नहुम १:१-१५
१ निनवेविरुद्ध+ घोषणा: एल्कोसवासी नहुमको* दर्शन* भएको पुस्तक:
२ यहोवा आफ्नो बाहेक अरूको उपासना गरिएको नसहने+ र बदला लिने परमेश्वर हुनुहुन्छ;
यहोवा बदला लिनुहुन्छ र उहाँ रिस प्रकट गर्न तयार हुनुहुन्छ।+
यहोवा आफ्ना शत्रुहरूसित बदला लिनुहुन्छ;
उहाँ आफ्ना शत्रुहरूको निम्ति रिस साँचेर राख्नुहुन्छ।
३ यहोवा हतपती नरिसाउने+ र अत्यन्तै शक्तिशाली+ परमेश्वर हुनुहुन्छ
तर यहोवा कुनै पनि हालतमा दोषीलाई सजाय नदिई पछि हट्नुहुन्न।+
उहाँ हिँड्नुहुँदा विनाशकारी बतास र आँधी चल्छ
अनि बादलचाहिँ उहाँको पाउको धुलो हो।+
४ उहाँ समुद्रलाई हप्काउनुहुन्छ+ र त्यसलाई सुकाइदिनुहुन्छ;
उहाँ सबै नदीलाई सुकाइदिनुहुन्छ।+
बासान र कर्मेल उजाड हुन्छन्+
अनि लेबनानका फूलहरू ओइलाउँछन्।
५ उहाँले गर्दा पहाडहरू काँप्छन्
अनि डाँडाहरू पग्लिन्छन्।+
उहाँको सामुन्ने पृथ्वी काँप्छ
अनि जमिन र त्यसमा बस्ने सबै थरथराउँछन्।+
६ उहाँको क्रोधको अगाडि को खडा रहन सक्छ?+
उहाँको बल्दो रिसको अगाडि को टिक्न सक्छ?+
उहाँको रिस आगोजस्तै खनिनेछ
अनि उहाँले गर्दा चट्टानहरू चकनाचुर हुनेछन्।
७ यहोवा असल हुनुहुन्छ,+ विपद्को दिनमा उहाँ गढ हुनुहुन्छ।+
उहाँमा शरण लिनेहरूलाई उहाँ चिन्नुहुन्छ।*+
८ उर्लँदो बाढी ल्याएर उहाँले त्यस ठाउँलाई* सर्वनाश गर्नुहुनेछ।
अनि उहाँका शत्रुहरूलाई अन्धकारले पछ्याउनेछ।
९ यहोवाविरुद्ध तिमीहरू षड्यन्त्र रच्न सक्छौ र?
उहाँले सर्वनाश ल्याउनुहुनेछ।
विपत्ति दोस्रो चोटि आउनेछैन।+
१० तिनीहरू काँडाजस्तै आपसमा जेलिएका छन्,
तिनीहरू रक्सीले* मात्तिएकाहरूजस्ता भएका छन्
तर सुकिसकेका ठोसालाई जस्तै तिनीहरूलाई भस्म पारिनेछ।
११ यहोवाविरुद्ध षड्यन्त्र रच्ने एक जना तिमीहरूबाट निस्कनेछ,
जसले व्यर्थको सल्लाह दिनेछ।
१२ यहोवा यसो भन्नुहुन्छ:
“तिनीहरू शक्तिशाली र अनगिन्ती भए तापनि
तिनीहरू सबै काटिनेछन् र तिनीहरूको अन्त हुनेछ।*
मैले तिमीहरूमाथि* विपत्ति ल्याएँ तर अब त्यसो गर्नेछैनँ।
१३ म तिमीहरूको गर्दनमा तिनीहरूले राखेको जुवा भाँचिदिनेछु,
तिमीहरूको बन्धनलाई+ म दुई टुक्रा पारिदिनेछु।
१४ तेरो* बारेमा यहोवाले यस्तो आज्ञा दिनुभएको छ,
‘तेरो वंश थाम्ने कोही रहनेछैन।
तेरा ईश्वरहरूको मन्दिरबाट कुँदिएका मूर्तिहरू र धातुका मूर्तिहरूलाई* म नष्ट गरिदिनेछु।
म तेरो लागि चिहान बनाउनेछु किनकि तँ घृणित छस्।’
१५ हेर! सुसमाचार घोषणा गर्ने अनि शान्तिको घोषणा गर्ने मानिस डाँडाहरू हुँदो आइरहेको छ।+
हे यहुदा, तिम्रा चाडहरू मनाऊ+ र तिम्रा भाकलहरू पूरा गर
किनकि निकम्मा मानिस फेरि कहिल्यै तिम्रो बाटो भएर जानेछैन।
त्यसको अस्तित्व मेटिनेछ।”
फुटनोटहरू
^ यसको अर्थ हो, “सान्त्वना दिने।”
^ वा “ख्याल राख्नुहुन्छ।”
^ अर्थात्, निनवेलाई।
^ वा “गहुँबाट बनेको बियरले।”
^ वा सम्भवतः “र तिनीहरू त्यहाँबाट भएर जानेछन्।”
^ अर्थात्, यहुदामाथि।
^ अर्थात्, अस्सेरियाको।
^ वा “धातु पगालेर बनाइएका मूर्तिहरूलाई।”
