Iehova kore aca nata me roi, ka Madaru me thu opodon ci alane ko o re nodei hnamenenge co hnahneon. (1 Timothi 1:11) Hnei Nubonengo hna aseri o re co ace hmenuen. O re ekonejeu ri tadan’ o re wathebo nidi ace son’ o re hnameneng, wen’ o re ci kanon’ o re dongodongo ri hnor jeu’ o re ace hmenuen ne nodei tenen.

Nge kore uane ni Madaru ri pon’ o re ci ace hmenuen? Nubonengo ci alan ko bushengon co iara menenge sese ca pina ri tango. O re nodei ekalesia co ninen’ o re nodei wathebo ri ta guhne buic ci menenge il. (Luke 2:1, 4, 5) Iehova ci alan kore cahman ne hmenew co esesekojeu. (Hebera 13:4) Madaru ci kecon’ o re icil. (Malaki 2:16) Roidi o re nodei kerisiano thuni co icil ne co ekonejeu yawe ngei ome sa bushengon ci lae kete.​—Ieielo Mataio 19:3-6, 9.

Iehova hna pupul’ o re cahman ne hmenew ha thu rue o re etha hnapane ni bushengon ri ci ace hmenuen. (Genese 2:18) Cahman kore hawo nore hnameneng, nubone kore co kone enon son’ o re hnameneng, ne co yenon’ o re hmenue ni bon ne nodei re tei bushengon co ule kaceni Madaru. Nubon co wahnacoron’ o re hmenue ni nubon. Cahman ne hmenew co era ko bushengon ne co epareu jeu. Deko ngome me netit, koiko, roi ke bushengon co yenon co nuebot’ o re nia, melei kore ki nore opodon’ o re ci ace hmenuen.​—Ieielo Efeso 4:31, 32; 5:22-25, 33; 1 Peteru 3:7.

Ka ngei ma deko ma etaedengio kore ace hmenuen hmengo, roi ke hmengo co era ko hmengo. (1 Korinito  13:4, 5) Eberedo ni Madaru deko ma ci awane co etha meneng ha thu co aneroini o re nodei nur ci pina du ace hmenuen.​—Ieielo 1 Korinito 7:10-13.

Iehova ci alane ko buhnije co opodon. Nubonengo ci kanu buhnij’ o re nodei ininata me nidi roi ha thu roi du buhnij be haicahman ne be cenew. Nubonengo ci alane ko buhnij co yenonelo o re ngome nata ne thuni sei cecen ne hmaieni buhnij. (Kolose 3:20) Iehova ci alane joko ko buhnij co uni o re opodon co rue ore nodei ace bane so Thu Pupul ne bane so Tenengoien ni Nubonengo.​—Ieielo Thu Pule 11:9–12:1; Mataio 19:13-15; 21:15, 16.

Buhnij co tacebot co ruac ha thu co kone enon sono re kodaru, ’ma re thaet, hna kokoe bane sono re re tei buhnij. (1 Timothi 5:8) Roi di, thu co uni ke buic’ o re opodon, ekowe ke buhnij co yeno buic co hnoro Madaru, ne co nue Nubonengo co ininata buic. (Efeso 6:4) O re tu ni buhnij ri ci hnoro Madaru ha co ahnga sei re tei buhnij. Ngei ma wene ri Tusi Hmijoc kore ininata ni buhnij, il’ o re ininata omelei co ruac roion’ o re ci carajewe ni buic.​—Ieielo Deuteronomi 6:4-7; Ta Onatre 22:6.

Nodei tenen ci opodon ngei buhnij ci amo ne ci iala roio buic. Ka ekowe joko co begi buic ne co anetitini buic. O re la ininata omelei ci cagoreni buic ri ta laened me ci akedini buic co opodon. (Ta Onatre 22:15) Omedi, o re ci begil deko lo co nidi tac, ca co nia ngom.​—Ieielo Kolose 3:21.

Nodei Témoins de Jéhovah hna ilon’ o re nodei gu tusi bane konekatuon’ o re nodei cecen ne hmaien ne nodei tenen. O re nodei gu tusi omelei, o re ceden ko Tusi Hmijoc.​—Ieielo Ta Salamo 19:7, 11.