YENO 2
La Kei Madaru?
1. Nge kore tan eje co une du Madaru?
O re nidi makaze hna pupul o re nodei ace ileoden. Wenekoda kei Madaru, ca e iara oiru ko ke Nubengo. (Ta Salamo 90:2) Wenei Madaru kore nodei nata me roi, eje ci uni ri Tusi Hmijoc. (1 Timothi 1:11) Ore ciroi wenei Madaru, tan’ omelei zi unelo du Madaru.—Ieielo Ahngabot 4:11.
2. Inom o re nge kei Madaru?
Dekolo ngom hna rowo Madaru, Uiewaieni ke Nubonengo, o re la ciroi ni Nubonengo deko ma ekowe ne il’ o re la ciroi no re ngom ome ri ten. (Ioane 1:18; 4:24) Roidi, o re singene ni Madaru ci angha ri nodei ace hnei Nubonengo hna pupul. Da ule, o re etha pengen’ o re nodei anga serei ne nodei engen, ci ie anghane o re ci rane, ne waetea ni Madaru. Nodei wajekole no re aw ne nodei kote wajekole ci aengheni o re nene ni Nubonengo.—Ieielo Rome 1:20.
Tusi Hmijoc so, kore thuni co acarajewe roion’ o re pengen ni Madaru. Melei joko, Tusi Hmijoc ci ie o re lata me roi ne lata Madaru ci kecon, ci ie joko ko korione kei Madaru ci cumo eje ne korione Nubonengo ci konekatu eje ri nodei rane ileoden.—Ieielo Ta Salamo 103:7-10.
3. La kore yelen ni Madaru?
Hna beredone kei Iesu: “Cecewangoiehnij ile ri aw ke! Hmijocengo ko re acekiwangoieni buango.” (Mataio 6:9) Hmaiai kore nodei hna ato yeleni ni Madaru, roidi sa so kore nidi yeleni Nubonengo. Ri se la nengoc, ne se la nengoc, o re yeleni Madaru deko ci ie ekowe seson. Pene nengone, eje ci ie ko “Iehova.” Osoten ci iedi ko “Yahwé.”—Ieielo Ta Salamo 83:18.
Hmaiai ko re Tusi Hmijoc ha hna atakoni o re yeleni Madaru ka ha hna anedi o re nodei hna atoyel, inom ko Doku, ca Makaze. Roidi, ri ezien kodrihne, ha bathu seven thausan ko re yeleni ni Madaru hna xiwamomon ri Tusi Hmijoc. Ka Iesu hna aehngeni du nodei kokonien’ o re acekini ni Madaru.—Ieielo Ioane 17:26.
Ulelo ore video Ilo , Madaru Numu Yel?
4. Iehova ci ua ushiwa eje?
Like this loving father, God is acting for our long-term good
Hmaiai kore ace ci ajoni eje. Melei ci ie ko Iehova deko ci ua ushiwa eje? Osoten, ci uane ko eje ma ci jo, melei Iehova kore ci tubunidi eje, ci citho ko melei.—Ieielo Iakobo 1:13.
Madaru, hna nue gupa eje, co rue o re etha alaien. Ilo, eje deko ma opodon co rue o re alaieni Madaru? (Iosua 24:15) Cece kore ngom ci nia ngom’ one osoten, melei kore tan’ o re numu ci jo. Nidi sheusheu kei Madaru ma ci rowon omelei.—Ieielo Genese 6:5, 6.
Iehova ci ua ushiwa ej. Alaton ni Nubonengo ko co hnaneone kore ta ciroi ni ej. Ka dai asasa, Nubonengo ha co atakoni o re nodei ace ne nodei ngom ci ajoni eje, ha gukokode kore ezien, ri dane o re co rue inomelei. Nidi numu tan, ko Iehova be deko ma rue inomelei. Ri Yeno 8, eje co uni o re tan omelei.—Ieielo 2 Peteru 2:9; 3:7, 13.
5. Korione ke eje co aceno Madaru?
Iehova ci kaio eje ha thu co aceno Nubonengo, lene ri ci hne. Nubonengo ci didio eje etha xara sa. (Ta Salamo 65:2; 145:18) Nubonengo ha ibetu co nue gupane o re nodei nia ni ej. Nubonengo ci ule kacen’ o re nodei ac eje ci taceti co rue, kacen me ushiwa du ej. Wen’ omelei, ngei me deko ma netit ke eje, nidi ekowe co menenge hnore sa ne Madaru.—Ieielo Ta Salamo 103:12-14; Iakobo 4:8.
Iehova hna kanu eje o re ci roi, koiko, roi ke eje co nidi hnoro Nubonengo thawalan’ o se ngom. (Mareko 12:30) Ngei buhnije me nidi alane co acikaceni Madaru, ne co nineno Nubonengo, ile buhnij co aceno Nubonengo.—Ieielo 1 Timothi 2:4; 1 Ioane 5:3.
