O re Thu Pupul waetea ri poni ej. Cecewaien Thu ran ke Nubonengo, ci uato xej. Ome joko, Nubonengo deko ma alan ko eje co hue leu’ o re ta lani eje ko. (Jeremia 10:23) Koiko, nidi ace ke eje co hue leu Nubonengo, inom’ o re wa morow ci hue leu’ o re cecene ne hmani nubon. (Isaia 48:17, 18) O re nodei ininata ni Tusi Hmijoc, melei waitutuo ni Madaru so ej.​—Ieielo 2 Timothi 3:16.

O re nodei wathebo ne ininata ni Iehova melei nodei yeno me nidi roi so eje onom, ka ci aehngeni du eje ko co korion ke eje co numu o re nodei hnahneon me serepod e iara oiru. Nidi netit ko eje co hue leu’ o re nodei lene ni Nubonengo, wen’ o re hnei Nubonengo hna puli ej.​—Ieielo Ta Salamo 19:7, 11; Ahngabot 4:11.

Hna kanon’ o re wathebo son’ o re ta ace ne ta ezien ci pina, ka ono re hna anetitini ri hnen, melei seseko me serepod. (Deuteronomi 22:8) Uanelo ne carajewelo ko co korione kore co hue leu’ o re ininata ni Tusi Hmijoc ngei me pina ko se ac. (Ta Onatre 2:10-12) Inome ngei ko Tusi Hmijoc ci yeno eje ko ci roi ni eje itutuo ni Madaru. O re hna anetitini ri hnen’ omelei nidi ac co hue lewe ke eje ngei ma ci ruac, ca ci menenge ri hnameneng, ca ri ta hue ej. Ci ujeni eje joko co ule tedren’ o re ta ciroi ni ej.​—Ieielo Ta Ruace 17:28.

Tru kore rue hna anetitini ri hnen me nidi nidi ac hnei Iesu hna kanon. Hnadan ko: ule kaceni Madaru, hnoro Nubonengo ne co sinemenenge ni Nubonengo e iara oiru. Koiko, eje co  hue lewe o re hna anetitini ri hnen’ omelei ri ta uane ni eje. (Ta Onatre 3:6) Nodei ngome ci ninenon’ omelei ri hnor ha co kani Madaru, ne co uni o re hnahneon ne ile ko re waruma tha thu aseko.​—Ieielo Mataio 22:36-38.

O re truon ko: eje co menenge era ne dongodongo ne ilo soten. (1 Korinito 13:4-7) Ngei eje ma ci rue inomelei, ci tuon’ o re la rue ni Madaru son’ o re ngom.​—Ieielo Mataio 7:12; 22:39, 40.

Ore nodei anetitini ri hnen ri Tusi Hmijoc ci yenon’ o re ta hnameneng co salu so ne co era. (Kolose 3:12-14) Ka ci cagoreni buic joko ri pon’ o re ci acehmenuen: o re ci acehmenuen co iara serepod.​—Ieielo Genese 2:24.

O re nodei hna anetitini ri hnen ci cumo eje ri ci roi nore hnengom ne ri nodei alaien’ o re hnor. Inome ngei ko nodei masetr ci alan’ o re nodei thu ruace roi ne lata me netit, wen’ o re buic ci ninen’ o re Tusi Hmijoc. (Ta Onatre 10:4, 26; Hebera 13:18) Tusi Hmijoc ci yeno eje joko co opodoneti o re ta ace eje hna numu, ne co tedre podilu sei Madaru me nidi kani ej ke deko sen’ o re nodei ace nore hnengom.​—Ieielo Mataio 6:24, 25, 33; 1 Timothi 6:8-10.

O re nodei anetitini ri hnen ci cagoren’ o re ci roi ni ej. (Ta Onatre 14:30; 22:24, 25) Inomelei Madaru ci wathebo ej co pa kuakec, thu deko co pina du eje kore ta ued me thu atangoni ne ta tango keden. (Ta Onatre 23:20) Iehova ci nue eje co kua alkol waiami so. (Ta Salamo 104:15; 1 Korinito 6:10) O re nodei anetitini ri hnen ni Madaru roi so ej, wen’ o re ci yeno eje co ule tedren’ o re ta ruace ne ta uane ni ej. (Ta Salamo 119:97-100) Ome te, o re nodei nidi thu hne ci hmegigion’ o re nodei gone ni Madaru deko ma bane son’ o re roi so buic so. Ke roidi, buic ci hmegigi ha thu ahmani Madaru.​—Ieielo Mataio 5:14-16.