मानिसहरू सधैँभरि पृथ्वीमा बाँच्नेछन्‌ भन्‍ने सुसमाचार बाइबलमा लेखिएको छ। (भजन ३७:२९) बाइबल ६६ वटा स-साना किताब मिलेर बनेको छ। बाइबल लेख्न परमेश्‍वरले करिब ४० जना विश्‍वासी पुरुषहरू प्रयोग गर्नुभयो। सुरुका पाँच वटा किताब मोसा नाम गरेका व्यक्‍तिले लगभग ३ हजार ५ सय वर्षअघि लेखे। अन्तिम किताब येसुका चेला युहन्‍नाले १ हजार ९ सय वर्षभन्दा अघि लेखे। बाइबल लेखकहरूले बाइबलमा कसका विचारहरू लेखे? परमेश्‍वरले तिनीहरूलाई आफ्नो विचार बताउन पवित्र शक्‍ति प्रयोग गर्नुभयो। (२ समुएल २३:२) तिनीहरूले बाइबलमा आफ्नो विचार होइन, परमेश्‍वरको विचार लेखे। त्यसैले बाइबलको मूल लेखक यहोवा परमेश्‍वर नै हुनुहुन्छ।—२ तिमोथि ३:१६; २ पत्रुस १:२०, २१ पढ्‌नुहोस्‌।

 बाइबलको वास्तविक लेखक को हो? भन्‍ने भिडियो हेर्नुहोस्‌

 बाइबल परमेश्‍वरले दिनुभएको हो भनेर हामी पक्का हुन सक्छौँ किनभने यसमा भविष्यका कुराहरू विस्तृत रूपमा बताइएका छन्‌ र ती सही साबित हुँदै आएका छन्‌। कुनै पनि मानिससँग त्यस्तो क्षमता छैन। (यहोसु २३:१४) सर्वशक्‍तिमान्‌ परमेश्‍वरले मात्र मानवजातिको भविष्य थाह पाउन सक्नुहुन्छ।—यसैया ४२:९; ४६:१० पढ्‌नुहोस्‌।

 बाइबल परमेश्‍वरले दिनुभएको हुनाले यो साँच्चै बेजोड छ। बाइबल सयौँ भाषामा करोडौँ प्रति वितरण भएको छ। बाइबल पुरानो किताब भए तापनि यो प्रमाणित विज्ञानसँग मेल खान्छ। यसका ४० जना लेखकको कुरा आपसमा बाझिएको छैन। a त्यसबाहेक बाइबलमा परमेश्‍वरको प्रेमको प्रमाण स्पष्टै पाउन सकिन्छ र यसमा अझै पनि मानिसको जीवनलाई सुधार्ने क्षमता छ। यी तथ्यले बाइबल परमेश्‍वरको वचन हो भन्‍ने कुरामा लाखौँ मानिसलाई विश्‍वस्त बनाएको छ।—१ थिस्सलोनिकी २:१३ पढ्‌नुहोस्‌।

 के बाइबल भरपर्दो किताब हो? भन्‍ने भिडियो हेर्नुहोस्‌

 परमेश्‍वरले मानिसजातिको लागि एउटा मायालु उद्देश्‍य राख्नुभएको छ भन्‍ने सुसमाचार बाइबलको मुख्य विषय हो। मानव इतिहासको सुरुमै मानिसजातिले पृथ्वीको सुन्दर बगैँचामा जीवन बिताउने मौका कसरी गुमाए तर पृथ्वी कसरी फेरि सुन्दर बगैँचा हुनेछ भनेर बाइबलमा बताइएको छ।—प्रकाश २१:४, ५ पढ्‌नुहोस्‌।

 परमेश्‍वरको वचनमा विभिन्‍न नियम, सिद्धान्त र सल्लाह पाइन्छ। साथै परमेश्‍वरले मानिसजातिसित कस्तो व्यवहार गर्नुभयो भनेर बाइबलमा लेखिएको छ। ती विवरणहरूबाट हामी परमेश्‍वरको व्यक्‍तित्वबारे सिक्न सक्छौँ। त्यसकारण परमेश्‍वरलाई चिन्‍न बाइबलले तपाईँलाई मदत गर्न सक्छ। तपाईँ कसरी परमेश्‍वरको मित्र हुन सक्नुहुन्छ भनेर पनि बाइबल बताउँछ।—भजन १९:७, ११; याकुब २:२३; ४:८ पढ्‌नुहोस्‌।

 येसुले जुन तरिकामा मानिसहरूलाई बाइबलबारे बुझाउनुभएको थियो, यस पुस्तिकाले पनि तपाईँलाई त्यस्तै तरिकामा बाइबलको कुरा बुझ्न मदत गर्नेछ। येसुले एकपछि अर्को बाइबल पद उल्लेख गर्दै मानिसहरूलाई “धर्मशास्त्रको अर्थ” बुझाइदिनुभयो।—लुका २४:२७, ४५ पढ्‌नुहोस्‌।

 परमेश्‍वरबाट आएको सुसमाचारजत्तिको मनमोहक कुरा अरू छैन। तर कोही-कोही यसमा चासै दिँदैनन्‌ अनि अरू भने यसबारे कुरा गर्दा रिसाउँछन्‌। तर निराश नहुनुहोस्‌। परमेश्‍वरलाई चिन्‍नुभयो भने तपाईँले अनन्त जीवनको आशा पाउन सक्नुहुन्छ।—युहन्‍ना १७:३ पढ्‌नुहोस्‌।