदत गर्न परिश्रम गर्छ।

हामीले जीवनमा थुप्रै जिम्मेवारी उठाउनुपर्छ। यो एउटा तीतो सत्य हो। आजकलका मानिसहरू मेहनत गर्न त्यति रुचाउँदैनन्‌। तर मेहनती हुनुभयो भने तपाईँलाई नै फाइदा हुन्छ।—उपदेशक ३:१३.

“मेहनत गरेर काम गर्दा मनैदेखि खुसी र सन्तुष्ट हुन्छु। काम गर्ने जोस-जाँगर पनि बढ्‌छ। मेहनती र जिम्मेवार भएर काम गर्दा राम्रो नाम कमाउन सक्नुहुन्छ।”—रेयोन

बाइबलको सिद्धान्त: “मेहनतको फल मीठो हुन्छ।”—हितोपदेश १४:२३.

तल दिइएका सल्लाहहरूले तपाईँलाई काममा रमाउन मदत गर्नेछ:

काममा अझै सिपालु हुनुहोस्‌। घरको काम गर्दा होस्‌ या स्कुलको होमवर्क गर्दा वा जागिर खाँदा नै किन नहोस्‌, आफूले पाएको काम तनमनले पूरा गर्नुहोस्‌। काम सिक्नुभएपछि उन्‍नति गर्न अझ के गर्न सक्नुहुन्छ, विचार गर्नुहोस्‌। काममा जति सिपालु हुँदै जानुहुन्छ, काम गर्न तपाईँलाई त्यति नै रमाइलो लाग्नेछ।

बाइबलको सिद्धान्त: “आफ्नो काममा सिपालु कुनै मानिसलाई तँ देख्छस्‌? निपुण कारीगरले राजाको सेवा गर्छ, त्यसले साधारण मानिसको सेवा गर्दैन।”—हितोपदेश २२:२९.

आफ्नो सोचाइ फराकिलो बनाउनुहोस्‌। आफ्नो जिम्मेवारी राम्ररी पूरा गर्दा अरूलाई पनि फाइदा हुन्छ। जस्तै: मेहनती भएर घरको काम गर्दा अरू सदस्यको कामको भार कम हुन्छ।

बाइबलको सिद्धान्त: “लिनुमा भन्दा दिनुमा धेरै आनन्द छ।”—प्रेषित २०:३५.

थप काम गर्न इच्छुक हुनुहोस्‌। आफूलाई दिइएको काम मात्र गर्नुको साटो अझ बढी गर्ने प्रयास गर्नुहोस्‌। करकापमा परेर होइन तर स्वेच्छाले थप काम गर्नुभयो भने तपाईँ जीवनको आनन्द उठाउन सक्नुहुन्छ।—मत्ती ५:४१.

बाइबलको सिद्धान्त: “तिमीले करकापमा परेर होइन तर स्वेच्छाले असल काम गरेको म चाहन्छु।”—फिलेमोन १४.

सन्तुलित हुनुहोस्‌। मेहनती मानिसहरू काम गर्न अल्छी गर्दैनन्‌ न त काममा लग्गू नै हुन्छन्‌। तिनीहरू सन्तुलित हुन्छन्‌। तर कसरी? तिनीहरू काम गर्न कडा मेहनत गर्छन्‌ अनि समय-समयमा आराम पनि गर्छन्‌। त्यसैले तिनीहरू आनन्दित हुन्छन्‌।

बाइबलको सिद्धान्त: “दुवै मुठी भएर व्यर्थको परिश्रम गरेको भन्दा एक मुठी विश्राम असल हो।”—उपदेशक ४:६, NW.