यर्मिया १६:१-२१
१६ यहोवाको वचन फेरि मकहाँ आयो। उहाँले मलाई यसो भन्नुभयो:
२ “तिमीले विवाह नगर्नू र छोराछोरी नजन्माउनू।
३ किनभने यहाँ जन्मने छोराछोरी र तिनीहरूका आमाबुबाबारे यहोवा यसो भन्नुहुन्छ:
४ ‘तिनीहरू डरलाग्दो रोगबिमारले मर्नेछन्+ अनि तिनीहरूको लागि शोक गर्ने कोही हुनेछैन। तिनीहरूलाई गाड्ने पनि कोही हुनेछैन। तिनीहरू मलसरि जमिनमा त्यसै रहनेछन्।+ तिनीहरू तरबार र अनिकालले मर्नेछन्।+ तिनीहरूका लास आकाशका चराचुरुङ्गी र पृथ्वीका जनावरहरूको आहारा हुनेछ।’
५ किनकि यहोवा यसो भन्नुहुन्छ,
‘शोक परेको घरमा नजानू,
विलाप गर्न वा समवेदना दिन तिनीहरूकहाँ नजानू।’+
यहोवा यस्तो घोषणा गर्नुहुन्छ: ‘किनकि मैले तिनीहरूलाई दिएको शान्ति खोसिसकेको छु।
तिनीहरूलाई अटल प्रेम र कृपा देखाउन पनि छोडिसकेको छु।+
६ यस देशका ठूलाबडा र गरिबगुरुवा सबै मर्नेछन्।
तिनीहरू गाडिनेछैनन्,
तिनीहरूको लागि कसैले शोक गर्नेछैन
अनि कसैले पनि तिनीहरूको लागि आफ्नो शरीरमा चोट पार्नेछैन र कपाल खौरनेछैन।*
७ शोक परेकाहरूलाई कसैले खानेकुरा दिनेछैन,
तिनीहरूलाई दिलासा दिने कोही हुनेछैन
अनि आमाबुबा गुमाएकाहरूलाई
कसैले सान्त्वनाको कचौरा दिनेछैन।
८ तिमी भोजभतेर भइरहेको घरमा पनि नपस्नू
अनि तिनीहरूसित बसेर खानपिन नगर्नू।’
९ “सेनाहरूका यहोवा, इस्राएलका परमेश्वर यसो भन्नुहुन्छ, ‘तिमीहरू जिउँदो छँदै अनि तिमीहरूकै आँखाअगाडि म यो ठाउँबाट हर्ष र रमाहट हटाइदिनेछु। अनि दुलहा-दुलहीको आवाज पनि बन्द गरिदिनेछु।’+
१० “तिमीले मानिसहरूलाई यो कुरा सुनाएपछि तिनीहरूले सोध्नेछन्, ‘यहोवाले हामीविरुद्ध यत्ति ठूलो विपत्ति ल्याउँछु भनेर किन भन्नुभयो? हामीले यहोवा हाम्रा परमेश्वरविरुद्ध के गल्ती गऱ्यौँ, के पाप गऱ्यौँ?’+
११ त्यतिबेला तिमीले तिनीहरूलाई यस्तो जवाफ दिनू, ‘यहोवा यस्तो घोषणा गर्नुहुन्छ, “तिमीहरूका पितापुर्खाले मलाई त्यागे।+ तिनीहरू अरू देवताको पछि लागिरहे, तिनलाई पुजिरहे अनि दण्डवत् गरिरहे।+ तिनीहरूले मलाई त्यागेर मेरा नियमहरू उल्लङ्घन गरे।+
१२ तर तिमीहरू त तिनीहरूभन्दा पनि दुष्ट रहेछौ।+ मेरो आज्ञा पालन गर्नु त कता हो कता, तिमीहरू आफ्नै हठी हृदयको कुरा सुन्छौ।+
१३ त्यसैले म तिमीहरूलाई लघारेर यस्तो ठाउँमा पठाउनेछु, जुन ठाउँबारे न तिमीहरूले न तिमीहरूका पितापुर्खाले नै सुनेका थियौ।+ त्यहाँ तिमीहरूले दिनरात अरू देवताको सेवा गर्नुपर्नेछ+ किनकि म तिमीहरूलाई रतीभर दया देखाउनेछैनँ।”’
१४ “यहोवा यस्तो घोषणा गर्नुहुन्छ, ‘यस्तो समय आउँदै छ, जब तिनीहरूले “इस्राएलीहरूलाई मिश्रबाट छुटाएर ल्याउनुहुने यहोवाको कसम” भन्नेछैनन्।+
१५ बरु तिनीहरूले “इस्राएलीहरूलाई उत्तरबाट अनि तिनीहरूलाई तितरबितर पारेका अरू सबै देशबाट जम्मा गर्नुहुने यहोवाको कसम” भन्नेछन्। किनकि म तिनीहरूलाई त्यो देशमा फर्काउनेछु, जुन मैले तिनीहरूका पितापुर्खालाई दिएको थिएँ।’+
१६ यहोवा यस्तो घोषणा गर्नुहुन्छ, ‘म धेरै जलारी पठाउनेछु,
तिनीहरूले तिमीहरूलाई जालमा पार्नेछन्।
त्यसपछि म थुप्रै सिकारी पठाउनेछु,
तिनीहरूले तिमीहरूलाई डाँडापाखा
अनि पहराका कुनाकाप्चामा खोजीखोजी सिकार गर्नेछन्।
१७ तिमीहरूले गरेको एक-एक कुरा मैले नियालेको छु।
तिमीहरूको कुनै कुरा मदेखि लुकेको छैन
न त तिमीहरूको गल्ती नै मेरो नजरबाट लुकेको छ।
१८ सुरुमा म तिमीहरूले गरेको गल्ती र पापको पूरापूर हिसाब लिनेछु+
किनकि तिमीहरूले मेरो देशलाई निर्जीव र घिनलाग्दा मूर्तिहरूले दूषित पारेका छौ
अनि मेरो भूमिलाई घिनलाग्दा थोकहरूले भरेका छौ।’”+
१९ हे यहोवा, मेरो बल र मेरो किल्ला,
विपत्तिको दिनमा मेरो शरणस्थान,+
पृथ्वीका कुनाकुनाबाट मानिसहरू तपाईँकहाँ आउनेछन्
अनि तिनीहरूले यसो भन्नेछन्: “हाम्रा पुर्खाहरू त झूटा कुराहरूको पछि लागे,
तिनीहरू व्यर्थका अनि केही फाइदा नहुने कुराहरूको पछि लागे।”+
२० के मानिसले आफ्नो निम्ति देवताहरू बनाउन सक्छ र?
तिनीहरूले बनाएका देवताहरू साँच्चैका देवताहरू होइनन्।+
२१ “त्यसैले अब तिनीहरूले थाह पाउनेछन्;
म तिनीहरूलाई आफ्नो शक्ति र पराक्रम देखाउनेछु।
अनि मेरो नाम यहोवा हो भनेर तिनीहरूले जान्नेछन्।”
फुटनोटहरू
^ झूटा धर्महरूको शोक गर्ने चलन, जुन धर्मत्यागी इस्राएलीहरूले अपनाएका हुन सक्छन्।
