युक्रेनमा चलिरहेको युद्धलगायत जलवायु परिवर्तनको असरहरूले गर्दा विश्‍वव्यापी खाद्य सङ्‌कट चुलिँदै गएको छ। खासगरि थुप्रै अविकसित देशका मानिसहरू खानेकुराको अभावले गर्दा मारमा परेका छन्‌।

•   “युद्ध, जलवायु परिवर्तन, बढ्‌दो इन्धन मूल्य र अन्य समस्याले गर्दा खाद्य उत्पादन र वितरणमा असर पुगेको छ।”—एन्टोनियो गुटेरेस, संयुक्‍त राष्ट्रसंघका महासचिव, जुलाई १७, २०२३.

•   “रूसले अन्‍न निर्यात सम्झौता भङ्‌ग गरेसँगै संसारभर खाद्य सङ्‌कट बढ्‌ने अनि उत्तर अफ्रिकी र मध्य पूर्वी देशहरूजस्ता आर्थिक स्तर कमजोर भएका देशहरूमा महँगीले आकाश छुने विज्ञहरूको धारणा छ।”—Atalayar.com, जुलाई २३, २०२३.

 बाइबलले खाद्य सङ्‌कट र भविष्यबारे के भन्छ, विचार गर्नुहोस्‌।

•   येसुले यस्तो भविष्यवाणी गर्नुभयो: “जातिको विरुद्धमा जाति र राज्यको विरुद्धमा राज्य उठ्‌नेछ अनि ठाउँठाउँमा अनिकाल . . . हुनेछ।”—मत्ति २४:७.

•   बाइबलको प्रकाश भन्‍ने किताबमा चार घोडसवारबारे बताइएको छ। तीमध्ये एक घोडसवारले युद्धलाई चित्रण गर्छ। तिनीपछिको अर्को घोडसवारले अनिकाललाई चित्रण गर्छ। अनिकाल छाएको त्यस समयमा खानेकुराको चरम अभाव हुनेछ र महँगीले आकाश छुनेछ। “मैले एउटा कालो घोडा देखें। घोडसवारको हातमा एउटा तराजू थियो। . . . एउटा आवाजले यसो भनेजस्तो मैले सुनें, ‘एक दिनको ज्यालामा एक किलो गहूँ, र एक दिनको ज्यालामा तीन किलो जौ।’”—प्रकाश ६:५, ६, नयाँ संशोधित संस्करण।

 अनिकालबारे गरिएका यी भविष्यवाणीहरू अहिले पूरा हुँदै छन्‌। बाइबलमा यस समयलाई “अन्तको दिन” भनिएको छ। (२ तिमोथि ३:१) अन्तको दिन र प्रकाशको किताबमा बताइएको चार घोडसवारबारे थप कुरा बुझ्न इस्वी संवत्‌ १९१४ देखि संसार परिवर्तन भएको छ भन्‍ने भिडियो हेर्नुहोस्‌ र “चार घोडसवार—तिनीहरू को हुन्‌?” भन्‍ने लेख पढ्‌नुहोस्‌।

•   बाइबलमा बढ्‌दो महँगी र अनिकालजस्ता चुनौतीपूर्ण अवस्थाहरूको सामना गर्न मदत गर्ने व्यावहारिक सल्लाहहरू पाइन्छ। केही सल्लाह “कम खर्चमा कसरी गुजारा टार्ने” भन्‍ने लेखमा हेर्नुहोस्‌।

•   बाइबलले हामीलाई उज्ज्वल भविष्यको आशा पनि दिन्छ। “पृथ्वीमा प्रशस्त अनाज उब्जिनेछ” भनेर बाइबलमा प्रतिज्ञा गरिएको छ र त्यतिबेला कोही पनि भोको पेट सुत्नुपर्नेछैन। (भजन ७२:१६) बाइबलले दिने भविष्यको आशा र यस आशामा किन भरोसा गर्न सकिन्छ भन्‍नेबारे अझ धेरै जान्‍न “हाम्रो भविष्य उज्ज्वल छ!” भन्‍ने अङ्‌ग्रेजी लेख पढ्‌नुहोस्‌।