युवाहरूका लागि
१२: लक्ष्य राख्नुहोस्
यसको अर्थ के हो?
लक्ष्य राख्नु भनेको आफ्नो इच्छा पूरा गर्न चाहनु मात्र होइन। यसमा राम्रो योजना बनाउनु, आवश्यक परेमा छाँटकाँट गर्नु अनि कडा मेहनत गर्नु समावेश छ।
कुनै-कुनै लक्ष्य छोटो समयमा हासिल गर्न सकिन्छ। तर कुनै लक्ष्य हासिल गर्न भने महिनौँ वा वर्षौँ लाग्न सक्छ। ससाना लक्ष्यहरू हासिल गर्दै जाँदा ठूलठूला लक्ष्यहरू हासिल गर्न सकिन्छ।
यस विषयमा किन चासो राख्नुपर्छ?
लक्ष्य हासिल गर्दै जाँदा हाम्रो मनोबल बढ्छ। साथीभाइसितको हाम्रो सम्बन्ध अझ राम्रो हुन्छ अनि आनन्द पनि बढ्छ।
आत्मविश्वास: ससाना लक्ष्यहरू राखेर ती हासिल गर्दै जाँदा हाम्रो आत्मविश्वास बढ्छ। यसले गर्दा ठूलठूलो लक्ष्य राख्ने हौसला पाउँछौँ। दिनहुँ आइपर्ने चुनौतीहरू सामना गर्न पनि सजिलो लाग्नेछ। जस्तै: साथीहरूको दबाब सजिलै तिरस्कार गर्न सक्नेछौँ।
साथीसितको सम्बन्ध: मानिसहरू लक्ष्य भएको व्यक्तिसित सङ्गत गर्न रुचाउँछन्। किनभने त्यस्तो व्यक्तिलाई आफूले के गर्नुपर्ने हो, थाह हुन्छ अनि त्यसअनुसार काम गर्न पनि तयार हुन्छ। यदि तपाईँले आफ्नो साथीसँगै मिलेर कुनै लक्ष्य राख्नुभयो र त्यो हासिल गर्न सँगै काम गर्नुभयो भने तपाईँहरूको सम्बन्ध अझै बलियो हुनेछ।
आनन्द: तपाईँले कुनै लक्ष्य राख्नुभयो र त्यो हासिल गर्न सफल हुनुभयो भने सन्तुष्ट हुन सक्नुहुन्छ।
“मलाई लक्ष्य राख्न मन पर्छ। लक्ष्य राख्दा व्यस्त भइरहन सक्छु र त्यो हासिल गर्दा एकदमै खुसी लाग्छ। मनमनै सोच्छु, ‘वाह! मैले गर्छु भनेको थिएँ, गरेरै देखाएँ!’”––क्रिस्टोफर
बाइबलको सिद्धान्त: “कसैले ठीक मौसम पर्खि बसे, उसले कहिल्यै बिउ छर्न सक्दैन। अनि कोहीले हर बादल बर्षन्छ नै भनी डराए, उसले अन्न उठाउनै सक्दैन।”—उपदेशक ११:४, ERV.
तपाईँ के गर्न सक्नुहुन्छ?
लक्ष्य राख्न र त्यो हासिल गर्न निम्न कुराहरू गर्न सक्नुहुन्छ:
लक्ष्य तय गर्नुहोस्। सम्भाव्य लक्ष्यहरू विचार गर्नुहोस्। पहिला कुन लक्ष्य हासिल गर्ने र त्यसपछि कुन-कुन, पक्का गर्नुहोस्।
योजना बनाउनुहोस्। हरेक लक्ष्यको लागि यी कुराहरू गर्नुहोस्:
-
कहिलेसम्म पूरा गर्न सकिन्छ, व्यावहारिक भई समय तोक्नुहोस्।
-
आवश्यक योजनाहरू बनाउनुहोस्।
-
सम्भाव्य चुनौती र समाधानबारे विचार गर्नुहोस्।
काम गर्नुहोस्। सबै योजना बनेपछि मात्रै काम सुरु गर्छु भनेर नसोच्नुहोस्। बरु काम थालिहाल्नुहोस्। आफैलाई सोध्नुहोस्, ‘लक्ष्य हासिल गर्न सुरुमा के गरूँ?’ अनि त्यसअनुसार कदम चाल्नुहोस्। लक्ष्यसम्म पुग्न कति प्रगति गर्नुभयो, समय-समयमा जाँच्नुहोस्।
बाइबलको सिद्धान्त: “पूर्व-सोच र परिश्रमले अवश्य लाभ ल्याउँछ।”—हितोपदेश २१:५.
अन्य रोचक विषयहरू
तपाईंका साथीहरू के भन्छन्?
क्याम्रनले उत्तम जीवन पाइन्
के तपाईँ आफ्नो जीवन सफल भएको चाहनुहुन्छ? क्याम्रन आफूले कहिल्यै नसोचेको ठाउँमा पुगिन्। तैपनि उनी कसरी आनन्दित हुन सकिन्, हेर्नुहोस्।
युवाहरू सोध्छन्
आफ्नो लागि प्रेरणाको स्रोत कसरी रोज्ने?
कसैलाई प्रेरणाको स्रोत बनाउँदा तपाईंले समस्याहरूदेखि जोगिन, लक्ष्य र सफलता हासिल गर्न मदत पाउनुहुनेछ। तर तपाईंले कस्ता व्यक्तिहरूलाई प्रेरणाको स्रोत बनाउनुपर्छ?
