यर्मिया ३४:१-२२
३४ बेबिलोनका राजा नबुकद्नेजर,* तिनको सम्पूर्ण सेना, तिनको अधीनमा रहेका पृथ्वीका सबै राज्य र सबै मानिसले यरुसलेम अनि यसवरपर रहेका सम्पूर्ण सहरविरुद्ध युद्ध गरिरहेको बेला यहोवाको यो वचन यर्मियाकहाँ आयो:+
२ “इस्राएलका परमेश्वर यहोवा यसो भन्नुहुन्छ, ‘जाऊ, यहुदाका राजा सिदकियाहलाई+ यसो भन, “यहोवा भन्नुहुन्छ: ‘म यो सहर बेबिलोनका राजाको हातमा सुम्पनेछु र तिनले यसलाई आगोले भस्म पार्नेछन्।+
३ तिमी तिनको हातबाट उम्कन सक्नेछैनौ। तिमी निश्चय नै पक्राउ पर्नेछौ र तिनको हातमा सुम्पिइनेछौ।+ तिमीले बेबिलोनका राजालाई आफ्नै आँखाले देख्नेछौ र तिनले तिमीसित आमनेसामने कुरा गर्नेछन् अनि तिमी बेबिलोन लगिनेछौ।’+
४ तर ए यहुदाका राजा सिदकियाह, यहोवाको यो वचन सुन, ‘तिम्रो विषयमा यहोवा यसो भन्नुहुन्छ: “तिमी तरबारले मारिनेछैनौ।
५ तिमी चैनसित मर्नेछौ।+ तिम्रो मृत्युपछि मानिसहरूले तिम्रो सम्मानमा धूप बाल्नेछन्,* जसरी तिनीहरूले तिम्रा पितापुर्खा अर्थात् तिमीअघिका राजाहरूको निम्ति पनि धूप बालेका थिए। अनि तिनीहरूले ‘हाय! हाम्रा मालिक’ भन्दै शोक गर्नेछन्। यो पक्कै पूरा हुनेछ किनकि ‘मैले नै यो भनेको हुँ,’ यहोवा घोषणा गर्नुहुन्छ।”’”’”
६ त्यसपछि भविष्यवक्ता यर्मियाले यरुसलेम गएर यहुदाका राजा सिदकियाहलाई यी सबै कुरा बताए।
७ त्यतिखेर बेबिलोनका राजाको सेनाले यरुसलेम र यहुदाका बाँकी रहेका सबै सहरविरुद्ध अर्थात् लाकिस+ र अजेकाहविरुद्ध+ युद्ध गरिरहेको थियो+ किनकि यहुदाका पर्खालले घेरिएका बलिया सहरहरूमध्ये यी दुई सहर मात्रै बाँकी थिए।
८ यरुसलेमका सबै मानिसले आफ्ना दासहरूलाई मुक्त गर्नुपर्छ भनेर राजा सिदकियाहले तिनीहरूसित करार गरेपछि यर्मियाकहाँ आएको यहोवाको वचन।+
९ हरेकले आफ्नो हिब्रू दास वा दासीलाई मुक्त गर्नुपर्छ; कसैले पनि सङ्गी यहुदीलाई दासको रूपमा राख्न पाउनेछैन भन्ने करार राजाले गरेका थिए।
१० सबै भारदार तथा सबै मानिसले यो कुरा माने। आफ्ना दास-दासीलाई मुक्त गर्नुपर्छ र उनीहरूलाई दासको रूपमा राख्न पाइँदैन भन्ने करार तिनीहरू सबैले पालन गरे। तिनीहरूले आ-आफ्ना दास-दासीलाई मुक्त गरिदिए।
११ तर आफूले मुक्त गरिदिएका दास-दासीलाई तिनीहरूले फेरि फर्काएर ल्याए र जबरजस्ती आफ्नो दास बनाए।
१२ त्यसैले यहोवाको यो वचन यर्मियाकहाँ आयो; यहोवाले भन्नुभयो:
१३ “इस्राएलका परमेश्वर यहोवा यसो भन्नुहुन्छ, ‘तिमीहरूका पितापुर्खालाई मिश्रबाट ल्याउँदा, तिनीहरूलाई दासत्वको त्यो घरबाट छुटाएर ल्याउँदा+ मैले तिनीहरूसित यस्तो करार गरेको थिएँ:+
१४ “तिमीहरूले किनेका हिब्रू दाजुभाइले तिमीहरूकहाँ छ वर्षसम्म सेवा गरिसकेपछि सातौँ वर्षको अन्तमा तिनीहरूलाई मुक्त गर्नुपर्छ।”+ तर तिमीहरूका पितापुर्खाले मेरो कुरा सुनेनन्; तिनीहरूले आफ्नो कान थापेनन्।
१५ हालै* तिमीहरूले आफ्नो मन बद्लियौ र आफ्ना दाजुभाइलाई मुक्त गरेर मेरो नजरमा जे सही छ, त्यही गऱ्यौ। अनि तिमीहरूले मेरो नाम जोडिएको यस मन्दिरमा मसामु करार गऱ्यौ।
१६ तर तिमीहरूले फेरि आफ्नो मन बद्लियौ र आफ्ना दास-दासीलाई फर्काएर ल्यायौ, जसलाई पहिले तिमीहरूले तिनीहरूको इच्छाअनुसारै मुक्त गरिदिएका थियौ। तिमीहरूले तिनीहरूलाई फेरि जबरजस्ती आफ्नो दास बनायौ। यसरी तिमीहरूले मेरो नाम बिटुलो पाऱ्यौ।’+
१७ “त्यसैले यहोवा यसो भन्नुहुन्छ: ‘आफ्ना दाजुभाइलाई मुक्त नगरेर तिमीहरूले मेरो आज्ञा तोड्यौ।+ त्यसैले अब म तिमीहरूलाई तरबार, महामारी* र अनिकालको सिकार बनाएर मुक्त गरिदिनेछु।+ तिमीहरूको हालत देखेर पृथ्वीका सबै राज्य डरले थरथर हुनेछन्।’+ यहोवा घोषणा गर्नुहुन्छ,
१८ ‘बाछोलाई दुई फ्याक पारेर अनि ती दुई फ्याकबीच हिँडेर मसामु करार बाँध्ने तर त्यस करारअनुसार नगरेर मेरो करार भङ्ग गर्ने मानिसहरूलाई+
१९ अर्थात् यहुदाका भारदारहरू, यरुसलेमका भारदारहरू, दरबारका अफिसरहरू, पुजारीहरू र देशका सबै मानिस, जो बाछोको दुई फ्याकको बीचबाट हिँडे,
२० ती सबैलाई म तिनीहरूका शत्रुहरूको र तिनीहरूको ज्यान लिन खोज्नेहरूको हातमा सुम्पनेछु। तिनीहरूको लास आकाशका चराचुरुङ्गी र पृथ्वीका जनावरहरूको आहार हुनेछ।+
२१ म यहुदाका राजा सिदकियाहलाई र तिनका भारदारहरूलाई तिनीहरूका शत्रुहरूको, तिनीहरूको ज्यान लिन खोज्नेहरूको र बेबिलोनका राजाको सेनाको हातमा सुम्पनेछु,+ जो तिमीहरूलाई घेरा हाल्न छोडेर जाँदै छन्।’+
२२ “‘म बेबिलोनको सेनालाई आदेश दिनेछु,’ यहोवा घोषणा गर्नुहुन्छ, ‘अनि उनीहरूलाई यस सहरमा फर्काएर ल्याउनेछु। उनीहरूले यस सहरसित युद्ध लड्नेछन्, यसलाई कब्जा गर्नेछन् र आगोले भस्म पार्नेछन्।+ म यहुदाका सहरहरूलाई निर्जन बनाइदिनेछु।’”+
फुटनोटहरू
^ शा., “नबुकद्रेजर।” नबुकद्नेजर नामको अर्को हिज्जे।
^ वा “आगो बाल्नेछन्।”
^ शा., “आज।”
^ वा “रोग।”
