प्रेषित २:१-४७
२ पेन्तिकोसको* चाडको दिनमा तिनीहरू सबै एकै ठाउँमा भेला भएका थिए,
२ अनि त्यहाँ अकस्मात् ठूलो बतास चलेकोजस्तो आवाज आयो र तिनीहरू बसिरहेको घरभरि गुन्जियो।
३ अनि तिनीहरूले जिब्रोजस्तो देखिने आगोका ज्वालाहरू देखे र ती छुट्टिएर हरेकमाथि एउटा-एउटा बस्यो।
४ तिनीहरू सबै जना पवित्र शक्तिले भरिपूर्ण भए अनि पवित्र शक्तिले तिनीहरूलाई जुन-जुन भाषामा बोल्ने क्षमता दियो, तिनीहरू त्यही-त्यही भाषामा बोल्न थाले।
५ त्यतिखेर, संसारका सबै राष्ट्रबाट भक्त यहूदीहरू यरूशलेम आएका थिए।
६ त्यसैले जब यो आवाज सुनियो, तब भीड जम्मा भयो र तिनीहरू चकित भए, किनकि चेलाहरूले तिनीहरूकै आ-आफ्नो भाषामा बोलेको तिनीहरूले सुने।
७ वास्तवमा, तिनीहरू आश्चर्यचकित भएका थिए र तिनीहरू अचम्म मान्दै यसो भन्न थाले: “हेर त, यी बोल्नेहरू के सबै गालीली होइनन् र?
८ त्यसोभए हामी सबैले कसरी तिनीहरू हाम्रो मातृभाषामा बोलेको सुन्दैछौं?
९ हामी पार्थी, मादी र एलामीहरू हौं अनि मेसोपोटामिया, यहूदिया, क्यापाडोसिया, पोन्टस र एसिया* प्रान्तका बासिन्दा हौं।
१० अनि फ्रिजिया, पाम्फिलिया, मिश्र, साइरेनीतिर पर्ने लिबियाको भू-भागका मानिसहरू र रोमबाट आएका यात्रीहरू हौं अनि हामी सबै या त यहूदी या धर्म परिवर्तन गरेर यहूदी बनेकाहरू हौं।
११ हामीमाझ क्रेटी र अरबीहरू पनि छन् तैपनि यिनीहरूले हाम्रो भाषामा परमेश्वरको विषयमा अद्भुत कुराहरू गरिरहेका हामी सुन्दैछौं।”
१२ हो, तिनीहरू सबै छक्क परेका थिए र अचम्म मान्दै एक-अर्कालाई यसो भन्दै थिए: “यी सबको अर्थ के हो?”
१३ तर अरू कोही-कोहीले भने तिनीहरूको गिल्ला गर्दै यसो भन्न थाले: “तिनीहरू नयाँ मद्यले मात्तिएका हुन्।”
१४ तर एघार जना प्रेषितसँगै पत्रुस उठे अनि ठूलो स्वरमा तिनीहरूलाई यसो भने: “हे यहूदियाका मानिसहरू हो अनि यरूशलेमका सबै बासिन्दाहरू हो, तपाईंहरूलाई यो थाह होस् अनि कान थापेर मेरो कुरा सुन्नुहोस्।
१५ तपाईंहरूले सोचेजस्तो यी मानिसहरू मात्तिएका होइनन्, किनकि अहिले बिहानको नौ मात्र बजेको छ।
१६ बरु यो त भविष्यवक्ता योएलमार्फत भनिएको कुरा पूरा भएको हो:
१७ ‘परमेश्वर भन्नुहुन्छ, “अन्तको दिनमा सबै मानिसहरूमाथि म आफ्नो पवित्र शक्ति खन्याउनेछु अनि तिमीहरूका छोराहरू र तिमीहरूका छोरीहरूले भविष्यवाणी गर्नेछन् अनि तिमीहरूका ठिटाहरूले दर्शन देख्नेछन् र तिमीहरूका बूढापाकाहरूले सपना देख्नेछन्।
१८ अनि ती दिनमा मेरा दासहरू र मेरा दासीहरूमाथि समेत म आफ्नो पवित्र शक्ति खन्याउनेछु र तिनीहरूले भविष्यवाणी गर्नेछन्।
१९ माथि आकाशमा म आश्चर्यजनक कामहरू गर्नेछु र तल पृथ्वीमा चिन्हहरू देखाउनेछु: रगत, आगो र धुवाँको मुस्लो।
२० यहोवाको महान् र महिमित दिन आउनुअघि सूर्य अन्धकारमा र चन्द्रमा रगतमा परिणत हुनेछ।
२१ अनि हरेक जसले यहोवाको नाम पुकार्छ, उसले उद्धार पाउनेछ।” ’
२२ “हे इस्राएलका मानिसहरू हो, यो कुरा सुन्नुहोस्: नासरी येशू, जसलाई तपाईंहरूसामु खुलमखुला प्रकट गर्न परमेश्वरले उहाँमार्फत शक्तिशाली काम, आश्चर्यजनक कार्य र चमत्कारहरू गर्नुभयो अनि जुन कुरा तपाईंहरूलाई पनि थाहै छ,
२३ यिनै मानिस, जसलाई परमेश्वरको उद्देश्य र पूर्वज्ञानअनुसार तपाईंहरूको हातमा सुम्पिइयो, तिनैलाई तपाईंहरूले कुकर्मीहरूको हातमा सुम्पिदिनुभयो र खम्बामा टाँगेर मार्नुभयो।
२४ तर परमेश्वरले उहाँलाई मृत्युको बन्धनबाट मुक्त गरेर पुनर्जीवित गर्नुभयो, किनकि उहाँ सधैंभरि त्यसको बन्धनमा रहिरहन सम्भव थिएन।
२५ किनकि उहाँको विषयमा दाऊद यसो भन्छन्: ‘यहोवा सदैव मेरो नजरसामु हुनुहुन्थ्यो, किनकि म नडगमगाऊँ भनेर उहाँ मेरो दाहिने हाततर्फ हुनुहुन्छ।
२६ यसले गर्दा मेरो मन प्रफुल्लित भयो र असाध्यै हर्षित भएर मैले बोलें। अनि मेरो शरीरसमेत आशामा जिउनेछ,
२७ किनकि तपाईंले मलाई* चिहानमा * छोड्नुहुनेछैन, न त तपाईंले आफ्नो भक्त जनलाई कुहिन नै दिनुहुनेछ।
२८ तपाईंले मलाई जीवनको मार्ग देखाउनुभएको छ, आफ्नो कृपालु नजरले तपाईंले मलाई आनन्दले भरिदिनुहुनेछ।’
२९ “भाइहरू हो, कुलपुरुष दाऊदको विषयमा तपाईंहरूलाई निर्धक्क भई साहसका साथ बताउन मलाई अनुमति दिनुहोस्, जो मरे र गाडिए अनि तिनको चिहान आजको दिनसम्म यहीं छ।
३० तिनी भविष्यवक्ता भएकोले अनि तिनको सिंहासनमा तिनकै सन्तानमध्ये एक जनालाई बसाउनेछु भनी परमेश्वरले शपथ खाँदै वाचा गर्नुभएको छ भनी थाह भएकोले गर्दा,
३१ पछि हुने कुरा पहिल्यै थाह पाएर तिनले ख्रीष्ट पुनर्जीवित हुने विषयमा यसो भने, ‘उहाँलाई न चिहानमा* छोडिनेछ न त उहाँको शरीर नै कुहिनेछ।’
३२ यिनै येशूलाई परमेश्वरले ब्यूँताउनुभयो, जसको हामी सबै साक्षी छौं।
३३ उहाँलाई परमेश्वरको दाहिने हाततर्फ सबैभन्दा उच्च पद दिइएकोले अनि प्रतिज्ञा गरिएअनुसारै बुबाबाट पवित्र शक्ति* पाउनुभएकोले त्यही पवित्र शक्ति उहाँले हामीमाथि खन्याउनुभएको छ, जसले काम गरेको तपाईंहरू देख्दै र सुन्दै हुनुहुन्छ।
३४ वास्तवमा दाऊद स्वर्गमा उक्लेनन् तर तिनी आफै यसो भन्छन्: ‘यहोवाले मेरा प्रभुलाई भन्नुभयो, “तिमी मेरो दाहिने हाततिर बस,
३५ जबसम्म म तिम्रा शत्रुहरूलाई तिम्रो पाउदान तुल्याउँदिनँ।” ’
३६ त्यसकारण इस्राएलको सबै घरानालाई अवश्य थाह होस् कि तिनै येशू, जसलाई तपाईंहरूले खम्बामा टाँग्नुभयो, उहाँलाई परमेश्वरले प्रभु र ख्रीष्ट दुवै बनाउनुभयो।”
३७ यो सुनेर तिनीहरूको मन अत्यन्तै विचलित भयो अनि तिनीहरूले पत्रुस र अरू प्रेषितहरूलाई सोधे: “भाइहरू हो, त्यसोभए हामी के गरौं?”
३८ पत्रुसले तिनीहरूलाई भने: “पश्चात्ताप गर्नुहोस् र तपाईंहरू हरेकले आ-आफ्ना पापहरूका क्षमाको लागि येशू ख्रीष्टको नाममा बप्तिस्मा गर्नुहोस् अनि तपाईंहरूले वरदानस्वरूप पवित्र शक्ति सित्तैंमा पाउनुहुनेछ।
३९ किनकि यो प्रतिज्ञा तपाईंहरू र तपाईंहरूका सन्तानका लागि अनि टाढा-टाढाका ती सबै मानिसका लागि हो, जसलाई हाम्रा परमेश्वर यहोवाले आफूतिर खिच्नुहुन्छ।”
४० अनि अरू पनि धेरै वचनद्वारा तिनले राम्ररी साक्षी दिए र यसो भन्दै तिनीहरूलाई प्रोत्साहन दिए: “यस टेढो पुस्तासँगसँगै नाश नहोओ।”
४१ तसर्थ, ज-जसले तिनको वचन खुसीसाथ स्वीकारे, तिनीहरूले बप्तिस्मा गरे अनि त्यस दिन लगभग तीन हजार जना* थपिए।
४२ तिनीहरू प्रेषितहरूको शिक्षा ध्यान दिएर सुन्थे, एक-अर्कासित बाँडचुँड गर्थे, एकसाथ भोजन लिन्थे अनि सँगै प्रार्थना गर्थे।
४३ अनि सबै मानिसलाई* डरले छोप्न लाग्यो र प्रेषितहरूले धेरै आश्चर्यजनक कार्य र चमत्कारहरू गर्न थाले।
४४ जो-जो येशूको चेला बने, तिनीहरूसित भएका सबै कुरा तिनीहरूको साझा हुन्थ्यो।
४५ तिनीहरू आफ्नो सरसामान र जायजेथा बेच्थे अनि त्यसबाट आएको रकम जहिले जसलाई खाँचो पर्थ्यो, त्यसैअनुसार सबैलाई बाँड्थे।
४६ एकै मनका भएर तिनीहरू दिनहुँ मन्दिरमा भेला हुन्थे अनि एक-अर्काको घरमा गएर भोजन गर्थे र बडो आनन्द र स्वच्छ मनले सँगै खान्थे,
४७ अनि परमेश्वरको प्रशंसा गर्थे र सबै मानिसहरूबाट तिनीहरूले राम्रो नाम कमाएका थिए। साथै, उद्धार पाउनेहरूलाई यहोवाले दिनहुँ तिनीहरूको गन्तीमा थप्दै लानुभयो।
