बाइबलको दृष्टिकोण
परमेश्वरबारे सत्य कुरा
परमेश्वर कस्तो हुनुहुन्छ?
“परमेश्वर अदृश्य व्यक्ति हुनुहुन्छ।”—यूहन्ना ४:२४.
बाइबल के भन्छ?
बाइबलमा परमेश्वर अदृश्य व्यक्ति हुनुहुन्छ भनेर बताइएको छ। (२ कोरिन्थी ३:१७) उहाँ हामीभन्दा सर्वोच्च हुनुहुन्छ र उहाँलाई देख्ने क्षमता हामीसित छैन। पहिलो तिमोथी १:१७ मा उहाँ “युगयुगका महाराजा, अविनाशी, अदृश्य” हुनुहुन्छ भनेर बताइएको छ। बाइबलमा यसो पनि भनिएको छ: “कसैले कहिल्यै परमेश्वरलाई देखेको छैन।”—१ यूहन्ना ४:१२.
सृष्टिकर्ता हामीभन्दा यत्ति उच्च हुनुहुन्छ कि हामी उहाँको स्वरूप कस्तो छ भनेर कल्पना पनि गर्न सक्दैनौं। यशैया ४०:१८ यसो भन्छ, “तिमीहरू परमेश्वरको तुलना कससित गर्नेछौ? अथवा केको प्रतिरूपसित उहाँको मिलान गर्नेछौ?” सर्वशक्तिमान् परमेश्वरको अगाडि अचम्मलाग्दा कुराहरूले भरिएको ब्रह्माण्डसमेत फिक्का छ।—यशैया ४०:२२, २६.
तर परमेश्वरलाई देख्न सक्ने अनि उहाँसँग सीधै कुरा गर्न सक्ने बौद्धिक प्राणीहरू पनि छन्। तिनीहरूले कसरी देख्न सकेका? किनकि तिनीहरू पनि अदृश्य व्यक्तिहरू हुन् र स्वर्गमा बस्छन्। (१ राजा २२:२१; हिब्रू १:७) मानिसभन्दा उच्च व्यक्तिहरू अर्थात् स्वर्गदूतहरूबारे येशू ख्रीष्टले यसो भन्नुभयो, “[तिनीहरूले] स्वर्गमा बस्नुहुने मेरो बुबाको मुहार सधैं हेरिरहेका हुन्छन्।”—मत्ती १८:१०.
के परमेश्वर सर्वव्यापी हुनुहुन्छ?
“तिमीहरूले यसरी प्रार्थना गर्नू: ‘हे स्वर्गमा बस्नुहुने हाम्रा बुबा।’”—मत्ती ६:९.
बाइबल के भन्छ?
बाइबलले उहाँ कुनै शक्तिझैं सर्वव्यापी अर्थात् हरसमय जहाँ पनि हुनुहुन्छ भनेर सिकाउँदैन। बरु मत्ती ६:९ र १८:१० मा येशूले भन्नुभएझैं उहाँ एक व्यक्ति—“बुबा” हुनुहुन्छ र उहाँको “बासस्थान स्वर्ग” हो।—१ राजा ८:४३.
आफ्नो जीवनको अन्ततिर येशूले यसो भन्नुभयो: “म यो संसार छोडेर बुबाकहाँ जाँदैछु।” (यूहन्ना १६:२८) येशू मानिसको रूपमा मर्नुभएपछि अदृश्य व्यक्तिको रूपमा ब्यूँताइनुभयो र उहाँ “परमेश्वरसामु देखा पर्नलाई स्वर्गमै पस्नुभयो।”—हिब्रू ९:२४.
परमेश्वरबारे यी तथ्य कुराहरू थाह पाउनु जरुरी छ। किन? एउटा कारण त परमेश्वर एक व्यक्ति हुनुभएकोले हामी उहाँबारे सिक्न सक्छौं र उहाँको नजिक हुन सक्छौं। (याकूब ४:८) अर्को कारण, परमेश्वरबारे सत्य कुरा थाह पाउँदा हामी झूटो उपासनादेखि जोगिन्छौं। जस्तै: मूर्तिपूजाबाट। पहिलो यूहन्ना ५:२१ यसो भन्छ, “ए साना केटाकेटीहरू हो, मूर्तिहरूदेखि जोगिओ।”
परमेश्वरले मानिसलाई कसरी आफ्नै स्वरूपमा सृष्टि गर्नुभयो?
“परमेश्वरले मानिसलाई आफ्नै स्वरूपमा सृष्टि गर्नुभयो। परमेश्वरकै स्वरूपमा उहाँले तिनलाई सृष्टि गर्नुभयो। नर र नारीनै गरी उहाँले तिनीहरूलाई सृष्टि गर्नुभयो।”—उत्पत्ति १:२७.
बाइबल के भन्छ?
हामीसित परमेश्वरका गुणहरू जस्तै प्रेम, न्याय र बुद्धि झल्काउन सक्ने क्षमता छ। बाइबलमा यसो पनि भनिएको छ: “प्यारा केटाकेटीहरूझैं परमेश्वरको देखासिकी गर्नेहरू होओ।”—एफिसी ५:१, २.
परमेश्वरले हामीलाई स्वतन्त्र इच्छासहित सृष्टि गर्नुभयो। त्यसैले हामी असल र खराब छुट्ट्याउन सक्छौं र अरूलाई विभिन्न तरिकामा माया देखाउन सक्छौं। (१ कोरिन्थी १३:४-७) साथै विभिन्न नयाँ कुराहरू गर्ने, सुन्दर कुराहरू हेरेर आनन्दित हुने र आफू वरपर सृष्टिमा भएका अचम्मका कुराहरू हेरेर चकित हुने क्षमता हामीसित छ। सबैभन्दा महत्त्वपूर्ण कुरा त हामी सृष्टिकर्ताबारे र उहाँको इच्छाबारे सिक्ने चाहनासहित सृष्टि गरिएका छौं।—मत्ती ५:३.
बाइबलको सत्य कुराले तपाईंलाई कसरी मदत गर्न सक्छ? परमेश्वरबारे हामी जत्ति धेरै सिक्छौं र उहाँको अनुकरण गर्छौं त्यत्ति नै उहाँले चाहनुभएअनुसार जीवन बिताउनेछौं। परिणामस्वरूप जीवनमा अझै आनन्दित हुन सक्छौं। साँचो सन्तुष्टि र मनोशान्ति पनि पाउनेछौं। (यशैया ४८:१७, १८) आफ्ना मनमोहक गुणहरूले मानिसहरूको मन छुनेछ, इमानदार मानिसहरूलाई आफ्नो नजिक ल्याउनेछ र अनन्त जीवनको बाटोमा डोऱ्याउनेछ भनेर परमेश्वरलाई थाह छ।—यूहन्ना ६:४४; १७:३. (g13-E 05)
अन्य रोचक विषयहरू
बाइबलसम्बन्धी प्रश्नहरूको जवाफ
के परमेश्वर कुनै भावना नभएको शक्ति हुनुहुन्छ?
परमेश्वरले सबै कुरा सृष्टि गर्नुभयो भनी बाइबल भन्छ। तर के उहाँ हाम्रो ख्याल राख्नुहुन्छ?
बाइबलसम्बन्धी प्रश्नहरूको जवाफ
के परमेश्वर सबै ठाउँमा हुनुहुन्छ—सर्वव्यापी हुनुहुन्छ?
के बाइबलले परमेश्वर सर्वव्यापी हुनुहुन्छ भनेर सिकाउँछ? उहाँ निश्चित ठाउँमा बास गर्नुभए पनि तपाईँलाई चिन्नुहुन्छ भनेर किन ढुक्क हुन सक्नुहुन्छ?
बाइबलसम्बन्धी प्रश्नहरूको जवाफ
के ईश्वरलाई कसैले देखेको छ?
बाइबलको एउटा विवरणमा ईश्वरलाई “कुनै मानिसले कहिल्यै देखेको छैन” भनी बताइएको छ। तर मोशाले “इस्राएलका परमेश्वरको दर्शन गरे” भनेर पनि बाइबलमा बताइएको छ। त्यसोभए के यसले बाइबलको शिक्षा आपसमा बाझिन्छ भनेर देखाउँछ?
