तरकारी खानुहोस्!
तरकारी खानुहोस्!
ब्राजिलका ब्यूँझनुहोस्! लेखकद्वारा
“कस्तो तीतो।” “कस्तो नमीठो।” “यस्तो त मैले कहिल्यै खाएको छैन।”
थुप्रै मानिसले तरकारी खान नाइँनास्ती गर्ने कारणहरूमध्ये यी केही हुन्। तपाईं नि? के तपाईं दिनहुँ तरकारी खानुहुन्छ? किन कसैलाई तरकारी मनपर्छ र कसैलाई मनपर्दैन, सो पत्ता लगाउन ब्यूँझनुहोस्!-ले थुप्रै अन्तरवार्ता लिएको थियो।
तरकारी खानेहरूले आफ्ना आमाबाबुले तरकारी, गेडागुडी तथा फलफूलको महत्त्वबारे सिकाएको बताए। त्यसको विपरित, तरकारी मन नपराउनेहरूले भने सानोदेखि नै तरकारी खाने बानी नभएको कुरा गरे। तरकारी खानुको सट्टा यिनीहरू बजारी खाना रुचाउँथे। तर यिनीहरूले पनि सुस्वास्थ्यको लागि तरकारी महत्त्वपूर्ण छ भनी मानिलिए।
आमाबाबु हो, आफ्नो छोराछोरीलाई तरकारी खान सिकाउनुहोस्! तर कसरी? युनाइटेड नेसन्स चिल्डेर्न फन्ड्स-द्वारा प्रकाशित फ्याक्ट्स फर लाइफ-ले लगभग छ महिना पुगेका केटाकेटीहरूलाई आमाको दुध वा बोतलको दुध खुवाइसकेपछि कम्तिमा पनि दिनको एकचोटि, उसिनेर बोक्रा छोडाएपछि मुछेको तरकारी खुवाउनुपर्छ भन्ने सुझाउ दियो। खानेकुराको परिकार जति धेरै भयो, बच्चाको लागि त्यतिनै राम्रो हुन्छ। ब्राजिलियन बाल विशेषज्ञ डा. भ्याग्नर लपटेको भनाइअनुसार दुई वर्षसम्मका बच्चाको प्रमुख खाना दुध नै हो, तर यस अवधिमा अरू खानाहरू पनि समावेश गर्दा “बच्चाले नयाँ नयाँ स्वाद चाख्न सिक्छन्।”
मेडिसिना मिटुस इ भर्डडिस (औषधी—मिथ्या र सत्य) नामक पुस्तकमा कार्ला लिओनलको सुझाउअनुसार माथि उल्लेख गरिएको भन्दा पनि कम उमेरमा सुन्तलाको रस, फलफूलहरूको (जस्तै, केरा, स्याउ र मेवा) लेदो, लिटो र तरकारीको सुरुवा बच्चाको खुराकमा समावेश गर्न सकिन्छ। यस सम्बन्धी बेग्लाबेग्लै धारणा हुने भएकोले यसबारे आफ्नो बाल-चिकित्सकसँग परामर्श लिनु बुद्धिमानी हुनेछ। (g01 1/08)