दोस्रो इतिहास १०:१-१९
-
इस्राएलले रहबामको विद्रोह गर्छ (१-१९)
१० रहबाम सकेम+ गए किनकि सबै इस्राएली तिनलाई राजा बनाउन त्यहाँ भेला भएका थिए।+
२ यो कुरा सुन्नेबित्तिकै नबातका छोरा यरोबाम+ मिश्रबाट फर्केर आए। (यतिबेला उनी मिश्रमै थिए। उनी राजा सुलेमानदेखि भागेर मिश्र गएका थिए।)+
३ मानिसहरूले तुरुन्तै उनलाई मिश्रबाट झिकाए। उनी सबै इस्राएलीसित रहबामकहाँ आए। तिनीहरूले रहबामलाई यसो भने:
४ “तपाईँका बुबाले हामीलाई साह्रै गह्रौँ जुवा बोकाउनुभएको छ।+ तर तपाईँले हाम्रो मजदुरी कम गरिदिनुभयो र तपाईँका बुबाले बोकाउनुभएको यो गह्रौँ जुवा हलुको पारिदिनुभयो भने हामी तपाईँको सेवा गर्नेछौँ।”
५ तब तिनले तिनीहरूलाई भने: “तिमीहरू तीन दिनपछि मकहाँ आउनू!” त्यसैले ती मानिसहरू त्यहाँबाट गए।+
६ त्यसपछि राजा रहबामले तिनको बुबा सुलेमानको सेवा गरेका बूढापाकाहरूसित सरसल्लाह गरे। तिनले उनीहरूलाई सोधे: “तपाईँहरू यस विषयमा के भन्नुहुन्छ? म यी मानिसहरूलाई के जवाफ दिऊँ?”
७ उनीहरूले रहबामलाई जवाफ दिए: “यदि तपाईँले यी मानिसहरूसित राम्रो व्यवहार गर्नुभयो, तिनीहरूलाई खुसी पार्नुभयो र तिनीहरूसित मायालु तरिकामा कुरा गर्नुभयो भने तिनीहरू सधैँभरि तपाईँको सेवक बन्नेछन्।”
८ तर रहबामले ती बूढापाकाहरूको सल्लाह स्विकारेनन् बरु आफूसितै हुर्केबढेका जवान मानिसहरूसित सल्लाह लिन गए, जो अहिले तिनका सेवक थिए।+
९ रहबामले तिनीहरूलाई सोधे: “मानिसहरूले मलाई यसो भनेका छन्: ‘तपाईँका बुबाले हामीलाई बोकाउनुभएको जुवा हलुको पारिदिनुहोस्।’ तिमीहरू के भन्छौ? म यी मानिसहरूलाई के जवाफ दिऊँ?”
१० तिनीसितै हुर्केबढेका ती जवान मानिसहरूले तिनलाई भने: “‘तपाईँका बुबाले हामीलाई साह्रै गह्रौँ जुवा बोकाउनुभएको छ; यसलाई हलुको पारिदिनुहोस्’ भन्ने ती मानिसहरूलाई यस्तो जवाफ दिनुहोस्: ‘मेरो कान्छीऔँला मेरा बुबाको कम्मरभन्दा मोटो हुनेछ।
११ मेरा बुबाले तिमीहरूलाई गह्रौँ जुवा बोकाउनुभएको थियो तर म त्यसलाई झनै गह्रौँ बनाइदिनेछु। मेरा बुबाले तिमीहरूलाई दण्ड दिन कोर्रा लगाउनुहुन्थ्यो तर म तिमीहरूलाई किला भएका कोर्राले दण्ड दिनेछु।’”
१२ तेस्रो दिन यरोबाम र अरू सबै मानिस राजा रहबामकहाँ आए किनकि राजाले तिनीहरूलाई यसो भनेका थिए: “तीन दिनपछि मकहाँ आउनू!”+
१३ तर राजाले बूढापाकाहरूको सल्लाह सुनेनन्। त्यसैले तिनले मानिसहरूलाई कठोर जवाफ दिए।
१४ तिनले जवान मानिसहरूको सल्लाह स्विकारे र मानिसहरूलाई यसो भने: “म तिमीहरूको जुवा झनै गह्रौँ बनाइदिनेछु। मेरो बुबाले तिमीहरूलाई दण्ड दिन कोर्रा लगाउनुहुन्थ्यो तर म तिमीहरूलाई किला भएका कोर्राले दण्ड दिनेछु।”
१५ राजाले मानिसहरूको कुरा सुन्दै सुनेनन् किनकि यी सबै घटनाको पछाडि साँचो परमेश्वरको हात थियो।+ सिलोका अहियाहमार्फत+ नबातका छोरा यरोबामलाई यहोवा परमेश्वरले जे भन्नुभएको थियो, त्यो पूरा गर्न उहाँले त्यसो गर्नुभएको थियो।
१६ राजाले तिनीहरूको कुरा नसुनेकोले सारा इस्राएलीले राजालाई यसो भने: “दाउदसित हाम्रो के सरोकार? यिसैका छोराले आफ्नो पैतृक सम्पत्ति आफैसित राखून्। हे इस्राएली हो, तिमीहरू सबै आ-आफ्नो देवताकहाँ फर्केर जाओ। अब दाउदको घरानाको हेरविचार दाउदले नै गरून्।”+ तब सबै इस्राएली आ-आफ्नो घर* फर्के।+
१७ तर रहबामले यहुदाका सहरहरूमा बसोबास गर्ने इस्राएलीहरूमाथि भने शासन गरिरहे।+
१८ अनि राजा रहबामले मजदुरहरूको निरीक्षक हादोरामलाई+ इस्राएलीहरूकहाँ पठाए। तर सारा इस्राएलीले उसलाई ढुङ्गाले हानेर मारे। रहबामचाहिँ आफ्नो रथ लिएर जसोतसो यरुसलेमतिर भाग्न सफल भए।+
१९ इस्राएलीहरूले आजसम्मै दाउदको घरानाको विद्रोह गरिरहेका छन्।
फुटनोटहरू
^ शा., “पालमा।”
