पावलको तेस्रो प्रचार-यात्रामा तिनी गएको अन्तिम ठाउँ यरुसलेम थियो। त्यहाँ तिनी पक्राउ परे र तिनलाई झ्यालखानामा हालियो। एक रात दर्शनमा येसुले तिनलाई भन्‍नुभयो: ‘अब तिमी रोम जानेछौ र त्यहाँ प्रचार गर्नेछौ।’ पावललाई यरुसलेमबाट सिजरिया लगियो। त्यहाँ तिनले दुई वर्ष बिताए। मुद्दा चलिरहेको बेला पावलले राज्यपाल फेस्तससामु भने: ‘म रोममा सिजरसामु आफ्नो कुरा राख्न चाहन्छु।’ तब फेस्तसले भने: “तिमीले सिजरलाई अपिल गरेका छौ, त्यसैले तिमी सिजरकहाँ नै जानेछौ।” पावललाई जहाज चढाएर रोम पठाइयो र तिनीसँगै अरू दुई जना लुका र अरिस्तार्खस पनि गए।

समुद्रमा ठूलो आँधी आयो र त्यो आँधी धेरै दिनसम्म चल्यो। सबैले अब मरिने भयो भन्ठाने। तर पावलले भने: ‘मित्रहरू हो, हिजो राती एक जना स्वर्गदूतले मलाई सपनामा यसो भने: “नडराऊ पावल। तिमी सिजरसामु खडा हुनै पर्छ अनि हेर, तिमीसँगै यात्रा गर्नेहरूको ज्यान पनि परमेश्‍वरले जोगाउनुहुनेछ!” हरेस नखानुहोस्‌! हामी मर्नेछैनौँ।’

आँधी १४ दिनसम्म चल्यो। त्यसपछि मात्र तिनीहरूले जमिन देखे। त्यो माल्टा टापु थियो। जहाज बज्रियो र टुक्राटुक्रा भयो। तर जहाजमा भएका २७६ जना सबै सकुशल किनारामा पुगे। कोही पौडेर अनि कोहीचाहिँ जहाजका टुक्राटाक्रीको सहारा लिएर किनारामा आइपुगे। माल्टाका मानिसहरूले तिनीहरूको ख्याल राखे र तिनीहरूलाई न्यानो होस्‌ भनेर आगो बालिदिए।

तीन महिनापछि सिपाहीहरूले पावललाई अर्को जहाजमा रोम लगे। पावल त्यहाँ पुग्दा भाइहरू भेट्‌न आए। तिनले भाइहरूलाई देखेपछि यहोवा परमेश्‍वरलाई धन्यवाद दिए र हौसला पाए। तिनी कैदी भए तापनि तिनले छुट्टै भाडाको कोठामा बस्ने अनुमति पाए र तिनलाई पहरा दिन एक जना सैनिक खटाइयो। त्यहाँ तिनी दुई वर्ष बसे। मानिसहरू तिनलाई भेट्‌न आउँदा तिनी उनीहरूलाई परमेश्‍वरको राज्यबारे प्रचार गर्थे र येसुबारे सिकाउँथे। पावलले एसिया माइनर र यहुदियाका मण्डलीहरूलाई पत्रहरू पनि लेखे। यहोवा परमेश्‍वरले जातिजातिका मानिसहरूलाई सुसमाचार सुनाउन पावललाई चलाउनुभयो।