पहिलो इतिहास १३:१-१४
१३ दाउदले हजार-हजारका र सय-सयका नाइकेहरूसित र अरू सबै अगुवासँग सरसल्लाह गरे।+
२ त्यसपछि तिनले इस्राएलको पूरै समुदायलाई भने: “यदि तपाईँहरू सबैलाई ठीक लाग्छ र यहोवा हाम्रा परमेश्वरको पनि मन्जुरी भयो भने इस्राएलको सबै इलाकामा बस्ने हाम्रा बाँकी भाइबन्धुलाई र चरन भएका सहरहरूमा बसोबास गर्ने पुजारीहरू तथा लेवीहरूलाई+ यहाँ बोलाऔँ र हामी सबै मिलेर
३ हाम्रा परमेश्वरको सन्दुक* यहाँ फिर्ता ल्याऔँ।”+ किनकि साउलको शासनकालमा उनीहरूले त्यस सन्दुकको वास्तै गरेका थिएनन्।+
४ पूरै समुदाय त्यसो गर्न राजी भयो किनकि तिनीहरूलाई त्यो कुरा उचित लाग्यो।
५ तब दाउदले किर्यथ-येरिमबाट साँचो परमेश्वरको सन्दुक ल्याउन+ मिश्रको* नदीदेखि* लेबो-हमाथसम्मका* सबै इस्राएलीलाई एक ठाउँमा भेला गरे।+
६ दाउद र सबै इस्राएली साँचो परमेश्वर यहोवाको सन्दुक ल्याउन यहुदाको बालाह+ अर्थात् किर्यथ-येरिम गए। यही सन्दुकअगाडि मानिसहरू परमेश्वरको नाम पुकार्छन्, जो करूबहरूभन्दा माथि*+ विराजमान हुनुहुन्छ।
७ तर तिनीहरूले साँचो परमेश्वरको सन्दुक नयाँ गाडामा राखे+ अनि त्यसलाई अबिनादाबको घरबाट ल्याए। त्यो गाडा उज्जाह र अहियोले हाँकिरहेका थिए।+
८ दाउद र सबै इस्राएलीले वीणा, किसिम-किसिमका तारे बाजा, खैँजडी,+ झ्याली+ र बिगुल बजाउँदै+ अनि गाउँदै पूरा जोसका साथ साँचो परमेश्वरसामु खुसीयाली मनाइरहेका थिए।
९ तर तिनीहरू किदोनको खलामा आइपुग्दा बयलगाडा पल्टनै लाग्यो। त्यसैले उज्जाहले तुरुन्तै आफ्नो हात अगाडि बढाएर सन्दुकलाई थामे।
१० तब यहोवा परमेश्वरको क्रोध उज्जाहमाथि दन्क्यो र उहाँले तिनलाई त्यहीँ मार्नुभयो। किनकि तिनले आफ्नो हात अगाडि बढाएर सन्दुकलाई समातेका थिए।+ यसरी उज्जाह परमेश्वरसामु त्यहीँ मरे।+
११ तर यहोवा परमेश्वरको क्रोध उज्जाहमाथि दन्केको देखेर दाउद रिसाए। यस घटनाले गर्दा त्यस ठाउँलाई आजसम्म पनि पेरेज-उज्जाह* भनिन्छ।
१२ त्यसैले दाउद त्यस दिन साँचो परमेश्वरसित डराए र तिनले भने: “अब साँचो परमेश्वरको सन्दुकलाई म कसरी आफ्नो सहरमा लैजान सक्छु र?”+
१३ दाउदले त्यो सन्दुक आफ्नो सहर अर्थात् दाउदनगरमा ल्याएनन्। बरु तिनले त्यो सन्दुक गाथमा बस्ने ओबेद-एदोमको घरमा पठाइदिए।
१४ साँचो परमेश्वरको सन्दुक गाथमा बस्ने ओबेद-एदोमको घरमा उनको घरानासितै तीन महिनासम्म रह्यो। यहोवा परमेश्वरले ओबेद-एदोमको घरानालाई र उनीसित भएका सबै कुरालाई आशिष् दिइरहनुभयो।+
फुटनोटहरू
^ वा “करारको सन्दुक।” शब्दावलीमा “करारको सन्दुक” हेर्नुहोस्।
^ वा “इजिप्टको।”
^ वा “सिहोरदेखि।”
^ वा “हमाथ छिर्ने ठाउँसम्मका।”
^ वा सम्भवतः “करूबहरूको बीचमा।”
^ यसको अर्थ हो, “उज्जाहमाथि दन्केको क्रोध।”
