प्रेषितहरूका कार्य ४:१-३७
४ पत्रुस र युहन्ना मानिसहरूसित कुरा गरिरहेको बेला पुजारीहरू, मन्दिरका पहरेदारहरूको नाइके अनि सदुकीहरू+ अचानक त्यहाँ आइपुगे।
२ तिनीहरू चिढिएका थिए किनकि पत्रुस र युहन्ना मानिसहरूलाई सिकाउँदै थिए अनि येसु मृत्युबाट फेरि जीवित हुनुभएको विषयमा* खुलेआम घोषणा गरिरहेका थिए।+
३ तब तिनीहरूले उनीहरूलाई पक्रेर भोलिपल्टसम्म हिरासतमा राखे+ किनकि त्यतिखेर साँझ परिसकेको थियो।
४ तथापि उनीहरूको कुरा सुन्ने थुप्रै मानिसले विश्वास गरे अनि चेलाहरूमा पुरुषहरूको सङ्ख्या लगभग ५ हजार पुग्यो।+
५ भोलिपल्ट यरुसलेममा यहुदीहरूका शासक, धर्मगुरु अनि शास्त्रीहरू भेला भए।
६ मुख्य पुजारी हन्नास,+ कैयाफा,+ युहन्ना, अलेक्जेन्डर अनि मुख्य पुजारीका आफन्तहरू पनि त्यहाँ भेला भएका थिए।
७ तिनीहरूले पत्रुस र युहन्नालाई बीचमा उभ्याए र यसो भन्दै केरकार गर्न थाले: “तिमीहरूले कसको अख्तियार पाएर वा कसको नाममा यो काम गऱ्यौ?”
८ तब पवित्र शक्तिले भरिएर+ पत्रुसले तिनीहरूलाई भने:
“हे इस्राएलका शासक अनि धर्मगुरु हो,
९ यदि तपाईँहरू हामीले एक जना अपाङ्ग मानिसलाई+ निको पारेर जुन असल काम गऱ्यौँ, त्यसको विषयमा केरकार गर्दै हुनुहुन्छ र कसले उसलाई निको पाऱ्यो भनेर जान्न चाहनुहुन्छ भने
१० तपाईँहरू अनि इस्राएलका सबै मानिसलाई यो थाह होस्, नासरी येसु ख्रिष्ट,+ जसलाई तपाईँहरूले खम्बामा टाँग्नुभयो+ तर परमेश्वरले मृत्युबाट ब्युँताउनुभयो,+ हो, उहाँको नाममा यो मानिस सद्दे भएर तपाईँहरूसामु खडा भएको छ।
११ उहाँ नै ‘त्यो ढुङ्गो हुनुहुन्छ, जसको तपाईँ डकर्मीहरूले कदरै गर्नुभएन तैपनि उहाँ कुनाको शिरढुङ्गो+ बन्नुभएको छ।’
१२ साथै उहाँबाहेक+ अरू कसैद्वारा उद्धार हुन सक्दैन किनकि स्वर्गमुनि मानिसहरूमध्ये कसैलाई अर्को कुनै नाम दिइएको छैन, जुन नाम लिएर हामीले उद्धार पाउन सक्छौँ।”+
१३ जब तिनीहरूले पत्रुस र युहन्नाको साहस देखे र दुवै जना अशिक्षित* अनि साधारण मानिस+ रहेछन् भनी बुझे, तब तिनीहरूले अचम्म माने। अनि उनीहरू येसुसित हिँडडुल गर्ने गर्थे+ भनी तिनीहरूले थाह पाए।
१४ अनि जब तिनीहरूले निको भएको त्यस मानिसलाई उनीहरूसँगै उभिरहेको देखे,+ तब तिनीहरू नाजवाफ भए।+
१५ त्यसैले तिनीहरूले उनीहरूलाई यहुदी न्यायपरिषद्को भवनबाहिर जान आज्ञा गरे अनि आपसमा यसो भन्दै छलफल गर्न थाले:
१६ “यी मानिसहरूलाई हामी के गरौँ?+ किनकि यिनीहरूले ठूलो चमत्कार गरेका छन् अनि यरुसलेमका सबै बासिन्दाले त्यो देखेका छन्+ र हामी त्यसलाई इन्कार गर्न पनि सक्दैनौँ।
१७ यसकारण यो कुरा अझ नफैलियोस् भनेर हामी यिनीहरूलाई आइन्दा यस नाममा कुनै मानिससित कुरा नगर्नू भनेर धम्काऔँ।”+
१८ त्यसपछि तिनीहरूले उनीहरूलाई बोलाए अनि येसुको नाममा एक शब्द नबोल्नू अनि नसिकाउनू भनी आज्ञा दिए।
१९ तर पत्रुस र युहन्नाले तिनीहरूलाई यस्तो जवाफ दिए: “परमेश्वरको नजरमा कुन ठीक हो, तपाईँहरूको कुरा सुन्नु कि परमेश्वरको, तपाईँहरू आफै निर्णय गर्नुहोस्।
२० तर जहाँसम्म हाम्रो कुरा छ, हामी आफूले देखेको अनि सुनेको कुरा नबोली बस्न सक्दै सक्दैनौँ।”+
२१ त्यसैले उनीहरूलाई अझै धम्काएर तिनीहरूले छोडिदिए किनकि उनीहरूलाई सजाय दिने कुनै आधार तिनीहरूले भेट्टाएनन्। यसबाहेक जे घटना भयो, त्यो देखेर मानिसहरूले परमेश्वरको महिमा गरिरहेको हुनाले तिनीहरू मानिसहरूदेखि पनि डराएका थिए।+
२२ किनकि चमत्कारपूर्ण तरिकामा निको पारिएको त्यस मानिसको उमेर ४० नाघिसकेको थियो।
२३ मुक्त भएपछि उनीहरू अरू चेलाहरूकहाँ गए अनि मुख्य पुजारीहरू र धर्मगुरुहरूले आफूलाई भनेका सबै कुरा तिनीहरूलाई सुनाए।
२४ यो सुनेपछि तिनीहरू सबैले एकसाथ परमेश्वरलाई यसरी प्रार्थना गरे:
“हे सार्वभौम प्रभु, तपाईँले नै आकाश, पृथ्वी, समुद्र अनि त्यसमा भएका सबै कुरा बनाउनुभयो+
२५ अनि तपाईँले पवित्र शक्तिमार्फत हाम्रा पुर्खा, तपाईँका सेवक दाउदको मुखबाट यसो भन्नुभयो:+ ‘जातिजातिका मानिसहरूले किन खैलाबैला मच्चाए अनि मानिसहरूले किन खोक्रा कुराहरूमा मनन गरे?
२६ यहोवा* अनि उहाँका अभिषिक्त जनको*+ विरुद्धमा पृथ्वीका राजाहरू खडा भए अनि शासकहरू एकजुट भए।’
२७ साँच्चै, तपाईँका पवित्र सेवक, जसलाई तपाईँले अभिषेक गर्नुभयो+ अर्थात् येसुको विरुद्धमा यस सहरमा हेरोद, पन्तियस पिलातस,+ अन्यजातिका मानिसहरू अनि इस्राएलका मानिसहरू एकसाथ भेला भएका थिए।
२८ तपाईँले आफ्नो तागत अनि इच्छाद्वारा पहिल्यै निश्चित गरिसक्नुभएको कुरा+ पूरा गर्न तिनीहरू त्यसरी एकसाथ भेला भएका थिए।
२९ अब हे यहोवा,* तिनीहरूको धम्कीलाई ध्यान दिनुहोस् अनि आफ्ना सेवकहरूलाई अझ निर्भयी भएर तपाईँको वचन बोलिरहन मदत गर्नुहोस्।
३० साथै आफ्नो बाहुली फैलाएर निको पार्ने काम गरिरहनुहोस् अनि तपाईँका पवित्र सेवक येसुको नाममार्फत+ चमत्कार र आश्चर्यजनक कार्यहरू भइरहोस्।”+
३१ तिनीहरूले उत्कट बिन्ती चढाएपछि तिनीहरू भेला भएको ठाउँ हल्लियो र तिनीहरू सबै पवित्र शक्तिले भरिए+ अनि निडर भएर+ परमेश्वरको वचन बोल्न थाले।
३२ यसबाहेक येसुमाथि विश्वास गर्नेजति सबै जना एक चित्तका अनि एकै मनका थिए। तिनीहरूमध्ये एक जनाले पनि आफूसित भएको कुरालाई आफ्नै ठान्दैनथ्यो बरु सबै कुरा तिनीहरूको साझा हुन्थ्यो।+
३३ साथै प्रभु येसु फेरि जीवित हुनुभएको घटनाबारे+ प्रेषितहरूले अत्यन्तै प्रभावकारी साक्षी दिइरहे अनि तिनीहरू सबैमाथि परमेश्वरको असीम अनुग्रह प्रशस्त गरी बर्सिरह्यो।
३४ भनौँ भने तिनीहरूमध्ये एक जना पनि खाँचोमा परेन।+ किनकि ज-जससित खेत वा घर थियो, तिनीहरू सबैले ती बेच्थे र त्यसबाट आएको रकम लगेर
३५ प्रेषितहरूको चरणमा राखिदिन्थे+ अनि हरेकलाई उसको खाँचोअनुसार त्यो रकम दिइन्थ्यो।+
३६ साइप्रसको रैथाने लेवी युसुफ, जसलाई प्रेषितहरूले बर्णाबास+ (जसको अनुवाद गर्दा अर्थ हुन्छ, “सान्त्वनाको छोरा”) भन्ने नाम पनि दिएका थिए,
३७ तिनीसित एक टुक्रा जमिन थियो। तिनले त्यो बेचे र त्यसबाट आएको पैसा लगेर प्रेषितहरूको चरणमा राखिदिए।+
फुटनोटहरू
^ वा “येसु ब्युँतनुभएको घटनालाई उदाहरणको रूपमा चलाएर मरेकाहरू फेरि जीवित हुने विषयमा।”
^ अर्थात्, रब्बीहरूको पाठशालामा शिक्षा नलिएको; यसको अर्थ तिनीहरू निरक्षर थिए भन्ने होइन।
^ अतिरिक्त लेख क५ हेर्नुहोस्।
^ वा “ख्रिष्टको।”
^ अतिरिक्त लेख क५ हेर्नुहोस्।
