यर्मिया २४:१-१०
-
राम्रा अन्जिर र नराम्रा अन्जिर (१-१०)
२४ बेबिलोनका राजा नबुकद्नेजरले* यहुदाका राजा येकोनिया,*+ जो यहोयाकिमका+ छोरा थिए, तिनलाई यहुदाका भारदारहरू, कालिगडहरू र धातुको काम गर्नेहरूसँगै* यरुसलेमबाट बेबिलोनमा कैदी बनाएर लगे।+ त्यसपछि यहोवाले मलाई दुई टोकरी अन्जिर देखाउनुभयो। ती टोकरीहरू यहोवाको मन्दिरअगाडि थिए।
२ एउटा टोकरीमा अत्यन्तै रहरलाग्दा अन्जिर थिए। ती पहिलो बालीका अन्जिरजस्तै राम्रा थिए। तर अर्को टोकरीमा भने खानै नमिल्ने असाध्यै नराम्रा अन्जिर थिए।
३ तब यहोवाले मलाई सोध्नुभयो: “यर्मिया, तिमी के देख्छौ?” मैले जवाफ दिएँ: “अन्जिरहरू। राम्रा अन्जिरहरू अति राम्रा छन्। तर नराम्रा अन्जिरहरू त अति नराम्रा छन्; खानै नमिल्ने खालका।”+
४ तब यहोवाको यो वचन मकहाँ आयो:
५ “म, इस्राएलका परमेश्वर यहोवा यसो भन्छु: ‘मैले कल्दियालीहरूको देशमा निर्वासनमा पठाएका यहुदाका मानिसहरूलाई ती असल अन्जिरहरूजस्तै सम्झेर राम्रो व्यवहार गर्नेछु।
६ तिनीहरूकै भलो होस् भनेर म तिनीहरूमाथि नजर राख्नेछु र तिनीहरूलाई फेरि यस भूमिमा फर्काउनेछु।+ म तिनीहरूलाई बनाउनेछु र फेरि भत्काउनेछैनँ; म तिनीहरूलाई रोप्नेछु र फेरि उखेल्नेछैनँ।+
७ अनि तिनीहरूलाई म यहोवा हुँ भनेर चिन्न सक्ने हृदय दिनेछु।+ तिनीहरू मेरा मानिस हुनेछन् र म तिनीहरूका परमेश्वर हुनेछु।+ किनकि तिनीहरू सारा हृदयले मतर्फ फर्कनेछन्।+
८ “‘तर खानै नमिल्ने अति नराम्रा अन्जिरहरूबारे+ म यहोवा यसो भन्छु: “यहुदाका राजा सिदकियाह,+ तिनका राजकुमारहरू, यहीँ यहुदामा छोडिएका यरुसलेमका बाँकी मानिसहरू र मिश्रमा बसोबास गरिरहेकाहरूलाई+ म ती अति नराम्रा अन्जिरहरूजस्तै सम्झेर व्यवहार गर्नेछु।
९ म तिनीहरूमाथि विपत्ति ल्याउनेछु। त्यो देखेर पृथ्वीका सबै राज्य डरले थरथर हुनेछन्।+ अनि मैले तिनीहरूलाई तितरबितर पारेका ठाउँहरूमा+ मानिसहरूले तिनीहरूलाई ठट्टा अनि खिसीको पात्र बनाउनेछन्, तिनीहरूलाई सराप्नेछन्+ र तिनीहरूको नाममा उखान बनाउनेछन्।
१० म तरबार,+ अनिकाल र महामारीले* तिनीहरूलाई प्रहार गर्नेछु।+ तिनीहरूका पितापुर्खालाई र तिनीहरूलाई मैले दिएको देशबाट तिनीहरू नामेट नहोउन्जेल म त्यसै गर्नेछु।”’”
फुटनोटहरू
^ शा., “नबुकद्रेजरले।” नबुकद्नेजर नामको अर्को हिज्जे।
^ तिनी ‘यहोयाकिन’ र ‘कोन्याह’ नामले पनि चिनिन्थे।
^ वा सम्भवतः “पर्खाल र गढ बनाउनेहरूसँगै।”
^ वा “रोगले।”
