यर्मिया २९:१-३२
२९ नबुकद्नेजरले यरुसलेमबाट कैदी बनाएर बेबिलोनमा लगेका मानिसहरूमाझ बाँकी रहेका नाइकेहरू, पुजारीहरू, भविष्यवक्ताहरू अनि सबै मानिसलाई भविष्यवक्ता यर्मियाले यरुसलेमबाट चिठी लेखे।
२ ती मानिसहरूलाई बेबिलोन लगिँदा राजा येकोनिया,+ राजमाता,+ दरबारका अफिसरहरू, यहुदा र यरुसलेमका शासकहरू, कालिगडहरू र धातुको काम गर्नेहरूलाई* यरुसलेमबाट लगिसकिएको थियो।+
३ तिनले यो चिठी सापानका+ छोरा एलासाह र हिल्कियाहका छोरा गेमर्याहको हातमा पठाए, जसलाई यहुदाका राजा सिदकियाहले+ बेबिलोनका राजा नबुकद्नेजरकहाँ पठाएका थिए। चिठीमा यस्तो लेखिएको थियो:
४ “सेनाहरूका यहोवा, इस्राएलका परमेश्वर आफूले यरुसलेमबाट बेबिलोनमा कैदीको रूपमा पठाउनुभएका सबै मानिसलाई यसो भन्नुहुन्छ,
५ ‘घर बनाओ र त्यहीँ बस। बगैँचा लगाओ र त्यसको फल खाओ।
६ बिहाबारी गर र छोराछोरी जन्माओ। आफ्ना छोराहरूको निम्ति बुहारी ल्याओ र छोरीहरूको विवाह गरिदेओ। अनि तिनीहरूले पनि छोराछोरी जन्माऊन्। त्यहाँ तिमीहरूको सङ्ख्या नघटोस् बरु तिमीहरू बढ्दै जाओ।
७ मैले जुन सहरमा तिमीहरूलाई कैदीको रूपमा पठाएको छु, त्यस सहरमा शान्ति छाओस् भनेर कामना गर। त्यस सहरको निम्ति यहोवालाई प्रार्थना गर। किनकि त्यस सहरमा शान्ति छायो भने तिमीहरू पनि शान्तिमा रहन पाउनेछौ।+
८ सेनाहरूका यहोवा, इस्राएलका परमेश्वर यसो भन्नुहुन्छ: “तिमीहरूमाझ भएका भविष्यवक्ताहरू र जोखना हेर्नेहरूले तिमीहरूलाई छक्याउन नपाऊन्।+ तिनीहरूले आफ्नो सपनाको कुरा सुनाउँदा तिमीहरूले नपत्याओ।
९ किनकि यहोवा यस्तो घोषणा गर्नुहुन्छ, ‘मैले तिनीहरूलाई पठाएको होइनँ। तिनीहरूले मेरो नाममा तिमीहरूलाई झूटो भविष्यवाणी सुनाइरहेका छन्।’”’”+
१० “यहोवा यसो भन्नुहुन्छ, ‘तिमीहरू बेबिलोनमा बसेको ७० वर्ष पूरा भइसकेपछि म तिमीहरूतर्फ ध्यान दिनेछु+ र तिमीहरूलाई फेरि तिमीहरूको ठाउँमा फर्काएर आफ्नो प्रतिज्ञा पूरा गर्नेछु।’+
११ “यहोवा यस्तो घोषणा गर्नुहुन्छ, ‘तिमीहरूको निम्ति मैले के सोचेको छु, त्यो मलाई राम्ररी थाह छ। मैले तिमीहरूको शान्ति चिताएको छु, विपत्ति होइन।+ म तिमीहरूले उज्ज्वल भविष्य र आशा पाओ भन्ने चाहन्छु।+
१२ तिमीहरूले मलाई पुकार्नेछौ, मलाई प्रार्थना गर्नेछौ र म तिमीहरूको बिन्ती सुन्नेछु।’+
१३ “‘तिमीहरूले मलाई खोज्नेछौ र भेट्टाउनेछौ+ किनकि तिमीहरूले आफ्नो सारा हृदयले मलाई खोज्नेछौ।+
१४ अनि तिमीहरूले भेट्टाउन सक भनेर म पनि तिमीहरूसामु देखा पर्नेछु,’+ यहोवा घोषणा गर्नुहुन्छ। ‘कैदमा परेका तिमीहरू सबैलाई म जम्मा गर्नेछु। जुन-जुन देश र ठाउँहरूमा मैले तिमीहरूलाई तितरबितर पारेको थिएँ, ती सबै ठाउँबाट म तिमीहरूलाई जम्मा गर्नेछु।+ अनि जुन ठाउँबाट मैले तिमीहरूलाई कैदमा पठाएको थिएँ, त्यही ठाउँमा फिर्ता ल्याउनेछु,’ यहोवा घोषणा गर्नुहुन्छ।+
१५ “तर तिमीहरूले यसो भनेका छौ, ‘यहोवाले यहाँ बेबिलोनमै हाम्रो लागि भविष्यवक्ताहरू नियुक्त गर्नुभएको छ।’
१६ “दाउदको सिंहासनमा विराजमान राजालाई+ र यरुसलेम सहरमा बसोबास गरिरहेका सबै मानिसलाई, हो, तिमीहरूसँग कैदमा नलगिएका तिमीहरूका दाजुभाइलाई यहोवा भन्नुहुन्छ,
१७ ‘सेनाहरूका यहोवा यसो भन्नुहुन्छ: “म तिनीहरूलाई तरबार, अनिकाल र महामारीले* आक्रमण गर्नेछु+ र तिनीहरूको हालत खानै नमिल्ने कुहिएको* अन्जिरको जस्तै बनाइदिनेछु।”’+
१८ “‘म तिनीहरूलाई तरबार,+ अनिकाल र महामारीले खेद्नेछु। तिनीहरूको हालत देखेर पृथ्वीका सबै राज्य डरले थरथर हुनेछन्,+ उनीहरूले तिनीहरूको उदाहरण दिँदै सराप्नेछन्, तिनीहरूलाई देखेर वाल्ल पर्नेछन् र तिनीहरूको खिसी गर्दै सिटी बजाउनेछन्।+ मैले तिनीहरूलाई जुन-जुन देशमा तितरबितर पारेको थिएँ, त्यहाँ-त्यहाँ तिनीहरू ठट्टाको पात्र हुनेछन्।+
१९ किनकि मैले बारम्बार तिनीहरूकहाँ मेरा सेवकहरू अर्थात् मेरा भविष्यवक्ताहरूमार्फत आफ्नो सन्देश पठाएँ तर तिनीहरूले सुनेनन्,’+ यहोवा घोषणा गर्नुहुन्छ।
“‘हो, तिमीहरूले मेरो कुरा सुन्दै सुनेनौ,’+ यहोवा घोषणा गर्नुहुन्छ।
२० “त्यसकारण निर्वासनमा परेका हे सबै मानिसहरू हो, जसलाई मैले यरुसलेमबाट बेबिलोनमा पठाएँ, यहोवाको वचन सुन।
२१ मेरो नाममा तिमीहरूलाई झूटो भविष्यवाणी सुनाइरहेका कोलायाहका छोरा आहाबबारे र मासेयाहका छोरा सिदकियाहबारे सेनाहरूका यहोवा, इस्राएलका परमेश्वर यसो भन्नुहुन्छ,+ ‘म तिनीहरूलाई बेबिलोनका राजा नबुकद्नेजरको* हातमा सुम्पनेछु। उसले तिनीहरूलाई तिमीहरूकै आँखाको अगाडि मार्नेछ।
२२ अनि बेबिलोनमा कैदी बनाएर लगिएका यहुदाका सबैले कसैलाई सराप्ने बेला तिनीहरूको उदाहरण दिँदै यसो भन्नेछन्: “यहोवाले तिम्रो हालत सिदकियाह र आहाबको जस्तै पारिदेऊन्, जसलाई बेबिलोनका राजाले आगोमा पोलेका थिए!”
२३ किनकि तिनीहरूले इस्राएलमा साह्रै लाजमर्दो काम गरे।+ तिनीहरूले आफ्ना छिमेकीहरूका पत्नीसित व्यभिचार* गरे र मैले कुनै आज्ञा नदिए पनि मेरो नाममा मानिसहरूलाई झूटा कुरा सुनाए।+
“‘“यो कुरा मलाई राम्ररी थाह छ र म यसको साक्षी छु,”+ यहोवा घोषणा गर्नुहुन्छ।’”
२४ “अनि नेहेलाममा बस्ने सेमायाहलाई+ यसो भन,
२५ ‘सेनाहरूका यहोवा, इस्राएलका परमेश्वर यसो भन्नुहुन्छ: “तिमीले यरुसलेममा भएका सबै मानिसलाई, मासेयाहका छोरा पुजारी सपन्याहलाई+ र अरू सबै पुजारीलाई आफ्नो नाममा यस्तो चिठी पठायौ,
२६ ‘यहोवाले तपाईँ सपन्याहलाई पुजारी यहोयादाको ठाउँमा पुजारी नियुक्त गर्नुभएको छ। तपाईँले यहोवाको भवनको निरीक्षण गर्नुहोस् र भविष्यवक्ताको ढोँग गर्ने पागलहरूलाई पक्रेर ठिँगुरोमा* राख्नुहोस् भनेर उहाँले तपाईँलाई यो जिम्मेवारी दिनुभएको हो।+
२७ त्यसोभए तपाईँसामु भविष्यवक्ताको ढोँग गर्ने+ अनातोतको यर्मियालाई+ तपाईँले किन अहिलेसम्म हप्काउनुभएको छैन?
२८ त्यसले त यहाँ बेबिलोनमा समेत हामीलाई यस्तो सन्देश पठायो: “तपाईँहरू वर्षौँसम्म त्यहीँ बस्नुपर्नेछ! त्यसैले घर बनाउनुहोस् र त्यहीँ बस्नुहोस्। बगैँचा लगाउनुहोस् र त्यसको फल खानुहोस्+ . . . ”’”’”
२९ जब पुजारी सपन्याहले+ भविष्यवक्ता यर्मियासामु यो चिठी पढे,
३० तब यहोवाको यो वचन यर्मियाकहाँ आयो:
३१ “कैदी बनाएर लगिएका सबैलाई यस्तो सन्देश पठाऊ, ‘नेहेलाममा बस्ने सेमायाहबारे यहोवा यसो भन्नुहुन्छ: “मैले सेमायाहलाई पठाउँदै नपठाए पनि उसले तिमीहरूलाई भविष्यवाणी सुनायो र तिमीहरूलाई झूटो कुरामा भरोसा गर्न लगायो।+
३२ त्यसैले यहोवा यसो भन्नुहुन्छ, ‘म नेहेलाममा बस्ने सेमायाह र उसको सन्तानलाई सजाय दिनेछु। उसको एउटा सन्तान पनि यी मानिसहरूमाझ जीवित रहनेछैन। मैले आफ्ना जनहरूको भलो गरेको उसले देख्न पाउनेछैन। किनकि उसले मानिसहरूलाई यहोवाको विरोध गर्न उक्साएको छ,’ यहोवा घोषणा गर्नुहुन्छ।”’”
फुटनोटहरू
^ वा सम्भवतः “पर्खाल र गढ बनाउनेहरूलाई।”
^ वा सम्भवतः “फुटेको।”
^ वा “रोगले।”
^ शा., “नबुकद्रेजरको।” नबुकद्नेजर नामको अर्को हिज्जे।
^ मूल भाषामा यहाँ दुई वटा शब्द चलाइएका छन्। एउटा शब्दले ‘खुट्टा कस्ने ठिँगुरो’-लाई जनाएको हुन सक्छ भने अर्कोले ‘हात र टाउको कस्ने ठिँगुरो’-लाई।
