उत्पत्ति १३:१-१८
१३ अब्राम आफ्नी पत्नी, आफूसँग भएका सबै थोक र लुतलाई लिएर मिश्रबाट नेगेबतिर+ लागे।
२ अब्रामसँग प्रशस्त गाईवस्तु र सुनचाँदी थियो।+
३ तिनी नेगेबबाट ठाउँठाउँमा आफ्नो पाल सार्दै बेथेलतिर लागे। अन्तमा तिनी बेथेल र ऐको+ बीचमा आइपुगे, जहाँ तिनी पहिले बसेका थिए।
४ त्यहाँ तिनले एउटा वेदी पनि बनाएका थिए। त्यहाँ अब्रामले यहोवा परमेश्वरको नाम पुकारे।
५ अब्रामसँगै यात्रा गरिरहेका लुतका पनि भेडाबाख्रा, गाईवस्तु र पालहरू थिए।
६ त्यसैले अब्राम र लुतलाई ठाउँ पुगेन। तिनीहरूको सरसम्पत्ति बढ्दै गएकोले तिनीहरूलाई एकै ठाउँमा बस्न गाह्रो भयो।
७ त्यसैले अब्रामका गोठालाहरू र लुतका गोठालाहरू बाझ्न थाले। (त्यतिबेला त्यहाँ कनानीहरू र परिज्जीहरू बसोबास गर्थे।)+
८ तब अब्रामले लुतलाई+ भने: “हेर बाबु, हामी त नातेदार हौँ! तिमी र मबीच अनि तिम्रा गोठालाहरू र मेरा गोठालाहरूबीच झगडा हुनु राम्रो होइन।
९ बरु हामी अलग होऔँ। तिमी यो ठाउँको जुनसुकै भाग छान्न सक्छौ। तिमी देब्रेतिर गयौ भने म दाहिनेतिर जानेछु; तिमी दाहिनेतिर गयौ भने म देब्रेतिर जानेछु।”
१० त्यसपछि लुतले चारैतिर हेरे। तिनले जोअरसम्मै+ फैलिएको यर्दनको सम्पूर्ण इलाका देखे।+ प्रशस्त पानी भएकोले त्यो इलाका यहोवा परमेश्वरले बनाउनुभएको बगैँचाजस्तै* थियो,+ मिश्रको सुन्दर भूमिजस्तै। (सदोम र गमोरालाई यहोवा परमेश्वरले नाश गर्नुअघि त्यहाँको अवस्था यस्तै थियो।)
११ त्यसपछि लुतले यर्दनको सबै इलाका रोजे र आफ्नो पाल उठाएर तिनी पूर्वतिर लागे। यसरी तिनीहरू अलग भए।
१२ अब्राम कनानमै बसिरहे तर लुत भने यर्दन इलाकाका सहरहरूनजिकै बस्न थाले।+ लुतले अन्तमा सदोमनजिकै आफ्नो पाल सारे।
१३ सदोमका मानिसहरू दुष्ट थिए र तिनीहरू यहोवा परमेश्वरको नजरमा घोर पाप गर्थे।+
१४ अब्राम र लुत छुट्टिएपछि यहोवा परमेश्वरले अब्रामलाई यस्तो आग्रह गर्नुभयो: “अब्राम, तिम्रो चारैतिर हेर। तिमी जहाँ उभिरहेका छौ, त्यहाँबाट पूर्व, पश्चिम, उत्तर, दक्षिण सबैतिर हेर।
१५ तिमीले यहाँबाट देखेको सबै इलाका म तिमी र तिम्रा सन्तानलाई सधैँभरिका लागि दिनेछु।+
१६ अनि तिम्रा सन्तानलाई बालुवाजत्तिकै अनगिन्ती बनाउनेछु। यदि कसैले बालुवा गन्न सक्छ भने तिम्रा सन्तानलाई पनि गन्न सक्छ।+
१७ यो इलाका म तिमीलाई दिँदै छु। त्यसैले जाऊ, त्यसको कुनाकुनासम्म चारैतिर घुम।”
१८ तब अब्रामले ठाउँठाउँमा पाल सार्दै आफ्नो यात्रा अघि बढाए। पछि तिनी हेब्रोनको+ मम्रेमा+ बस्न थाले, जहाँ ठूलठूला रूखहरू थिए। तिनले त्यहाँ यहोवा परमेश्वरको लागि वेदी बनाए।+
फुटनोटहरू
^ अर्थात्, अदनको बगैँचाजस्तै।
