O re nata ci ie ko ngome co menenge pode ri ten’ o re aw, ile ri Tusi Hmijoc. (Ta Salamo 37:29) Numu 66 ko re nodei gua tusi ri hnoren’ o re Tusi Hmijoc. Madaru hna ureie xara fote ko re ta ngome me hmijoc hna xiwimomo: ore faive hna dane, hnei Mose hna nunue, ha 3 500 ko re ta kenereken, o re wabubun, melei hnei Ioane aposetolo, ha 1 900 ko re ta kenereken onom. Nodei uane ni la ko re nodei hna waimomon’ omelei? Uane ni Madaru ke deko ma uane ni ngom, wen’ o re Nubonengo hna kanu buic omelei o re Uiewaieni Hmijoc. (2 Samuela 23:2) Koiko, Iehova ko re aca Eberedo.​—Ieielo 2 Timothi 3:16; 2 Peteru 1:20, 21.

Ulelo ore video La Ko Re Aca Eberedo?

Eje ha ule kacen ko Tusi Hmijoc wenei Madaru, wen’ o re bone ci ie dane o re nodei ace co pina, deko se waac me deko hna perofetan. Deko se ngome me thuni omelei. (Iosua 23:14) Madaru so me numu Nen ko re thuni co ie hnadan’ o re nodei ac co pina ka co ayuni.​—Ieielo Isaia 42:9; 46:10.

Wen’ omelei, o re Tusi wenei Madaru, deko lo te se Tusi me inomelei. Tusi Hmijoc so. Ka hna xiwamomon ta ade thawalan’o re 15 000 000 000 ko re ta tusi hmijoc, ka ade ade handed ko re nodei la nengoc ri nodei la nengoc me hmaiai. Seseko Tusi Hmijoc nidi wene koda, roidi icojeu ne il’ o re yeno no re nodei ac. Omete, o re ade fote hna xiwamomo, buic deko hna icakor. * Ome joko, ko ci nidi ule kacen’ o re nidi ci rane ni Madaru. Nene ko re Tusi Hmijoc, co thaureie ne co aroini o re ci roi nore nodei ngom onom. Wen’ omelei, xara thausan thausan ko re nodei ngome ci ua sesekone ko Tusi Hmijoc wenei Madaru.​—Ieielo 1 Thesalonaika 2:13.

Ulelo ore video Korione Co Ua Sesekone Ko Tusi Hmijoc Wenei Madaru?

O re nidi kakailen’ o re nodei nata me roi, ko Madaru numu hna uane ri hnen bonengo co aiuni, wen’ o re nidi hma kore ciran son’ o re nodei ngome ileoden. Tusi Hmijoc ci aehngeni hna korion kore hna atakoni ore hnahneon ri Paradais koda, ka co korione joko kei Madaru co kanon yawe du ej’ o re Paradais.​—Ieielo Ahngabot 21:4, 5.

O re Tusi omelei numu nodei wathebo, ne nodei anetitini, ne nodei ininata. Ome joko ko, ci lae natan’ o re la menenge ni Madaru ne ngom, ne il’ o re nodei ac ci aehngeni o re singen ni Nubonengo Tusi Hmijoc so kore thuni co konekatu buhnij co ule kaceni Madaru. Ci aehngeni joko du buhnij ko co korion co kani Madaru.​—Ieielo Ta Salamo 19:7, 11; Iakobo 2:23; 4:8.

O re gu tusi’ om co konekatu buhnij co carajewe o re Tusi Hmijoc, inom’ o re hna rue hnei Iesu. Nubonengo ci ieie o se trekes ne se trekes ne ci ie ahngan “ha thu co cara jewe jeu’ o re eberedo hna xiwamomon.”​—Ieielo Luke 24:27, 45.

O re nata me roi wenei Madaru, melei nidi thawalan’ o re nodei nata ileoden. Nianedi osoten deko ma didion, ka osoten ci cenge nia di. Roidi zi hage hnenigel. Zi yenonelo ke buhnij co ule kaceni Madaru, ha ile buhnij me thuni co uroion’ o re waruma tha thu aseko.​—Ieielo Ioane 17:3.