YENO 03
Ilo, thuni co une jeu’ ore Tusi Hmijoc?
Ri Tusi Hmijoc, hmaiai kore ta ininata ne ta hna perofetan. Bua ngei ci alane co ule ore ci yenone kei Tusi Hmijoc, kacene bua me ci eto bua ko, ko: “Ilo, eje thuni co une jeu’ o se gutusi me nidi wene koda?,” “Ilo, nidi ace ko so ej’ onome kore ci ie ri Tusi Hmijoc?,” ca “Ilo, eje thuni co une jeu’ ore hna perofetane son’ ore eziene co pina?” Ta millions kore ngome ci une jeu’ ore Tusi Hmijoc. Ka bua? Ehnije ci eamo bua co therelo ko ha thu ua sesekon’ omelei.
1. Ilo, Tusi Hmijoc netiti ma ci nengocon’ ore histoire?
Ri Tusi Hmijoc numu ta “hna xiwamomo netition, nodei eberedo me seseko.” (Thu Pule 12:10) Tusi Hmijoc ci nengocon’ o ta ace me seseko hna pina ne ta ngome hna ciroi ri ezien’ omelei. (Ieielo Luke 1:3; 3:1, 2.) Hmaiai ko ta historiens ne ta archéologues hna ie ko, netiti kei Tusi Hmijoc ma ci nengocon’ o ta ran, ta ngom, ta guhne ne ta ace hna pina.
2. Wen’ ore nge thuni co ie ko, Tusi Hmijoc numu ko tharan’ onom?
Ri hmaiai kore daden, Tusi Hmijoc hna ie dan’ o ta ace co pina ri eziene me ekow. Inome ko, Tusi Hmijoc ma ci nengocon’ ore la science melei netiti. Roidi, ri eziene hna xiwamomon’ ore Tusi Hmijoc, ngome be deko hna asesekoni ore nodei ruace nore la science hna ie dane ri Tusi Hmijoc. Ta ade kenerekene ri thubene kore la science hna asesekoni ko, netiti kei Tusi Hmijoc. Tusi Hmijoc “iara seseko ko onome ne e iara oiru ko.”—Ta Salamo 118:8, NWT.
3. Wen’ ore nge eje thuni co une jeu’ ore ci ie kei Tusi Hmijoc?
Ri Tusi Hmijoc numu ta hna perofetane * me ci ie “o re nodei ace me deko hna ilon.” (Isaia 46:10) Tusi Hmijoc hna perofetan’ ore ta ace co pina ta ade kenerekene dan’ ore co iu. Tusi Hmijoc se hna ie ahngane joko ore nodei ace ci pina du ej’ onom. Ri yeno om, eje co ule ore ta hna perofetane ri Tusi Hmijoc. Bua ngei co tijan’ ore netiti il’ ore ta hna perofetan’ omelei.
THERE HMAIAIONELU
Ule sesonelo ke ej’ ore ta ruace nore la science ci nengocone kei Tusi Hmijoc. Ka ule sesonelo joko ore ta hna perofetane ri Tusi Hmijoc me se pengen.
4. Tusi Hmijoc icojeu ne il’ ore la science
Ri eziene koda, hmaiai kore ngome ci uane ko, ten’ ore awe ci te ri pon’ o se ac. Ulelo ore VIDEO.
Ule sesonelo ore hna ie ri gula tusi ni Iopu ha 3500 kore kenereken. Ieielo Iopu 26:7 ka ethanatatilo ore hnenge ome ri ten:
-
Wen’ ore nge thuni co tijan’ ore ci ie kei Tusi Hmijoc ko, “ci athidihngide o re ten’ o re awe me deko toen”?
Ri ta kenerekene 1800 so, ko ta scientifiques hna carajewe roion’ ore cycle nore tini. Roidi, Tusi Hmijoc ha hna ie ahngan’ ore cycle omelei ha ta milliers kore kenereken. Ieielo Iopu 36:27, 28 ka ethanatatilo ore so hnenge ome ri ten:
-
Wen’ ore nge se pengene kore ci ie ahngane ri pon’ ore cycle nore tini?
-
Ilo, ore nodei kotre eje hna ieie ci konekatu bua co une jeu’ ore Tusi Hmijoc?
5. Tusi Hmijoc hna perofetan’ ore ta ace me nidi ace co pina
Ieielo Isaia 44:27–45:2 ka ethanatatilo ore hnenge ome ri ten:
-
Ri pon’ ore hna anacaleni ore menenge Babulona, nge kore Tusi Hmijoc hna perofetan, ta 200 kore kenerekene hnadan?
Ore Histoire ci asesekoni ko, Koreso, Doku no Peresi ne ta shoja ni bone hna anacaleni ore menenge Babulona ri kenerekene 539 ri dani Iesu. Buice hna alaeani ore lacele ci cagoren’ ore meneng’ omelei. Ka buice hna okonelo ri menenge Babulona, hna lene ri ta pa’ma hna t’oe, ka deko hna irue. Onome ha 2500 kore kenerekene ri thuben, Babulona ha nacal. Ule sesonelo ore hna perofetane ri Tusi Hmijoc.
Ieielo Isaia 13:19, 20 ka ethanatatilo ore hnenge ome ri ten:
-
Hna iu korione kore hna perofetan’ omelei?
Ore menenge i Babulona ma ha nacal, ri node Irak
6. Tusi Hmijoc hna perofetan’ ore nodei ace eje ci ule onom
Tusi Hmijoc ci kaion’ ore eziene ej’ onome ko “nodei rane ri bune.” (2 Timothi 3:1) Ome kore Tusi Hmijoc hna perofetan:
Ieielo Mataio 24:6, 7 ka ethanatatilo ore hnenge ome ri ten:
-
Nge kore co pina ri nodei rane ri bune inom’ ore ci ie ri Tusi Hmijoc?
Ieielo 2 Timothi 3:1-5 ka ethanatatilo ore so hnenge ome ri ten:
-
Ri Tusi Hmijoc, nge kore lata nore ta ngome ri ta rane me wabubun?
-
Nge kore ta lata nore ngome ci guru bua, bua ci ule kacen?
BUICE CI IE KO: “Ore Tusi Hmijoc ha nidi wenekoda.”
-
Du bua, nge kore ci nidi asesekoni ko, eje thuni co une jeu’ ore Tusi Hmijoc?
UANE ME NIDI AC
Ore Histoire, ne la science, ne ore nodei hna perofetane ci aehngeni ko, bua thuni co une jeu’ ore Tusi Hmijoc.
Uane co cori
-
Ilo, Tusi Hmijoc melei nata me seseko ca nge tawatit?
-
Nge kore ta aekoweni ci aehngeni ko, Tusi Hmijoc icojeu ne il’ ore la science?
-
Du bua, Tusi Hmijoc thuni co ie dan’ ore eziene co pina? Wen’ ore nge?
ULELO JOKO
Ri daden’ ore la science, ilo numu ta ace me menu ri Tusi Hmijoc?
“La science est-elle d’accord avec la Bible ?” (Article jw.org)
Ri pon’ ore nodei rane ri bun, nodei ace ci pina ci aehngeni ore nge?
“6 prophéties qui se réalisent sous vos yeux” (La Tour de Garde, 1er mai 2011)
Hna iu korione kore nodei hna perofetane ri pon’ ore musi ni si Eleni?
Ore nodei hna perofetane ri Tusi Hmijoc hna cejan’ ore la ule no se cahmane ri pon’ ore Tusi Hmijoc.
“Pour moi, Dieu n’existait pas” (La Tour de Garde No 5 2017)
^ Ore hna perofetane melei se nata wenei Madaru, inom’ ore ci ie dan’ ore ace co pina.
