YENO 01

Ore Tharan’ Ore Tusi Hmijoc So Bua

ULE

Eje ileodene ci eto eje ko ri pon’ ore ciroi, ri pon’ ore nodei ci jo, tango ne eziene ci huebuti. Eje numu joko ta ace ci ua ushiwane inome ko: korione co ule tedren’ ore fami ni eje ri nodei daden, ka korione co aopodoneni buic. Hmaiai kore ngome hna ule kacene ko, Tusi Hmijoc ci cedi ore nodei ace buice ci etone ri pon’ore ciroi. Ka Tusi Hmijoc se ci konekatu buice joko ri nodei rane. Ka du bua, Tusi Hmijoc numu tharane so ej?

1. Nge kore ta hnenge ci cedi kei Tusi Hmijoc?

Ome kore ta hnenge me nidi ace ci cedi kei Tusi Hmijoc: Hna whane korione kore ciroi? Wen’ ore nge eje ome ri ten’ ore aw? Wen’ ore nge ta ngome me roi ci jo? Ci nge ke eje ma ha tango? Ileodene ci alane co menenge dongodongo, ke wen’ ore nge di me hmaiai kore irue? Nge kore ace co pina jeu’ ore ten’ ore aw? Melei ta hnenge me ekowe ke eje co eton. Ka ta millions kore ngome ci ua sesekone ko, nidi numu nene kore nodei ne cedi ri Tusi Hmijoc.

2. Ilo, Tusi Hmijoc thuni co konekatu bua ri nodei ran?

Ri Tusi Hmijoc numu ta ininata me nidi roi. Inome ko, Tusi Hmijoc ci konekatuon’ ore nodei fami co nidi opodon. Tusi Hmijoc ci nidi konekatu bua joko thu deko co nidi unia, ne co opodone ri nodei ruace ni bua. Melei kore ta uane bua co yenone ri Tusi Hmijoc ngei bua ma ruacon’ ore so yeno ri thuben. Melei bua co ule kacene ko “ore Eberedro hna xiwamomon’ ileodene [ore nodei hna beredrone ri Tusi Hmijoc] nidi ace so bua.”—2 Timothi 3:16.

Ore gutusi ome ci eamo bua co yenon’ ore Tusi Hmijoc, ke deko ma ci win’ ore Tusi Hmijoc. Tan’ omelei, ehnije ci sibo bua co ieie ore nodei kotre hna acikacene ri nodei yeno, bua ha thu ule, ngei me ekowe sese ne il’ ore hnei bua ci yenon.

THERE HMAIAIONELU

Eje co ule sesone: Tusi Hmijoc hna konekatu korion’ o ta ngom, ka korione ke bua co thu alane co ieie ore Tusi Hmijoc. Ka wen’ ore nge deko ma ushiwa co carajewe ore Tusi Hmijoc ngei se ngome ma konekatu ej.

3. Tusi Hmijoc ci thenan’ ore lani ej

Tusi Hmijoc inom’ ore guiei me nidi nere hma. Tusi Hmijoc ci konekatu eje co ureie roion’ ore ta uan, ne ci thena eje ri pon’ ore eziene ci huebuti.

Ieielo Ta Salamo 119:105 ka ethanatatilo ore so hnenge ome ri ten:

Nge kore uan’ ore ngome hna xiwamomon’ ore gula tusi ome ri pon’ ore Tusi Hmijoc?
Ka bua, nge kore uane bua ri pon’ ore Tusi Hmijoc?

4. Tusi Hmijoc ci cedi ore nodei hnenge ej

Se hmenewe hna uni ri Tusi Hmijoc ore so ne cedi nore ta hnenge ni bone hna etone whane koda. Ulelo ore VIDEO ka ethanatatilo ore so hnenge ome ri ten.

VIDEO: Uroionelo Ko! (1:48)

Nge kore ta hnenge ci etone kei hmenew?
Nge kore bone hna kedi tharane wene ri hna yenon’ ore Tusi Hmijoc?

Tusi Hmijoc ci eamo eje co there ore so ne cedi. Ieielo Mataio 7:7 ka ethanatatilo ore hnenge ome ri ten:

Nge kore ta hnenge bua ci alane co uni ore so ne cedi ri Tusi Hmijoc?

5. Bua thuni co alane co ieie ore Tusi Hmijoc

Hmaiai kore ngome ci alane co ieie ore Tusi Hmijoc. K’e buice ko, melei ci aneroini ore hnore ni buic. Ulelo ore VIDEO ka ethanatatilo ore so hneng’ ome ri ten.

VIDEO: Co Ieie Ore Tusi Hmijoc (2:05)

Ilo, ore nodei warangi ri video om, ala buice ko co ieie?
Ke wen’ ore nge ala buice ko co ieie ore Tusi Hmijoc?

Ore nodei yeno ri Tusi Hmijoc ci athaberidrini ej, ka ci kanu eje o se uroi. Ieielo Rome 15:4 ka ethanatatilo ore hnenge ome ri ten:

Ilo, bua ci alane co yeno hmaiaione ri pon’ ore opodone ne uroi ci nengocone ri Tusi Hmijoc?

6. Ibetu co carajewe ore Tusi Hmijoc ngei o se ngome ma konekatu ej

Hmaiai kore ngome ci alane co ieie ore Tusi Hmijoc ke du buice nidi ace joko kore co ethanatati ne il’ osoten. Ieielo Ta Ruace 8:26-31 ka ethanatatilo ore hnenge ome ri ten:

Korione ke eje co carajewe ore Tusi Hmijoc? —Ulelo ore kotre 30 ne 31.

Se cahmane si Aithiope hna sibo ne konekatu ha thu carajewe ore bone ci ieie. Onome joko, ta ngome ci sibo ne konekatu ha thu carajewe ore Tusi Hmijoc

BUICE CI IE KO: “Hmaiai kore ruac, ka deko eziene bane yenon’ ore Tusi Hmijoc.”

Ka bua, nge kore uane bua? Wen’ ore nge?

UANE ME NIDI AC

Ri Tusi Hmijoc numu ta ininata me nidi roi son’ ore ciroi ni ej. Tusi Hmijoc ci cedi ore ta hnenge me nidi ac. Ka Tusi Hmijoc ci athaberidrini ej, ka ci kanu eje ore uroi.